(ភ្នំពេញ)៖ លោក ប៊ូ ច័ន្ទភីរូ អគ្គនាយកនៃនិយ័តករធានារ៉ាប់រងកម្ពុជា បានបញ្ជាក់ឲ្យដឹងថា បច្ចុប្បន្ននេះ វិស័យធានារ៉ាប់រង មានអ្នកបម្រើការងារពេញម៉ោងជាង ៤៥០០នាក់ និងអ្នកបម្រើការងារក្រៅម៉ោង ប្រមាណជាង១ម៉ឺននាក់ ស្របពេលវិស័យនេះ មានការរីកចម្រើនជាបន្តបន្ទាប់ និងបានចូលរួមចំណែកក្នុងសេដ្ឋកិច្ចជាតិកាន់តែធំ។

ការបញ្ជាក់ឲ្យដឹងបែបនេះ ធ្វើឡើងក្នុងឱកាសដែល លោក ប៊ូ ច័ន្ទភីរូ អញ្ជើញចូលរួមក្នុងពិធីចុះអនុស្សរណៈនៃការយោគយល់គ្នា រវាងនិយ័តករធានារ៉ាប់រងកម្ពុជា និងសាកលវិទ្យាល័យប្រៀលប្រាយ នាព្រឹកថ្ងៃទី១០ ខែមិថុនា ឆ្នាំ២០២៦។

លោក ប៊ូ ច័ន្ទភីរូ បានបញ្ជាក់ថា ពិធីនេះ រៀបចំឡើងក្នុងគោលបំណង ជំរុញការកសាងធនធានមនុស្ស ដើម្បីអភិវឌ្ឍវិស័យធានារ៉ាប់រង ប្រកបដោយចីរភាព តាមរយៈការបង្កើន សមត្ថភាពនិស្សិត និងលើកកម្ពស់ការយល់ដឹង ស្តីពីការធានារ៉ាប់រងជាមូលដ្ឋាន ដែលអនុញ្ញាតឱ្យនិស្សិតត្រៀមខ្លួនរួចរាល់ ក្នុងការចាប់យកឱកាសការងារ ក្នុងវិស័យធានារ៉ាប់រង ដែលកំពុងមានសក្តានុពល។

បន្ថែមពីនោះទៀត លោក ប៊ូ ច័ន្ទភីរូ បានឲ្យដឹងថា នេះគឺជាសកលវិទ្យាល័យទី៣ហើយ ដែលនិយ័តករ បានចាប់ដៃគូ ដើម្បីជំរុញការបណ្តុះបណ្តាលធនធានមនុស្ស ក្នុងវិស័យធានារ៉ាប់រង និងឈានទៅកាត់បន្ថយ ការប្រើប្រាស់បុគ្គលិកបរទេសក្នុងវិស័យនេះ។

លោក ប៊ូ ច័ន្ទភីរូ បានលើកឡើងថា ការធានារ៉ាប់រង គឺជាឧបករណ៍ហិរញ្ញវត្ថុដ៏មានឥទ្ធិពល ក្នុងការជំរុញដំណើរការសេដ្ឋកិច្ចជួយសង្គម ក្នុងការរក្សាសុវត្ថិភាពហិរញ្ញវត្ថុ និងជំរុញស្ថិរភាពហិរញ្ញវត្ថុរយៈពេលវែង។ ទីផ្សារធានារ៉ាប់រងកម្ពុជា គឺជាទីផ្សារមួយ ដែលកំពុងមានការវិវត្តន៍ឆ្ពោះ ទៅមុខយ៉ាងឆាប់រហ័ស គួរឱ្យកត់សម្គាល់ពីមួយឆ្នាំទៅមួយឆ្នាំ។

បើតាមអគ្គនាយក នៃនិយ័តករធានារ៉ាប់រងកម្ពុជា, គិតត្រឹមឆ្នាំ២០២៥ ក្រុមហ៊ុនធានា រ៉ាប់រងមានវត្តមាន សរុបចំនួន៣៩ក្រុមហ៊ុន និងក្រុមហ៊ុនអន្តរការីធានារ៉ាប់រងចំនួន៦៥ក្រុមហ៊ុន ដែលកំពុងមានប្រតិបត្តិការ នៅកម្ពុជា ការណ៍នេះ បានបង្ហាញថា តម្រូវការទីផ្សារការងារ ក្នុងវិស័យធានារ៉ាប់រងនៅកម្ពុជា កំពុងមានការកើនឡើងជាបន្តបន្ទាប់។

លើសពីនេះ ទីផ្សារធានារ៉ាប់រងសម្រេច បានបុព្វលាភធានារ៉ាប់រងដុលប្រមាណ៣៦៧លានដុល្លារអាម៉េរិក ដែលមាន កំណើនប្រមាណ២.៨% ធៀបនឹងឆ្នាំ២០២៤។

អត្រាភាគទានធានារ៉ាប់រង ក្នុងសេដ្ឋកិច្ចសម្រេច បាន១.១១% ខណៈដង់ស៊ីតេធានារ៉ាប់រង ២០.៩៥ដុល្លារអាម៉េរិក សម្រាប់មនុស្សម្នាក់។ ទោះជាយ៉ាងនេះក្តី បើធៀបទៅនឹងប្រទេសក្នុងតំបន់ និងលើសកលលោក ទំហំទីផ្សារធានារ៉ាប់រងកម្ពុជានៅ មានកម្រិតទាប ដែលបង្ហាញនូវសក្តានុពលធំធេង សម្រាប់ការអភិវឌ្ឍនាពេលខាងមុខ។

មិនត្រឹមតែប៉ុណ្ណោះ វិស័យធានារ៉ាប់រងកម្ពុជា មានចំណុចខ្វះខាត និងបញ្ហាប្រឈមមួយចំនួនរួមមាន៖ កង្វះ ការយល់ដឹងរបស់សាធារណជន អំពីអត្ថប្រយោជន៍ នៃការធានារ៉ាប់រង និងកង្វះមូលធនមនុស្ស ក្នុងវិស័យធានារ៉ាប់រង ដែលការណ៍នេះ ទាមទារឱ្យមានកិច្ចសហប្រតិបត្តិការ ជាមួយស្ថាប័នពាក់ព័ន្ធ ពិសេសគ្រឹះស្ថានឧត្តមសិក្សា៕