(ភ្នំពេញ)៖ គណៈបញ្ជាការឯកភាពខណ្ឌ៧មករា នៅថ្ងៃទី១០ ខែមិថុនា ឆ្នាំ២០២៦នេះ បានចុះត្រួតពិនិត្យទីតាំងសណ្ឋាគាររីលែក្ស(Relax) ស្ថិតផ្លូវ១២៥ ភូមិ៩ សង្កាត់ វាលវង់ ខណ្ឌ៧មករា ដោយបសនរកឃើញជនបរទេសស្នាក់ចំនួន០៦ នាក់ ដែលជនជាតិឥណ្ឌូនេស៊ី ពាក់ព័ន្ធបទល្មើសល្បែងស៊ីសងតាមប្រព័ន្ធអនឡាញខុសច្បាប់។

ការចុះត្រួតពិនិត្យនេះ ធ្វើឡើង ក្រោមការដឹកនាំ និងបញ្ជាផ្ទាល់ពីលោក ឃួង ស្រេង អភិបាល នៃគណៈអភិបាលរាជធានីភ្នំពេញ និងជាប្រធានគណៈបញ្ជាការឯកភាពរដ្ឋបាលរាជធានីភ្នំពេញ ដោយលោក ថេង សុថុល អភិបាលខណ្ឌ៧មករា បានបន្តដឹកនាំកម្លាំងគណៈបញ្ជាការឯកភាពរដ្ឋបាលខណ្ឌ ចុះត្រួតពិនិត្យការគ្រប់គ្រង ការស្នាក់នៅប្រមូលផ្ដុំ របស់ជនបរទេស ស្របតាមអនុក្រឹត្យលេខ០៣ នៅតាមសណ្ឋាគារ ខុនដូរ ផ្ទះសំណាក់ សហគ្រាស និងខ្នងផ្ទះនានា ពិសេស គឺឈានទៅបង្រ្កាបបទល្មើសឆបោកតាមប្រព័ន្ធបច្ចេកវិទ្យា (Online Scams) នៅក្នុងមូលដ្ឋានខណ្ឌ៧មករា ។

ក្នុងការចុះត្រួពិនិត្យនេះ កម្លាំងអាជ្ញាធរបានរកឃើញ ឧបករណ៍អេឡិចត្រូនិចមួយចំនួន ដូចជា៖ ម៉ូនីទ័រចំនួន មួយគ្រឿង, Leptop ០៤គ្រឿង, ទូរស័ព្ទដៃបំរើការ ចំនួន៣៤គ្រឿង ក្នុងនោះ ក្រុមការងារជំនាញការិយាល័យប្រឆាំងបទល្មើសបច្ចេកវិទ្យា បានសន្និដ្ឋានថា ជាល្បែងស៊ីសងអនឡាញខុសច្បាប់ មិនពាក់ព័ន្ធការឆបោកតាមប្រព័ន្ធបច្ចេកវិទ្យាទេ។

ក្រោយបញ្ចប់ត្រួតពិនិត្យ ជនបរទេសទាំង០៦នាក់ និងសម្ភារៈ ត្រូវបានបញ្ជូនទៅអធិការដ្ឋាននគរបាលខណ្ឌ៧មករា ដើម្បីកសាងសំណុំរឿង អនុវត្តតាមនិតិវិធីច្បាប់៕