(ភ្នំពេញ)៖ មន្រ្តីជាន់ខ្ពស់នៃក្រសួងការងារ និងបណ្តុះបណ្តាលវិជ្ជាជីវៈ បានអំពាវនាវឱ្យប្រជាពលរដ្ឋ សិស្សានុសិស្ស យុវជន ចូលរួម ទិវាជាតិអប់រំបណ្តុះបណ្តាលបច្ចេកទេស និងវិជ្ជាជីវៈ លើកទី៩ ឆ្នាំ២០២៦ ដែលគ្រោងរៀបចំឡើងរយៈពេល២ថ្ងៃ ក្រោមប្រធានបទ «TVET ផ្តល់ជំនាញ ការងារ និងប្រាក់ចំណូល» ដើម្បីឈ្វេងយល់ពីការបណ្តោះបណ្តាលជំនាញវិជ្ជាជីវៈ ស្របតាមការរីកចម្រើននៃបច្ចេកវិទ្យា សិក្សាពីស្នាដៃរបស់សិស្សដែលបានបញ្ចប់ការសិក្សា និងស្វែងរកឱកាសការងារធ្វើនៅក្នុងព្រឹត្តិការណ៍នេះ

មន្រ្តីជាន់ខ្ពស់នៃក្រសួងការងារ និងបណ្តុះបណ្តាលវិជ្ជាជីវៈ បានធ្វើឡើងនៅថ្ងៃទី០៨ ខែមិថុនា ឆ្នាំ២០២៦ ក្នុងសន្និសិទស្ដីពី ការត្រៀមរៀបចំកម្មវិធី «TVET-Day» លើកទី៩ ឆ្នាំ២០២៦ នៅទីស្ដីការក្រសួងការងារ និងបណ្តុះបណ្តាលវិជ្ជាជីវៈ។

លោក ស៊ុន មេសា អ្នកនាំពាក្យក្រសួងការងារ បានបញ្ជាក់យ៉ាងដូច្នេះថា៖ «ក្រសួងការងារ និងបណ្តុះបណ្តាលវិជ្ជាជីវៈ ក៏សូមអំពាវនាវទៅដល់បងប្អូនទាំងអស់ ប្រជាពលរដ្ឋ សិស្សនិស្សិត ចាប់ពីថ្នាក់ទី៩ ឡើងទៅ សូមបងប្អូនទៅចូលរួមថ្ងៃទិវា TVET ដើម្បីបងប្អូនមានឱកាសនៅក្នុងការស្វែងយល់ពីបច្ចេកវិទ្យា ហើយបងប្អូនអាចមើលឃើញពីជម្រើសមួយបន្ថែមទៀត នៅក្នុងការបណ្ដុះបណ្ដាលបច្ចេកទេស ក្នុងការសិក្សារបស់បងប្អូនទាំងអស់គ្នាផងដែរ»។

អ្នកនាំពាក្យរូបនេះ បានបន្ដថា សម្រាប់ក្រុមហ៊ុនឯកជន អាចមើលឃើញពីសមត្ថភាពដ៏ល្អ របស់សិស្សនិស្សិត ដែលបានត្រៀមខ្លួនរួចជាស្រេច ក្នុងការចូលរួមក្នុងវិស័យឧស្សាហកម្ម ក៏ដូចជានូវក្នុងទីផ្សារនៅប្រទេសកម្ពុជាផងដែរ។

ជាមួយគ្នានេះ លោក ហ៊ីង ស៊ីដេត អគ្គនាយក នៃអគ្គនាយកដ្ឋានអប់រំបណ្តុះបណ្តាលបច្ចេកទេស និងវិជ្ជាជីវៈ TVETបានបន្ថែមថា កម្មវិធី «TVET-Day» មិនមែនធ្វើតែនៅក្នុងភ្នំពេញនោះទេ គឺធ្វើឡើងនៅទូទាំងប្រទេស ដើម្បីឱ្យបងប្អូនបានចូលរួមគាំទ្រជូនកូនចៅ ក៏ដូចជាជំរុញយុវជននូវក្នុងសហគមន៍ នៅតាមលំនៅឋានរបស់បងប្អូន ធ្វើយ៉ាងឱ្យបានចូលរៀន។ លោកបានបន្ដថា រៀន TVET យុវជនម្នាក់ត្រូវតែមានជំនាញមួយយ៉ាងតិចប្រចាំជីវិត ឬក៏រាជរដ្ឋាភិបាល មិនទុកឱ្យយុវជន ប្រជាពលរដ្ឋ បុគ្គលក្រៅប្រព័ន្ធណាម្នាក់ ដែលគ្មានជំនាញនោះទេ។

សូមជម្រាបដែរថា ទិវាជាតិអប់រំបណ្តុះបណ្តាលបច្ចេកទេស និងវិជ្ជាជីវៈ លើកទី៩ ឆ្នាំ២០២៦ នឹងធ្វើឡើងក្រោមប្រធានបទ៖ «TVET ផ្តល់ជំនាញ ការងារ និងប្រាក់ចំណូល» ដែលនឹងប្រព្រឹត្តទៅនៅថ្ងៃទី១៥-១៦ ខែមិថុនា ឆ្នាំ២០២៦ ចាប់ពីម៉ោង ៨៖០០នាទីព្រឹក ដល់ម៉ោង ៨៖០០នាទីយប់ នៅមជ្ឈមណ្ឌលសន្និបាត និងពិព័រណ៍កោះពេជ្រ អគារ (G,H,I,J,K,L) រាជធានីភ្នំពេញ ៕