(កណ្តាល)៖ សហគ្រាស «ជេអិល» ផលិតគ្រឿងឧបភោគបរិភោគ ដូចជា ប្រហិតគ្រប់មុខ ត្រីខកំប៉ុង ផ្អកត្រីប្រា ប្រហុក ជាដើម ស្ថិតតាមបណ្តោយផ្លូវជាតិលេខ៥ ភូមិទួលអំពិល ឃុំពញាឮ ស្រុកពញាឮ ខេត្តកណ្តាល បានសាងសង់សំណង់រឹងមាំរំលោភចូលចំណីទន្លេជាច្រើនម៉ែត្រ។

សកម្មភាពសាងសង់សំណង់ដ៏ធំរំលោភចូលចំណីទន្លេនេះ បានកើតឡើងជាយូរមកហើយ ខណៈដែលម្ចាសសហគ្រាសសុំច្បាប់ទៅស្រុកដោយសាងសង់ធម្មតា តែបែរជាលួចលាក់សង់រំលោភចូលចំណីទន្លេដោយស្ងាត់ៗទៅវិញ។

លោក ថន សុវណ្ណា អភិបាលស្រុកពញាឮ ថ្លែងប្រាប់អ្នកយកព័ត៌មាន Fresh News នៅថ្ងៃទី៩ ខែមិថុនា ឆ្នាំ២០២៦ថា អាជ្ញាធរពុំបានដឹងថា ម្ចាស់សហគ្រាសលួចលាក់សង់រំលោភបែបនេះទេ តែបន្ទាប់ពីដឹងភ្លាម ក្រុមការងារស្រុកបានចុះទៅពិនិត្យ ហើយប្រាប់ឲ្យម្ចាស់សហគ្រាសផ្អាកសំណង់សិន និងសុំច្បាប់ទៅដល់ក្រសួងធនធានទឹកឲ្យបានត្រឹមត្រូវជាមុនសិន៕