(តូក្យូ)៖ ក្នុងឱកាសនៃការបំពេញបេសកកម្មគោះទ្វារទាក់ទាញនិងជំរុញវិនិយោគ នៅលើទឹកដីនៃប្រទេសជប៉ុន, លោក ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា (ក.អ.ក.) នារសៀលថ្ងៃអង្គារ ទី៩ ខែមិថុនា ឆ្នាំ២០២៦ (ម៉ោងក្នុងតំបន់) បានដឹកនាំគណៈប្រតិភូកម្ពុជា ចូលរួមកិច្ចពិភាក្សាការងារតុមូលកម្រិតខ្ពស់ កម្ពុជា-ជប៉ុន ក្រោមមូលបទ៖ «ឆ្ពោះទៅរកការវិនិយោគ និងភាពជាដៃគូយុទ្ធសាស្ត្រ»។

កិច្ចពិភាក្សានេះត្រូវបានសហការរៀបចំដោយ ក.អ.ក. រួមជាមួយមជ្ឈមណ្ឌលអាស៊ាន-ជប៉ុន (AJC) និងអង្គការពាណិជ្ជកម្មក្រៅប្រទេសជប៉ុន (JETRO) ដោយមានការចូលរួមផ្ទាល់ពីថ្នាក់ដឹកនាំជាន់ខ្ពស់ និងតំណាងក្រុមហ៊ុនជប៉ុនធំៗដែលមានសក្តានុពលខ្ពស់ ចំនួន ១១ ស្ថាប័ន។

កិច្ចពិភាក្សាត្រូវបានរៀបចំឡើងក្នុងទម្រង់ជាវេទិកាពិភាក្សាជាក់ស្តែង ក្នុងគោលបំណងដើម្បីផ្លាស់ប្តូរទស្សនៈគ្នាយ៉ាងស៊ីជម្រៅ ចំគោលដៅ និងទៅវិញទៅមក ដោយផ្អែកលើធាតុចូល និងចំណុចសក្តានុពលគន្លឹះរបស់ក្រុមហ៊ុនចូលរួមនីមួយៗ រួមមាន៖ (១) ផែនការជាក់ស្តែងក្នុងការចូលមកកាន់ទីផ្សារ និងការបណ្តាក់ទុននៅកម្ពុជា, (២) យុទ្ធសាស្ត្រអភិវឌ្ឍន៍ធុរកិច្ចរយៈពេលវែង, (៣) ចំណាប់អារម្មណ៍លើការវិនិយោគក្នុងវិស័យអាទិភាព និង (៤) លទ្ធភាពនិងចក្ខុវិស័យក្នុងការពង្រីកប្រតិបត្តិការអាជីវកម្មដែលកំពុងមានស្រាប់ ឱ្យកាន់តែរីកចម្រើនខ្លាំងក្លាថែមទៀត។

តាមរយៈកិច្ចពិភាក្សាការងារតុមូលកម្រិតខ្ពស់នេះ ក្រុមហ៊ុនដែលបានចូលរួមទទួលបានឱកាសក្នុងការធ្វើបទបង្ហាញសង្ខេបអំពី វិស័យដែលខ្លួនចាប់អារម្មណ៍ សកម្មភាពធុរកិច្ចរំពឹងទុកនាពេលអនាគត ព្រមទាំងបញ្ហាគន្លឹះ ឬការពិចារណានានា ដែលពាក់ព័ន្ធនឹងការវិនិយោគ និងការអនុវត្តគម្រោង។ ជាមួយគ្នានេះ ក.អ.ក. នឹងផ្តល់ជូននូវព័ត៌មានជាក់លាក់ ស្របតាមតម្រូវការរបស់ក្រុមហ៊ុននីមួយៗ ព្រមទាំងការគាំទ្រផ្នែកប្រឹក្សាយោបល់ប្រកបដោយភាពកក់ក្តៅ ដើម្បីសម្របសម្រួលបង្កលក្ខណៈងាយស្រួល និងធានាដល់ភាពជោគជ័យចំពោះការចូលមកកាន់ទីផ្សារ ក៏ដូចជាការពង្រីកទុនវិនិយោគរបស់ក្រុមហ៊ុនជប៉ុនទាំងអស់ នៅក្នុងប្រទេសកម្ពុជាផងដែរ។

បន្ទាប់ពី កិច្ចពិភាក្សាការងារតុមូលកម្រិតខ្ពស់នេះ តំណាងវិស័យឯកជននៃប្រទេសជប៉ុន និងតំណាងវិស័យឯកជនពីកម្ពុជា ក៏ទទួលបាននូវឱកាស ជួបគ្នាបង្កើតបណ្តាញទំនាក់ទំនងធុរកិច្ច (Business Networking) យ៉ាងជិតស្និទ្ធ និងស៊ីជម្រៅ រវាង ដើម្បីផ្លាស់ប្តូរព័ត៌មាន ស្វែងយល់ពីសក្តានុពលវិនិយោគទៅវិញទៅមក ក៏ដូចជាការស្វែងរកកាលានុវត្តភាពក្នុងការចាប់ដៃគូសហការធុរកិច្ចរួមគ្នា សំដៅពង្រីកទំហំពាណិជ្ជកម្ម និងការវិនិយោគឯកជនប្រទេសទាំងពីរឱ្យកាន់តែរីកចម្រើនខ្លាំងក្លាបន្ថែមទៀត៕