ប្រធានមន្ទីរសុខាភិបាលខេត្តព្រះវិហារ ណែនាំមន្ត្រីពង្រឹងសមត្ថភាពវិជ្ជាជីវៈ ផ្តល់សេវាប្រកបដោយគុណភាព និងកុំបណ្តោយឱ្យក្រុមគ្រួសារដ៏មានសុភមង្គលប្រែក្លាយទៅជាសោកនាដកម្មដោយការបាត់បង់ជីវិតមាតា និងទារក
11-06-2026 14:48
(ព្រះវិហារ)៖ លោកវេជ្ជបណ្ឌិត គួង ឡូ ទីប្រឹក្សាក្រសួងសុខាភិបាល និងជាប្រធានមន្ទីរសុខាភិបាលខេត្តព្រះវិហារ បានណែនាំពេទ្យឆ្មប និងមន្ត្រីសុខាភិបាលទាំងអស់ ត្រូវយកចិត្តទុកដាក់ផ្តល់សេវា កុំបណ្តោយឱ្យក្រុមគ្រួសារដ៏មានសុភមង្គលមួយ ប្រែក្លាយទៅជាសោកនាដកម្ម ដោយសារការបាត់បង់ជីវិតមាតា និងទារក ឫជំងឺផ្សេងៗទៀត ដែលយើងអាចការពារបាន។
ការណែនាំរបស់លោកវេជ្ជបណ្ឌិត គួង ឡូ ក្នុងឱកាសលោកអញ្ជើញចូលរួមបើកវគ្គបណ្តុះបណ្តាលស្តីពី «ការអង្កេតមរណភាពមាតា និងទារកជុំវិញកំណើត និងការឆ្លើយតប (MPDSR)» វគ្គទី២ ក្រោមការគាំទ្រពីអង្គការ UNFPA។ វគ្គបណ្តុះបណ្តាលនេះ ក៏មានការចូលរួមពីថ្នាក់ដឹកនាំមណ្ឌលសុខភាព មន្ទីរពេទ្យ និងមន្ត្រីឆ្មប ដែលមិនទាន់បានចូលរួមក្នុងវគ្គទី១ ជាច្រើននាក់ ដើម្បីពង្រឹងសមត្ថភាពក្នុងការកាត់បន្ថយអត្រាមរណភាពមាតា និងទារកជុំវិញកំណើត ព្រមទាំងលើកកម្ពស់គុណភាពសេវាថែទាំសុខភាពមាតា និងទារកឱ្យកាន់តែមានប្រសិទ្ធភាព។
ក្នុងឱកាសនោះលោកវេជ្ជបណ្ឌិត គួង ឡូ បានជំរុញឱ្យសិក្ខាកាមទាំងអស់សិក្សាស្វែងយល់ឱ្យបានស៊ីជម្រៅ និងយកចំណេះដឹង ជំនាញដែលទទួលបានពីវគ្គបណ្តុះបណ្តាលនេះទៅអនុវត្តជាក់ស្តែង ប្រកបដោយប្រសិទ្ធភាពខ្ពស់ ព្រមទាំងចែករំលែកបន្តដល់មន្ត្រីសុខាភិបាលផ្សេងទៀតនៅតាមអង្គភាពរៀងៗខ្លួន។
ប្រធានមន្ទីរសុខាភិបាលខេត្តព្រះវិហារ ក៏បានលើកឡើងពីសារៈសំខាន់នៃការអនុវត្តជំហានទាំង៤ នៃការអង្កេតមរណភាពមាតា និងទារកជុំវិញកំណើត រួមមានទី១៖ ការកំណត់អត្តសញ្ញាណ និងរាយការណ៍ករណីស្លាប់ឱ្យបានទាន់ពេលវេលា, ទី២៖ ការពិនិត្យឡើងវិញ និងវិភាគមូលហេតុនៃការស្លាប់, ទី៣៖ ការឆ្លើយតប និងអនុវត្តសកម្មភាពកែតម្រូវ និងទី៤៖ ការតាមដានត្រួតពិនិត្យការអនុវត្តការងារឱ្យបានជាប់លាប់។
ជាមួយគ្នានេះលោកវេជ្ជបណ្ឌិត បានណែនាំឱ្យមន្ត្រីឆ្មប និងមន្ត្រីសុខាភិបាលទាំងអស់ បង្កើនការយកចិត្តទុកដាក់លើការថែទាំស្ត្រីមានផ្ទៃពោះ ការអប់រំសុខភាព ការផ្តល់ប្រឹក្សា និងការផ្តល់ឱសថចាំបាច់ ដូចជាថ្នាំគ្រាប់ជាតិដែកជាដើម ដើម្បីបង្ការហានិភ័យផ្សេងៗដែលអាចកើតមានក្នុងអំឡុងពេលមានផ្ទៃពោះ និងសម្រាលកូន។
ដោយឡែកចំពោះការគ្រប់គ្រងករណីធ្លាក់ឈាមក្រោយសម្រាល, ប្រធានមន្ទីរសុខាភិបាលខេត្តព្រះវិហារ បានសង្កត់ធ្ងន់លើការបញ្ជូនអ្នកជំងឺឱ្យបានឆាប់រហ័ស ការរៀបចំក្រុមគ្រូពេទ្យជំនាញ និងការត្រៀមឈាមឱ្យបានគ្រប់គ្រាន់សម្រាប់ការសង្គ្រោះបន្ទាន់ ដើម្បីជួយសង្គ្រោះអាយុជីវិតមាតាឱ្យបានទាន់ពេលវេលា។
លោកវេបណ្ឌិត គួង ឡូ ក៏បានជំរុញឱ្យមន្ត្រីសុខាភិបាលគ្រប់រូបបន្តពង្រឹងសមត្ថភាពវិជ្ជាជីវៈ តាមរយៈការចូលរួមវគ្គបណ្តុះបណ្តាល និងការសិក្សាស្វ័យសិក្សាបន្ថែម ដើម្បីធានាឱ្យការធ្វើរោគវិនិច្ឆ័យ និងការព្យាបាលមានប្រសិទ្ធភាពខ្ពស់ ផ្តល់សេវាសុខាភិបាលប្រកបដោយគុណភាព និងសាកសិទ្ធភាពជូនប្រជាពលរដ្ឋ៕
