(ភ្នំពេញ)៖ លោក កែវ បេងវឌ្ឍន៍ ប្រតិភូរាជរដ្ឋាភិបាល ទទួលបន្ទុកជាអគ្គនាយក នៃ​អគ្គនាយកដ្ឋានហិរញ្ញវត្ថុរដ្ឋបាលថ្នាក់ក្រោមជាតិ ក្រសួងសេដ្ឋកិច្ចនិងហិរញ្ញវត្ថុ និងជាអនុប្រធាន​ក្រុម​ការងាររាជរដ្ឋាភិបាលចុះមូលដ្ឋានស្រុកពញាឮ, ប្រធានក្រុម​ការងារ​ទទួលបន្ទុកឃុំភ្នំបាត ឃុំផ្សារដែក និង​ឃុំវិហារលួង អមដោយសហការី នៅថ្ងៃទី១០ ខែមិថុនា ឆ្នាំ២០២៦ បាននាំយកថវិកា គ្រឿងឧបភោគ-បរិភោគ ដែលជាអំណោយរបស់អគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រី​ក្រសួង​សេដ្ឋកិច្ច និងហិរញ្ញវត្ងុ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តកណ្តាល និងលោកស្រី ផ្តល់ជូនក្រុមគ្រួសារវីរៈកងទ័ពជួរមុខ ចំនួនគ្រួសារ ១១១គ្រួសារ ដែលកំពុងរស់នៅឃុំភ្នំបាត ឃុំផ្សារដែក និងឃុំវិហារលួង។

ក្នុងឱកាសនោះ លោក កែវ បេងវឌ្ឍន៍ បាននាំនូវការផ្តាំផ្ញើសួរសុខទុក្ខ ពីសំណាក់សម្តេចតេជោ ហ៊ុន សែន ប្រមុខរដ្ឋស្តីទី និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា។ សម្តេចទាំងពីរ​តែងតែគិតគូរអំពីសុខទុក្ខ របស់ប្រជាពលរដ្ឋគ្រប់ស្រទាប់វណ្ណៈ ដោយមិនប្រកាន់ពូជសាសន៍ ឬបក្សពួកនិយមអ្វីឡើយ។ សម្តេចតែងតែព្រួយបារម្ភ​ ពីទុក្ខលំបាករបស់ក្រុមគ្រួសារវិរ:កងទ័ពជួរមុខ ដែលបានលះបង់គ្រប់បែបយ៉ាង ដើម្បីការពារទឹកដី ពីការឈ្លានពានប្រទេសសៀម។

ដោយឡែក អគ្គបណ្ឌិតសភាចារ្យ អូន ព័ន្ធមុនីរ័ត្ន ក៏បានគិតគូរយ៉ាងម្មត់ចត់ទៅលើទុក្ខលំបាក និងបាននាំយកអំណោយជូនដល់ក្រុមគ្រួសារវិរ:កងទ័ពជួរមុខនៅពេលនេះ។

ទន្ទឹមនេះលោក កែវ បេងវឌ្ឍន៍ ក៏បានអំពាវនាវសូមឲ្យប្រជាពលរដ្ឋនៅគ្រប់ទិសទី បន្តសាមគ្គីជាមួយរាជរដ្ឋាភិបាលកម្ពុជា ក្នុងស្មារតីស្នេហាជាតិ និងចេះជួយគ្នាក្នុងគ្រាដែលប្រទេសជាតិ កំពុងជួបទុក្ខលំបាក​ រួបរួមគ្នាក្នុងស្មារតីខ្មែរតែមួយ ខ្មែរស្រឡាញ់ខ្មែរ។

​លោកបានថ្លែងអំណរគុណយ៉ាងជ្រាលជ្រៅ និងផ្តាំផ្ញើចំពោះអាជ្ញាធរមូលដ្ឋាន ដែលសហការគ្នាបានយ៉ាងល្អ ក្នុងការជួយដោះស្រាយក្នុងគ្រាលំបាក ជូនដល់ក្រុមគ្រួសារវិរ:កងទ័ពទាំងអស់បានទាន់ពេលវេលា។

សម្រាប់អំណោយត្រូវចែកជូន១១១ គ្រួសារដែលមកពីឃុំចំនួន៣ គឺ ឃុំភ្នំបាតចំនួន ៤៤ គ្រួសារ, ឃុំផ្សារដែកចំនួន ២៣ គ្រួសារ និងឃុំវិហារលួងចំនួន ៤៤ គ្រួសារ។ ដោយក្នុង ១គ្រួសារយុទ្ធជនជួរមុខទទួលបានថវិកាឧបត្ថម្ភចំនួន ២០០ ០០០ រៀល និងសម្ភារៈគ្រឿងឧបភោគបរិភោគមាន៖ អង្ករចំនួន ៥០ គីឡូក្រាម, ទឹកស៊ីអ៊ីវ ២ យួរ (១២ដប), ត្រីខចំនួន ៣០ កំប៉ុង និងសាច់ក្រកចំនួន ២ គីឡូក្រាម៕