(រតនគិរី)៖ ពិធីគោរពវិញ្ញាណក្ខន្ធ​ និងធ្វើមាតុភូមិនិវត្ដ​ នៃអដិ្ឋធាតុកងទ័ព និងជំនាញការវៀត​ណាម ចំនួន៨ ត្រូវបានគណៈកម្មការរុករកគាស់​លើក​អដ្ឋិធាតុ​ខេត្ដរតនគិរី នៃព្រះរាជាណាចក្រកម្ពុជា និងខេត្តហ្សាឡាយ នៃសាធារណរដ្ឋសង្គមនិយមវៀតណាម រៀបចំធ្វើឡើងនៅបរិវេណស្តូបអនុស្សាវរីយ៍មិត្តភាព កម្ពុជា-វៀតណាម ស្ថិតនៅសង្កាត់ បឹងកន្សែង ក្រុងបានលុង ខេត្តរតនគិរី នារសៀលថ្ងៃទី១០ ខែមិថុនា ឆ្នាំ២០២៦ ក្រោមវត្តមមានលោកម៉ា វិចិត្រ អភិបាលរងខេត្ដ ​និងជាប្រធាន​គណៈកម្មការរុករកគាស់​លើក​អដ្ឋិធាតុ​ខេត្តរតនគិរី និងលោកស្រីង្វៀង ធីថាញ់លីច អនុប្រធាន​គណៈកម្មាធិការប្រជាជនខេត្ត និងជា​ប្រធាន​គណៈ​កម្មការ​រុករកអដ្ឋិធាតុខេត្ដហ្សាឡាយ ។

ថ្លែងក្នុងពិធីនេះលោក ម៉ា វិចិត្រ ក្នុងនាមថ្នាក់ដឹកនាំខេត្ដ មន្ដ្រីរាជការ កងកម្លាំង​ប្រដាប់​អាវុ​ធ និង​ប្រជាពលរដ្ឋទូទាំងខេត្ដរតនគិរី សូមសម្តែងនូវការដឹងគុណ និងស្មារតីចងចាំជានិច្ច​​គ្មានថ្ងៃ​បំភ្លេច​​​បាន​នូវគុណូបការៈដ៏ឧត្តុង្គឧត្តមរបស់វីរកងទ័ពស្ម័គ្រចិត្ដ និងជំនាញការវៀតណាម ដែលបានបូជា​សាច់ស្រស់ ឈាមស្រស់ក្នុងការប្រយុទ្ធ ដើម្បីផ្តួលរំលំរបបប្រល័យពូជសាសន៍ ប៉ុល ពត និងការពារការរស់ឡើងវិញ របស់ជាតិ និងប្រជាជនកម្ពុជា​។​

ព្រមជាមួយនេះ លោកសូមលំឱនកាយ សង្រួមចិត្តគោរព​វិញ្ញាណក្ខន្ធដល់កងទ័ពដែលបានបាត់បង់ជីវិត ហើយសូម​ឧទ្ទិស​បួងសួងឱ្យដួងវិញ្ញាណក្ខន្ធរបស់​កងទ័ព​ស្ម័គ្រ​ចិត្ដ និងជំនាញការវៀតណាម​ ដែលមាន​អដ្ឋិធាតុ​ជួបជុំនៅ​ទី​នេះ ពេល​នេះ សូមបន្ដស្ថិតនៅ​ក្នុង​ឋានសុគតិភព និងធ្វើមាតុភូមិនិវត្ដន៍ដោយមង្គល ដើម្បីបានជួបជុំ​គ្រួសារ​ សាច់​ញា​​តិ​ បងប្អូនរបស់ខ្លួន​កុំបីឃ្លៀងឃ្លាតឡើយ៕