(ក្រចេះ)៖ អាជ្ញាធរស្រុកចិត្របុរី សហការជាមួយមន្ទីរ៉ែ និងថាមពលខេត្ត បានដឹកនាំកម្លាំងចម្រុះរបស់គណៈបញ្ជាការឯកភាពស្រុក ចុះត្រួតពិនិត្យមើលទីតាំងកាបូមដីចាក់ទររុករករ៉ែមាសអនាធិបតេយ្យ ក្នុងមូលដ្ឋានឃុំសំបុក ស្រុកចិត្របុរី ខេត្តក្រចេះ នាថ្ងៃទី៨ ខែមិថុនា ឆ្នាំ២០២៦។

ក្រុមការងាររបស់គណៈបញ្ជាការឯកភាពស្រុកចិត្របុរី ដឹកនាំដោយលោក សន ស៊ីដែន អភិបាលរងស្រុក តំណាងលោក យិន វណ្ណៈ អភិបាលស្រុកចិត្របុរី សហការជាមួយមន្ទីររ៉ែ និងថាមពលខេត្ត ដឹកនាំដោយលោក រ័ត្ន តុលា ប្រធានមន្ទីរ និងជាប្រធានក្រុមការងារ បានចុះពិនិត្យដល់ទីតាំងបូមដីចាក់ទររករ៉ែមាសអនាធិបតេយ្យ នៅចំណុចអូរយ៉ុង នៃមូលដ្ឋានឃុំសំបុក ស្រុកចិត្របុរី ខេត្តក្រចេះ។

បើតាមមន្ត្រីជំនាញ ក៏ដូចជាអាជ្ញាធរមូលដ្ឋាន បានឲ្យដឹងថា ការត្រួតពិនិត្យ លើករណីរុករករ៉ែអនាធិបតេយ្យនេះ ក្រុមការងារបានពិនិត្យជាក់ស្តែងឃើញ ប្រជាជនបូមដីចាក់ទររករ៉ែមាសអនាធិបតេយ្យមានចំនួន១៧ទីតាំង ក្រោយអនុវត្តវិធានការតាមនីតិវិធី គឺប្រជាពលរដ្ឋបានយល់ព្រមរុះរើសម្ភារៈ និងគ្រឿងយន្តទាំងអស់ ប៉ុន្តែនៅសល់១ ទីតាំងមិនទាន់រុះរើ (បច្ចុប្បន្នមិនមានសកម្មភាពតែឧបករណ៍មានម៉ាស៊ីនសាំង ចំនួន១គ្រឿង ម៉ាស៊ីនគោយន្តចំនួន១គ្រឿង ទុយោប្រវែង៥០ម៉ែត្រ និងទរចាក់ចំនួន១ទរ)។

ក្រុមការងារបានធ្វើកំណត់ហេតុឲ្យម្ចាស់ទីតាំងរុះរើ ដោយទុកពេលចំនួន២ គិតចាប់ពីថ្ងៃធ្វើកំណត់ហេតុ។ ជាមួយគ្នានោះ មន្ត្រីជំនាញ និងអាជ្ញាធរ បានធ្វើការពន្យល់ច្បាប់ពាក់ព័ន្ធការប្រព្រឹត្តបូមដីចាក់ទររករ៉ែមាសអនាធិបតេយ្យ ឲ្យម្ចាស់ទីតាំងដែលមិនទាន់រុះរើឲ្យបានយល់ច្បាស់ អំពីនីតិវិធីច្បាប់កំណត់ ប្រសិនបើរកឃើញថា ម្ចាស់ទីតាំង មិនទាន់រុះរើ នឹងចាត់វិធានការតាមនីតិវិធីច្បាប់ចំពោះអ្នកបន្តប្រព្រឹត្តល្មើស៕