(ភ្នំពេញ)៖ បន្ទាប់ពីការប្រគំតន្ត្រីសប្បុរសធម៌ «Carnegie in Cambodia» កាលពីថ្ងៃទី៤ ខែមេសា ឆ្នាំ២០២៦កន្លងទៅ នឹងទទួលបានការគាំទ្រយ៉ាងខ្លាំងហើយនោះ, ស្ថាបនិកសិល្បៈទស្សនីយភាព Etoile( Etoile Performing Arts) បានប្រគល់ថវិកាដែលប្រមូល​បានពីការលក់សំបុត្រនៃការប្រគំតន្ត្រីនេះចំនួន ២០,០០០ដុល្លារអាមេរិក ជូនដល់គ្រឹះស្ថានអប់រំ និងបណ្តុះបណ្តាលវិជ្ជាជីវៈនៅកម្ពុជា និងអង្គការក្រៅរដ្ឋាភិបាលអន្តរជាតិ ដើម្បីឧបត្ថម្ភអាហារូបករណ៍ដល់សិស្សានុសិស្សខ្វះខាត និងបំពាក់បំប៉នយុវជនក្រីក្រនូវជំនាញជាក់ស្តែង និងលទ្ធភាពទទួលបានការអប់រំ ដែលតម្រូវសម្រាប់ការកសាងអនាគតដ៏ភ្លឺស្វាង និងអាចពឹងផ្អែកលើខ្លួនឯងបាន។

ពិធីប្រគល់ថវិកានេះបានធ្វើឡើងនាល្ងាច​ថ្ងៃទី១០ ខែមិថុនា ឆ្នាំ២០២៦នេះ នៅសាលាអន្តរជាតិ​កាណាដាភ្នំពេញ ក្រោមអធិបតីភាពលោកបណ្ឌិត​សភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា និងមានការចូលរួមពីកញ្ញា Anna Sophie Abe ស្ថាបនិកសិល្បៈទស្សនីយភាព Etoile (Etoile Performing Arts), តំណាងអង្គការក្រៅរដ្ឋាភិបាលអន្តរជាតិ «Il Nodo» រួមទាំងមានអ្នកពាក់ព័ន្ធជាច្រើនរូបទៀត។

បើតាម Etoile Performing Arts តាមរយៈមូលនិធិ​អាហារូបករណ៍ Etoile ដែលទើបបង្កើតឡើងថ្មី ថវិកាទាំងនេះនឹងផ្តល់ផលប្រយោជន៍ដោយផ្ទាល់ដល់ «សាលាមធ្យមសិក្សានិងវិទ្យាល័យមិត្តភាពកម្ពុជា-ជប៉ុន» ដើម្បីជាអាហារូបករណ៍ដល់សិស្សានុសិស្ស ក៏ដូចជា អង្គការក្រៅរដ្ឋាភិបាលអន្តរជាតិ «Il Nodo» ដើម្បីគាំទ្រដល់កម្មវិធីបណ្តុះបណ្តាលវិជ្ជាជីវៈដ៏សំខាន់ៗផងដែរ។ ធនធានទាំងនេះត្រូវបានរៀបចំឡើង ដើម្បីបំពាក់បំប៉នយុវជនដែលខ្វះខាតនូវជំនាញជាក់ស្តែង និងលទ្ធភាពទទួលបានការអប់រំ ដែលតម្រូវសម្រាប់ការកសាងអនាគតដ៏ភ្លឺស្វាង និងអាចពឹងផ្អែកលើខ្លួនឯងបាន។

ក្នុងនាមជាការទទួលស្គាល់យ៉ាងសំខាន់លើសកម្មភាពសប្បុរសធម៌ដឹកនាំដោយយុវជន លោកឧបនាយករដ្ឋមន្ត្រី ហង់ជួន ណារ៉ុន បានប្រគល់ប័ណ្ណសរសើរជាផ្លូវការជូនដល់កញ្ញា Anna Sophie Abe ស្ថាបនិកសិល្បៈទស្សនីយភាព Etoile ចំពោះការរួមចំណែកដ៏លេចធ្លោ និងការប្តេជ្ញាចិត្តយ៉ាងមុតមាំក្នុងការជួយគាំទ្រយុវជន និងកុមារកម្ពុជា តាមរយៈសិល្បៈតន្ត្រី និងការអប់រំ។

លោកឧបនាយករដ្ឋមន្ត្រី ហង់ជួន ណារ៉ុន បានថ្លែងកោតសរសើរចំពោះការដឹកនាំរបស់កញ្ញា Anna Sophie ដែលបានប្រមូលផ្តុំនូវ​ទេពកោសល្យតន្ត្រីកម្រិតខ្ពស់ទាំងក្នុងប្រទេស និងអន្តរជាតិ ព្រមទាំងម្ចាស់ឧបត្ថម្ភ​ដែលមាន​ចិត្តសប្បុរស និងអ្នកស្ម័គ្រចិត្តដែលពោរពេញ​ដោយការលះបង់ ហើយដែលនេះ គឺជាការឆ្លុះបញ្ចាំងដ៏ល្អឥតខ្ចោះ​អំពីរបៀបដែលគំនិតរបស់សិស្សម្នាក់ អាចនាំសហគមន៍ទាំងមូលមកជួបជុំគ្នា និងរួមចំណែកដល់ការអប់រំសម្រាប់យុវជនជំនាន់ក្រោយរបស់យើង។

នាឱកាសនោះដែរកញ្ញា Anna Sophie Abe បានបញ្ជាក់ដែរថា រាត្រីតន្ត្រីមួយនេះ បានប្រែក្លាយទៅជាការប្តេជ្ញាចិត្តដ៏យូរអង្វែងសម្រាប់យុវជនជំនាន់ក្រោយរបស់ប្រទេសកម្ពុជា។ យើងមានកិត្តិយសយ៉ាងក្រៃលែងចំពោះការទទួលស្គាល់ពីលោកឧបនាយករដ្ឋមន្ត្រី ហើយយើងនៅតែប្តេជ្ញាចិត្តក្នុងការធានាថា តន្ត្រី និងសិល្បៈបន្តបើកទ្វារនៃឱកាស និងក្តីសង្ឃឹមសម្រាប់យុវជន និងកុមារនៅទូទាំងប្រទេសកម្ពុជា។

កញ្ញា Anna Sophie Abe បានបន្ថែមថា ឆ្ពោះទៅមុខ Etoile Performing Arts មានគម្រោងពង្រីក​ការផ្សព្វផ្សាយផ្នែកអប់រំរបស់ខ្លួន ដោយបង្កើតឡើង​នូវក្របខ័ណ្ឌប្រកបដោយនិរន្តរភាព ដែលធានា​នូវការអភិវឌ្ឍផ្នែកសិល្បៈ និងសិក្សាធិការរយៈពេលវែង​សម្រាប់អ្នកដឹកនាំនាពេលអនាគតរបស់ប្រទេស៕