(កំពង់ស្ពឺ)៖ ខាងមុខទ្វារទឹករលាំងជ្រៃ ភូមិអន្លង់ធម្ម ឃុំតាំងក្រូច ស្រុកសំរោងទង ខេត្តកំពង់ស្ពឺ ត្រូវបានគេចាក់រំលោភបន្ថែមលើសប្លង់កម្មសិទ្ធិ ដោយមិនគោរពច្បាប់ និងមិនស្តាប់តាមអាជ្ញាធរណែនាំ ខណៈពលរដ្ឋរស់ក្បែរៗនោះ បានបញ្ចេញប្រតិកម្មយ៉ាងខ្លាំង។ ម្ចាស់ទីតាំងដីមួយកន្លែងនេះ ត្រូវបានគេរាយការណ៍ថា គឺរបស់លោកស្រី សុខ វណ្ណា ដែលដីរបស់មានទំហំសរុប ៣៧ ២៧៥ ម៉ែត្រការ៉េ។

ពលរដ្ឋបានលើកឡើងថា មិនដឹងម្ចាស់ទីតាំងអាងអ្វីឡើយ ដែលហ៊ានចាក់រំលោភដោយមិនលាក់លាមលើសម្បត្តិសាធារណៈរបស់រដ្ឋបែបនេះ។ ពលរដ្ឋបាននិយាយតាមត្រង់ថា បើពលរដ្ឋធម្មតាឲ្យតែហ៊ានចាក់ដីបំពានច្បាប់ និងមិនញញើតបែបនេះ ច្បាស់ជាត្រូវបានកោះហៅ ឬចាប់គ្រឿងចាក់យកទៅបាត់ជាមិនខាន។ តែយ៉ាងណាកន្លងទៅ គេឃើញមន្រ្តីជំនាញ និងអាជ្ញាធរបានចុះហាមឃាត់ដែរ តែបុគ្គលខាងលើនៅតែហ៊ានប្រព្រឹត្តមិនខ្លាចច្បាប់ទៀត។

មន្រ្តីធនធានទឹកខេត្តកំពង់ស្ពឺ បានឲ្យដឹងថា ជំនាញគ្រប់ជាន់ថ្នាក់បានចុះទៅពិនិត្យដល់ទីតាំងនោះរួចរាល់ហើយ ថែមទាំងបានជូនដំណឹងដល់សាម៉ីខ្លួនផងដែរ និងបានឲ្យឈប់ការចាក់ដីរំលោភយកដីចំណីស្ទឹងបែបទៀត ដែលអាចនាំកើតមានគ្រោះមហន្តរាយ ទឹកជំនន់ ដោយសារចំណីច្រាំងស្ទឹង ព្រោះធ្វើឲ្យបិទផ្លូវទឹក។

មន្ទីរជំនាញបានធ្វើលិខិតផ្លូវការគោរពអភិបាលខេត្តកំពង់ស្ពឺ រង់ចាំតែមានវិធានការលើករណីខាងលើ។ សកម្មភាព នៃការចាក់ដីរំលោភចូលក្នុងស្ទឹង កាលពីថ្ងៃទី៦ ខែឧសភា ឆ្នាំ២០២៦ មន្ត្រីបច្ចេកទេស នៃមន្ទីរ សហការជាមួយរដ្ឋបាលស្រុកសំរោងទង អាជ្ញាធរភូមិ ឃុំ បានចុះពិនិត្យដល់ទីតាំងចាក់បំពេញអាចម៍ដី ជាក់ស្តែងរបស់លោកស្រី សុខ វណ្ណា និងបានរកឃើញថា លោកស្រីពិតជាបានចាក់ដីរំលោភចូលក្នុងស្ទឹងព្រែកត្នោត មានទំហំចំនួន ៤៧៤៦ ម៉ែត្រការ៉េ ដោយពុំមានលិខិតអនុញ្ញាតពីអាជ្ញាធរដែនដី និងស្ថាប័នជំនាញពាក់ព័ន្ធនោះទេ ។

បើយោងតាមច្បាប់ស្តីពីការគ្រប់គ្រង ការប្រើប្រាស់ និងការចាត់ចែងលើទ្រព្យសម្បត្តិរដ្ឋ មាត្រា៨១ ដែលប្រកាសឱ្យប្រើដោយព្រះរាជក្រមលេខ នស/រកម/១១២០/០៣០ ចុះថ្ងៃទី១៤ ខែវិច្ឆិកា ឆ្នាំ២០២០ ចែងថា៖ «រាល់អំពើរំលោភកាន់កាប់ទ្រព្យសម្បត្តិរដ្ឋ ជាអចលនទ្រព្យដោយខុសច្បាប់ដូចមានចែងក្នុង មាត្រា៧១ ត្រូវផ្តន្ទាទោសដាក់ពន្ធនាគារពី ២ (ពីរ)ឆ្នាំ ដល់ ៥(ប្រាំ)ឆ្នាំ និងពិន័យជាប្រាក់ពី ៤.០០០.០០០ (បួនលាន) រៀល ដល់ ១០.០០០.០០០ (ដប់លាន) រៀល»៕