(សៀមរាប)៖ លោកស្រីបណ្ឌិតសភាចារ្យ ភឿង សកុណា រដ្ឋមន្រ្តីក្រសួងវប្បធម៌ និងវិចិត្រសិល្បៈ និងជាប្រធានក្រុមប្រឹក្សាភិបាលអាជ្ញាធរជាតិអប្សរា និងលោកស្រី Katerine M. Diop អនុប្រធានស្តីទីស្ថានទូតអាមេរិកនៅភ្នំពេញ បានអញ្ជើញចែកវិញ្ញាបនបត្របញ្ជាក់ការសិក្សាដល់សិក្ខាកាម ក្នុងគម្រោងបណ្តុះបណ្តាលសម្រាប់អ្នកបច្ចេកទេសបេតិកភណ្ឌ និងមេជាងនៅអង្គរ

ពិធីចែកវិញ្ញាបនបត្រនេះ ធ្វើឡើងនៅក្នុងកិច្ចប្រជុំគណៈកម្មាធិការអន្តរជាតិអាយស៊ីស៊ី-អង្គរ និងសំបូរព្រៃគុក នៅសណ្ឋាគារ សុខាអង្គរ ខេត្តសៀមរាប នាថ្ងៃទី១០ ខែមិថុនា ឆ្នាំ២០២៦ ដោយមានការចូលរួមពីថ្នាក់ដឹកនាំ អាជ្ញាធរជាតិអប្សរា និងមន្រ្តីរាជការនៃអាជ្ញាធរជាតិអប្សរា ព្រមទាំងភាំកីពាក់ព័ន្ធ និងសិក្ខាកាមចំនួន ៤១នាក់ផងដែរ។

សូមជម្រាបថា គម្រោងបណ្តុះបណ្តាលវិញ្ញាបនបត្រសម្រាប់អ្នកបច្ចេកទេសបេតិកភណ្ឌ និងមេជាងនៅអង្គរ សហការរៀបចំឡើងដោយអង្គការមូលនិធិប្រាសាទពិភពលោក (WMF) និងអាជ្ញាធរជាតិអប្សរា ដែលវគ្គទី១ ចាប់ផ្តើមពីខែវិច្ឆិកា ឆ្នាំ២០២៥ និងបញ្ចប់នៅក្នុងខែកុម្ភៈ ឆ្នាំ២០២៦ ដែលមានសិក្ខាកាមចូលរួម២០នាក់។

ចំណែកវគ្គទី២ ចាប់ផ្តើមពីខែមីនា និងបញ្ចប់នៅក្នុងខែមិថុនា ឆ្នាំ២០២៦ ដែលមានសិក្ខាកាមចំនួន២១នាក់។ ដូច្នេះ សុរបទាំង២វគ្គ មានសិក្ខាកាមចូលរៀនចំនួន ៤១នាក់ ដែលពួកគេជាកម្មករមកពីស្ថាប័នអាជ្ញាធរជាតិអប្សរា អង្គការ WMF ស្ថាប័នស្រាវជ្រាវបុរាណវិទ្យាឥណ្ឌា (ASI) និងភ្នាក់ងារវប្បធម៌កូរ៉េផងដែរ។

ដោយឡែក ចំពោះគ្រូបង្រៀននៅក្នុងវគ្គបណ្តុះបណ្តាលនេះ គឺជាអ្នកជំនាញខ្មែរសុទ្ធសាត។ មេរៀនសំខាន់ៗដែលបណ្តុះបណ្តាលក្នុងគម្រោងនេះ គឺការចែករំលែកចំណេះដឹងទាក់ទងនឹងសុវត្ថិភាព និងសង្រ្គោះបន្ទាន់ ប្រវត្តិសាស្រ្ត និងការអភិរក្សនៅក្នុងតំបន់អង្គរ ជំនាញបច្ចេកទេស និងរបៀបគ្រប់គ្រង។ គម្រោងនេះ មានទិសដៅពង្រឹងការបណ្តុះបណ្តាលឱ្យសិក្ខាកាមក្លាយជាកម្មករជំនាញ និងមានការទទួលស្គាល់ជាទូទៅលើជំនាញរបស់ខ្លួន៕