ក្រោម ស្មារតី មនុស្ស ធ ម៌! ឧត្តមសេនីយ៍ ត្រី ម៉េ ង ស្រ៊ុន មេបញ្ជាការអាវុធហត្ថខេត្តកំពង់ស្ពឺ បរិច្ចាគ ថវិកា ឧបត្ថម្ភ ដល់ពលរដ្ឋរងគ្រោះអគ្គិភ័យឆេះផ្ទះ ១គ្រួសារ និង ពល រដ្ឋ មាន ជីវភាព ខ្វះខាត ចាស់ជរា ៣គ្រួសារ នៅស្រុកភ្នំស្រួច
11-06-2026 10:26
(កំពង់ស្ពឺ)៖ ក្រោមស្មារតីមនុស្សធម៌! លោកឧត្តមសេនីយ៍ត្រី ម៉េង ស្រ៊ុន មេបញ្ជាការ កងរាជអាវុធហត្ថខេត្តកំពង់ស្ពឺ បានអញ្ជើញដឹកនាំក្រុមការងារកងរាជអាវុធហត្ថខេត្តកំពង់ស្ពឺ និងមានការចូលរួមពីក្រុមការងារសហភាពសហព័ន្ធយុវជនកម្ពុជាខេត្ត ក្រុមការងារកាកបាទក្រហមសាខាខេត្តកំពង់ស្ពឺ នាថ្ងៃទី១០ ខែមិថុនា ឆ្នាំ២០២៦ បន្តចុះសួរសុខទុក្ខប្រជាពលរដ្ឋដែលត្រូវបានអគ្គិភ័យឆាបឆេះផ្ទះសំបែងអស់ ១គ្រួសារ និងប្រជាពលរដ្ឋមានជីវភាពខ្វះខាត ជនចាស់ជរា ព្រមទាំងមានជំងឺប្រចាំកាយចំនួន ៣គ្រួសារបន្ថែមទៀត ស្ថិតក្នុងភូមិស្លែង ឃុំមហាសាំង ស្រុកភ្នំស្រួច ខេត្តកំពង់ស្ពឺ។
គ្រួសារដែលត្រូវបានអគ្គិភ័យឆាបឆេះផ្ទះសំបែងមានឈ្មោះ ហ៉ឺ ប៊ុនសៀង ភេទប្រុស អាយុ៥៨ឆ្នាំ និងមានប្រពន្ធឈ្មោះ អ៉ី ងួន អាយុ៥២ឆ្នាំ ដោយបច្ចុប្បន្នរស់នៅក្នុងភូមិស្លែង ឃុំមហាសាំង ស្រុកភ្នំស្រួច ខេត្តកំពង់ស្ពឺ។ ពិតជាដូចពាក្យចាស់លោកពោលថា «ស៊ូលិចទូកកណ្តាលទន្លេ កុំអោយតែភ្លើងឆេះផ្ទះ» គឺឆេះគ្មានសល់អ្វីទេ ទ្រព្យសម្បត្តិ សម្ភារៈផ្សេងៗ និងវត្ថុមានតម្លៃ ដែលបានខិតខំប្រឹងប្រែងរកទាំងក្តីលំបាក កើតចេញមកពីញើសឈាម ត្រូវបានរលាយក្លាយជាផេះ គ្មានសល់ត្រឹមតែមួយពព្រិចភ្នែកប៉ុណ្ណោះ។
ក្នុងពេលសួរសុខទុក្ខនោះដែរ ឧត្តមសេនីយ៍ត្រី ម៉េង ស្រ៊ុន រួមជាមួយនឹងក្រុមការងារអមដំណើរជាមួយបានសំណេះសំណាលជាមួយក្រុមគ្រួសារគាត់ដោយក្តីអាណិតអាសូរពន់ពេក ក្រោមស្មារតីមនុស្សធម៌ ខ្មែរស្រលាញ់ ជួយគ្នាក្នុងគ្រាលំបាក លោកឧត្តមសេនីយ៍ត្រី មេបញ្ជាការ បានឧបត្ថម្ភជាថវិការមួយចំនួន ៣០០ ០០០រៀល និងសម្ភារៈមួយចំនួន ព្រមទាំងគ្រឿងឧបភោគបរិភោគរួមមាន៖ អង្ក ១បាវ ៥០គីឡូក្រាម, មី ២កេស,ទឹកសុទ្ធ ២កេស, ភេសជ្ជៈ ២កេស, ទឹកត្រី ២យួរ, ទឹកស៉ីអ៉ីវ ២យួរ, ត្រីខ ២យួរ, ភួយ ៣, ខ្នើយ៣ និងកន្ទេលចំនួនថែមទៀតផង។
ឆ្លៀតក្នុងឱកាសនោះ ឧត្តមសេនីយ៍ត្រី ម៉េង ស្រ៊ុន ដោយមើលឃើញជាក់ស្តែងពីការលំបាកក្នុងជីវភាពរស់នៅប្រចាំថ្ងៃរបស់ប្រជាពលរដ្ឋ ព្រមទាំងចាស់ជរាចំនួន ០៣គ្រួសារ ដែលគ្រួសារទី១ ចាស់ជរាឧបត្ថម្ភថវិកាចំនួន៤០,០០០រៀល, គ្រួសារទី២ មានកើតជំងឺពកក ឧបត្ថម្ភថវិកាចំនួន ២០០,០០០រៀល និងគ្រួសារទី៣ មានជីវភាពក្រីក្រខ្វះខាតឧបត្ថម្ភថវិកាចំនួន១០០,០០០រៀល សរុបជាថវិកាទាំងអស់រួមនិងសម្ភារៈចាំបាច់មួយចំនួន ព្រមទាំងគ្រឿងឧបភោគបរិភោគអស់ចំនួន ១,២៨០ ០០០រៀលផងដែរ៕
គួររំលឹកផងដែរថា ឧត្តមសេនីយត្រី ម៉េង ស្រ៊ុន តែងតែបរិច្ចាកនូវថវិការផ្ទាល់ខ្លួន និងធ្វើការចែករំលែកស្បៀងអាហារ សម្លៀកបំពាក់ ធ្វើទីជម្រកសម្រម និងសម្ភារៈប្រើប្រាស់ចាំបាច់ផ្សេងៗ ដល់ប្រជាពលរដ្ឋគ្រួសារណាដែលមានជីវភាពខ្វះខាត និងជួបការលំបាកខ្លាំងក្នុងជីវភាពរស់នៅប្រចាំថ្ងៃក្នុងមូលដ្ឋានខេត្តកំពង់ស្ពឺ និងក្នុងមូលដ្ឋានតាមបញ្តាខេត្តផ្សេងៗទៀតផង។ ដោយក្នុងសកម្មភាពមនុស្សធម៌ដ៏ឧត្តុង្គឧត្តមបានបង្ហាញពីក្តីមេត្តាករុណា និងសាមគ្គីភាពក្នុងសង្គម ពិសេសបានបណ្តុះស្មារតីសាមគ្គីភាព និងសេចក្តីស្រឡាញ់រវាងមនុស្សជាតិថែមទៀតផង៕
