(ស្ទឹងត្រែង)៖ រដ្ឋបាលក្រុងស្ទឹងត្រែង នៅថ្ងៃទី០៩ ខែមិថុនា ឆ្នាំ២០២៦ បានរៀបចំវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាក្រុង អាណត្តិទី៤ ឆ្នាំ២០២៦ ក្រោមអធិបតីភាព លោក សៀ ហេង ប្រធានក្រុមប្រឹក្សាក្រុង និងលោក លី មីណា អភិបាលក្រុង នៅវត្តជោតិញារាម (ហៅវត្តគីឡូ៨) ស្ថិតក្នុងភូមិគីឡូ៨ សង្កាត់សាមគ្គី ក្រុងស្ទឹងត្រែង ដោយមានការចូលរួមពីមន្ត្រីពាក់ព័ន្ធ អាជ្ញាធរសង្កាត់ ប្រជាពលរដ្ឋ និងតំណាងសហគមន៍យ៉ាងច្រើនកុះករ។

វេទិកានេះត្រូវបានរៀបចំឡើងក្នុងគោលបំណងបង្កើនការផ្សព្វផ្សាយព័ត៌មានសំខាន់ៗ ពាក់ព័ន្ធនឹងសមិទ្ធផលការងារ និងផែនការអភិវឌ្ឍរបស់រដ្ឋបាលក្រុងស្ទឹងត្រែង សម្រាប់ឆ្នាំ២០២៦ ព្រមទាំងបើកឱកាសឱ្យប្រជាពលរដ្ឋបានចូលរួមលើកឡើងមតិយោបល់ ក្តីកង្វល់ និងសំណើរផ្សេងៗ ដើម្បីអាជ្ញាធរអាចយកទៅពិចារណា និងដោះស្រាយឱ្យមានប្រសិទ្ធភាព និងទាន់ពេលវេលា។

ក្នុងឱកាសនោះ កម្មវិធីវេទិកាបានផ្តោតសំខាន់លើប្រធានបទចម្បងចំនួន៤ រួមមានទី១៖ ការអនុវត្តគោលនយោបាយភូមិ-ឃុំ សង្កាត់មានសុវត្ថិភាព, ទី២៖ ការងារសុខាភិបាល និងសុខភាពសាធារណៈ, ទី៣៖ ការងារអប់រំសិក្សាធិការ ពិសេសគុណភាពបង្រៀន និងការសិក្សារបស់គ្រូ និងសិស្ស និងទី៤៖ ការងារកសិកម្ម ការបង្កបង្កើនផល និងការស្វែងរកទីផ្សារការងារ។

ថ្លែងក្នុងវេទិកានេះ ប្រធានក្រុមប្រឹក្សាក្រុងស្ទឹងត្រែង បានគូសបញ្ជាក់ថា វេទិកាផ្សព្វផ្សាយ និងពិគ្រោះយោបល់ គឺជាវិធីសាស្ត្រសំខាន់មួយក្នុងការលើកកម្ពស់តម្លាភាព និងប្រសិទ្ធភាពការងាររបស់រដ្ឋបាលថ្នាក់ក្រោមជាតិ ព្រមទាំងជំរុញឱ្យមានការចូលរួមយ៉ាងសកម្មពីប្រជាពលរដ្ឋ ក្នុងការដោះស្រាយបញ្ហានានានៅមូលដ្ឋាន និងគាំទ្រដល់ដំណើរការអភិវឌ្ឍន៍តាមបែបប្រជាធិបតេយ្យ។

លោកបានបន្ថែមថា អាជ្ញាធរមូលដ្ឋានមិនអាចអនុវត្តភារកិច្ចឲ្យមានប្រសិទ្ធភាពពេញលេញបានឡើយ ប្រសិនបើខ្វះការយល់ដឹង និងការចូលរួមពីប្រជាពលរដ្ឋ និងសហគមន៍។ ដូច្នេះ វេទិកានេះ គឺជាវេទិកាសំខាន់មួយសម្រាប់បង្ហាញពីសមិទ្ធផលដែលសម្រេចបាន និងផែនការអភិវឌ្ឍន៍នាពេលខាងមុខ របស់ក្រុង និងសង្កាត់ ក្នុងឆ្នាំ២០២៦ ដើម្បីបង្កើនភាពជឿជាក់ និងលើកទឹកចិត្តឲ្យប្រជាពលរដ្ឋមានភាពក្លាហាន ក្នុងការបញ្ចេញមតិយោបល់ និងលើកឡើងបញ្ហាប្រឈមផ្សេងៗ។

ជាមួយគ្នានេះ វេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាក្រុងស្ទឹងត្រែង ក៏បានអនុវត្តតាមទស្សនៈ «ហ៊ាននិយាយ ហ៊ានចូលរួម អាចចូលរួម» ដើម្បីធានាថា ប្រជាពលរដ្ឋគ្រប់រូបមានឱកាសចូលរួមយ៉ាងសកម្មក្នុងដំណើរការអភិវឌ្ឍន៍មូលដ្ឋាន និងការគ្រប់គ្រងសាធារណៈប្រកបដោយប្រសិទ្ធភាព និងចីរភាព។

លោក លី មីណា បានបញ្ជាក់ថា​ រដ្ឋបាលក្រុងស្ទឹងត្រែង បានខិតខំអនុវត្តតួនាទី និងភារកិច្ចរបស់ខ្លួនយ៉ាងសកម្ម ក្នុងការផ្តល់សេវាសាធារណៈជូនប្រជាពលរដ្ឋឱ្យកាន់តែមានគុណភាព ប្រសិទ្ធភាព និងឆាប់រហ័ស ស្របតាមគោលនយោបាយរបស់រាជរដ្ឋាភិបាល។ ជាពិសេសការអនុវត្តគោលនយោបាយភូមិ-ឃុំ សង្កាត់មានសុវត្ថិភាព ត្រូវបានយកចិត្តទុកដាក់យ៉ាងខ្លាំង ដើម្បីធានាសុវត្ថិភាព សណ្ដាប់ធ្នាប់សាធារណៈ និងបង្កើនភាពសុខសាន្តជូនប្រជាពលរដ្ឋនៅមូលដ្ឋាន។

តាមរយៈវេទិកានេះ អាជ្ញាធរក្រុងស្ទឹងត្រែងក៏ទទួលបានមតិយោបល់ និងសំណើរពីប្រជាពលរដ្ឋចំនួន ២៥សំណួរ និងបានឆ្លើយតបភ្លាមៗ បានចំនួន ២៣សំណួរ និងបន្តត្រួតពិនិត្យ លើសំណួរ និងដើម្បីឆ្លើយតបពេលក្រោយមានចំនួន ០២សំណួរ ដែលនឹងត្រូវយកទៅពិនិត្យ ដោះស្រាយ និងបន្តអភិវឌ្ឍន៍ឱ្យកាន់តែប្រសើរឡើង ស្របតាមតម្រូវការពិតប្រាកដនៅមូលដ្ឋាន៕