(ព្រះវិហារ)៖ លោកវេជ្ជបណ្ឌិត គួង ឡូ ទីប្រឹក្សាក្រសួងសុខាភិបាល និងជាប្រធានមន្ទីរសុខាភិបាលខេត្តព្រះវិហារ បានអំពាវនាវដល់បងប្អូនប្រជាពលរដ្ឋភៀសសឹក សូមបង្កើនការប្រុងប្រយ័ត្នពីជំងឺគ្រុនឈាម និងត្រូវពិនិត្យសុខភាពជាប្រចាំ។

ការអំពាវនាវរបស់លោកវេជ្ជបណ្ឌិត គួង ឡូ ក្នុងឱកាសដែលលោករួមជាមួយថ្នាក់ដឹកនាំមន្ទីរ និងមន្ត្រីសុខាភិបាល ចូលរួមក្នុងយុទ្ធនាការចែកមុងជូនប្រជាពលរដ្ឋដែលកំពុងភៀសសឹក និងស្នាក់នៅតាមមណ្ឌលសុវត្ថិភាព វត្តទួលអណ្តែត វត្តពើងអង្កាម និងភូមិតាកឹងបៃតង នៅថ្ងៃទី៩ ខែមិថុនា ឆ្នាំ២០២៦។

នៅក្នុងឱកាសនោះដែរ ប្រធានមន្ទីរសុខាភិបាលខេត្តព្រះវិហារ បានផ្សព្វផ្សាយអំពីវិធានការការពារជំងឺឆ្លង និងជំងឺមិនឆ្លង ដើម្បីថែរក្សាសុខភាពប្រជាពលរដ្ឋដែលកំពុងស្នាក់នៅតំបន់សុវត្ថិភាព។

ប្រធានមន្ទីរសុខាភិបាលខេត្តព្រះវិហារ បានគូសបញ្ជាក់ថា៖ «បច្ចុប្បន្ននេះ ជំងឺគ្រុនឈាមកំពុងកើតមាននៅក្នុងសហគមន៍មួយចំនួន ដូច្នេះបងប្អូនប្រជាពលរដ្ឋត្រូវយកចិត្តទុកដាក់សម្អាតបរិស្ថានជុំវិញកន្លែងស្នាក់នៅ កម្ចាត់ជម្រកមូសខ្លា និងត្រូវគេងក្នុងមុងជាប្រចាំ ដើម្បីបង្ការការឆ្លងជំងឺគ្រុនឈាម និងជំងឺផ្សេងៗដែលបង្កដោយមូស»។

លោក គួង ឡូ ក៏បានលើកឡើងពីសារៈសំខាន់នៃការបង្ការ និងគ្រប់គ្រងជំងឺមិនឆ្លង ដូចជា៖ ជំងឺលើសសម្ពាធឈាម និងជំងឺទឹកនោមផ្អែម ដែលកំពុងក្លាយជាបញ្ហាសុខភាពសាធារណៈមួយផងដែរ។លោកណែនាំឱ្យពិសាអាហារដែលមានសុខភាព ដោយពិសាអាហារតិចខ្លាញ់ តិចអំបិល និងតិចស្ករ ដែលក្រសួងសុខាភិបាលបានផ្សព្វផ្សាយ និងត្រូវមានលំហាត់ប្រាណយ៉ាងហោចណាស់៣០នាទីក្នុង១ថ្ងៃ និង៥ថ្ងៃក្នុង១សប្តាហ៍។

លោកក៏បានថ្លែងប្រាប់ស្ត្រី និងប្រជាពលរដ្ឋដែលមានអាយុលើសពី ៤០ឆ្នាំ គួរតែទៅពិនិត្យសុខភាពឱ្យបានទៀងទាត់ ដោយធ្វើតេស្តវាស់សម្ពាធឈាម និងពិនិត្យជាតិស្ករក្នុងឈាម ជាមួយក្រុមគ្រូពេទ្យសង្គ្រោះបឋម ដែលមានទីតាំងក្នុងមណ្ឌលសុវត្ថិភាព ដើម្បីរកឃើញជំងឺបានទាន់ពេល និងទទួលការព្យាបាលប្រកបដោយប្រសិទ្ធភាព។

ជាមួយគ្នានេះដែរ លោកវេជ្ជបណ្ឌិត គួង ឡូ ក៏បានជម្រាបជូនស្ត្រីមានផ្ទៃពោះចំនួន ៨នាក់ ដែលកំពុងស្នាក់នៅមណ្ឌលសុវត្ថិភាពវត្តទួលអណ្តែត ឱ្យអញ្ជើញមកពិនិត្យអេកូសាស្ត្រនៅព្រឹកថ្ងៃទី១០ ខែមិថុនា ឆ្នាំ២០២៦ ខណៈក្រុមមន្ត្រីសុខាភិបាលនឹងនាំយកឧបករណ៍អេកូសាស្ត្រចល័តមកផ្តល់សេវាជូនដោយផ្ទាល់ ដើម្បីតាមដានសុខភាពមាតា និងទារកក្នុងផ្ទៃ៕