(បន្ទាយមានជ័យ)៖ នៅវេលាម៉ោង ១៦៖០០នាទី ថ្ងៃទី៥ ខែមិថុនា ឆ្នាំ២០២៦ នៅមូលដ្ឋានកងរាជអាវុធហត្ថក្រុងប៉ោយប៉ែត បានទទួលពាក្យបណ្ដឹងពីលោក ផា សីហា អាយុ៣៥ឆ្នាំ មានទីលំនៅភូមិបាលិលេយ្យ២ សង្កាត់ប៉ោយប៉ែត ពាក់ព័ន្ធករណីបាត់ម៉ូតូ (ម៉ូតូម៉ាកYAMAHA NMAX ផលិតឆ្នាំ២០២២ ពណ៌ក្រហម លេខតួ-លេខម៉ាស៉ីន 571111018689 គ្មានផ្លាកលេខ) កាលពីវេលាម៉ោង ០៨៖០០នាទី ថ្ងៃទី០១ ខែមិថុនា ឆ្នាំ២០២៦ នៅភូមិផ្សារកណ្ដាល។

ក្រោយពីទទួលបានពាក្យបណ្ដឹងពីជនរងគ្រោះ កម្លាំងបានចុះធ្វើការស្រាវជ្រាវតាមរយៈ GPS របស់ម៉ូតូ ប៉ុន្តែសញ្ញា GPS រអាក់រអួលមិនច្បាស់លាស់ លុះនៅវេលាម៉ោង ១៥៖៣០នាទី ថ្ងៃទី១០ ខែមិថុនា ឆ្នាំ២០២៦ GPS ម៉ូតូជនរងគ្រោះបានលោតម្ដងទៀត នៅចំណុចខាងក្រោយវត្តផ្សារកណ្ដាល ស្ថិតក្នុងភូមិផ្សារកណ្ដាល សង្កាត់ផ្សារកណ្ដាល ក្រុងប៉ោយប៉ែត ពេលនោះកម្លាំងបានបន្តស្រាវជ្រាវរហូតឃើញសញ្ញា GPS លោតក្នុងផ្ទះថ្ម ប្រក់ស័ង្កសីមួយខ្នង មានចាក់សោរបិទជិត ស្ថិតក្នុងភូមិផ្សារកណ្ដាល លឺសំឡេងទីតៗក្នុងផ្ទះផង (សំឡេងរោទិ៍ GPS)។

ដោយមានការសង្ស័យ កម្លាំងបានមើលតាមប្រហោងទ្វារផ្នែកខាងលើ ប្រទះឃើញមានម៉ូតូជាច្រើនគ្រឿងនៅក្នុងផ្ទះនោះ បន្ទាប់មកបានរាយការណ៍ជូនលោកឧត្ដមសេនីយ៍ត្រី បោន ប៊ិន មេបញ្ជាការ កងរាជអាវុធហត្ថខេត្តបន្ទាយមានជ័យ និងមានការសម្របសម្រួលនីតិវិធីពីលោក កើត វណ្ណារ៉េត ព្រះរាជអាជ្ញាអមសាលាដំបូងខេត្តបន្ទាយមានជ័យ, កម្លាំងបានសហការ ជាមួយអាជ្ញាធរមូលដ្ឋានកាត់សោរផ្ទះចូល រួចក៏ប្រទះឃើញម៉ូតូរបស់ជនរងគ្រោះ រួមនិងម៉ូតូចំនួន២២គ្រឿងផ្សេងទៀតសរុបចំនួន២៣គ្រឿង។

ភ្លាមៗកម្លាំង បានសុំការណែនាំពីលោកឧត្ដមសេនីយ៍ត្រីមេបញ្ជាការ ដើម្បីនាំយកម៉ូតូមករក្សាទុកនៅមូលដ្ឋានកងរាជអាវុធហត្ថក្រុងប៉ោយប៉ែត ដើម្បីអនុវត្តតាមនីតិវិធី។

វត្ថុតាងរួមមាន៖ ម៉ូតូម៉ាក YAMAHA NMAX ចំនួន០១គ្រឿង (ម៉ូតូជនរងគ្រោះ), ម៉ូតូម៉ាក HONDA DREAME ចំនួន០៩គ្រឿង, ម៉ូតូម៉ាកSCOOPY ចំនួន២គ្រឿង, ម៉ូតូម៉ាកCLICK ចំនួន០៣គ្រឿង, ម៉ូតូម៉ាក ZOOMER X ចំនួន០៥គ្រឿង, ម៉ូតូម៉ាក PCX ចំនួន០១គ្រឿង, ម៉ូតូម៉ាក HONDA BEAT ចំនួន០១គ្រឿង, ម៉ូតូម៉ាក SUZUKI NEX ចំនួន០១គ្រឿង។

ក្រោយពីនាំយកម៉ូតូមកដល់អង្គភាព, កម្លាំងអាវុធហត្ថ បានប្រគល់ម៉ូតូម៉ាក YAMAHA NMAX ពណ៌ក្រមហម មានលេខតួ-លេខម៉ាស៊ីន ៥៧១១១១០១៨៦៨៩ គ្មានផ្លាកលេខចំនួន០១គ្រឿង ជូនជនរងគ្រោះវិញ។ ចំណែកម៉ូតូចំនួន២២គ្រឿងទៀត អាវុធហត្ថសូមអំពាវនាវឲ្យប្រជាពលរដ្ឋ ដែលធ្លាប់បាត់ម៉ូតូ សូមមកពិនិត្យមើល ក្រែងឃើញម៉ូតូរបស់ខ្លួន ដើម្បីទទួលយកត្រឡប់ទៅវិញ ពេលមានឯកសារត្រឹមត្រូវ៕