មហាឧបាសក អៀង សុធារ៉ា៖ ពិភពលោកមានទំនាស់គ្នារាល់ថ្ងៃ ដោយសារផ្លូវចិត្តមិននឹងន មានលោភៈ ទោសៈ មោហៈខ្លាំងពេក
12-06-2026 16:22
(ព្រៃវែង)៖ មហាឧបាសកពុទ្ធសាសនូបត្ថម្ភក៍ អៀង សុធារ៉ា មហាឧបាសកពុទ្ធសាសនូបត្ថម្ភក៍ អៀង សុធារ៉ា ទីប្រឹក្សាគណៈសង្ឃនាយកមហានិកាយនៃព្រះរាជាណាចក្រកម្ពុជា ស្ថាបនិករមណីយដ្ឋានធម្មជាតិភូមិរំដួល ស្ថាបនិករមណីយដ្ឋានភូមិសុខារ៉ាវី និងជាប្រធានសមាគមពាណិជ្ជកម្មនិងវិនិយោគកម្ពុជា-ជប៉ុន បានថ្លែងថា ពិភពលោកមានទំនាស់រាល់ថ្ងៃ គឺដោយសារផ្លូវចិត្តមិននឹងន មានលោភៈ ទោសៈ មោហៈខ្លាំងពេក វាធ្វើឲ្យពិភពលោកមានការទាស់គ្នា ប្រទេសនិងប្រទេសក៏មានការទាស់គ្នាដែរ។ ដូច្នេះយើងគួរតែកាត់បន្ថយនូវលោភៈ ទោសៈ មោហៈ ហួសហេតុនេះចោលទើបមានក្តីសុខទាំងផ្លូវចិត្ត និងផ្លូវកាយ។
ការថ្លែងបែបនេះរបស់លោកគ្រូមហាឧបាសក អៀង សុធារ៉ា ក្នុងឱកាសដែលមហាឧបាសកបានអញ្ជើញធ្វើជាគ្រូបង្គោលក្នុងសិក្ខាសាលា ស្ដីពីការគ្រប់គ្រង និងភាពជាអ្នកដឹកនាំ ដល់មន្ត្រីគ្រប់គ្រងមន្ទីរពេទ្យ ជំនាន់ទី៧ ឋិតនៅក្នុងរមណីយដ្ឋានភូមិសុខារាវី ស្រុកកំពង់ត្របែក ខេត្តព្រៃវែង នៅព្រឹកថ្ងៃទី១១ខែមិថុនាឆ្នាំ២០២៦។
លោកមហាឧបាសកបានបន្ថែមថា នៅក្នុងកម្មវិធីសិក្ខាសាលានេះ ក៏មានការសមាសមាធិតាមបែបព្រះពុទ្ធសាសនា ដែលដឹកនាំដោយ លោកគ្រូសាស្ត្រាចារ្យនៃសកលវិទ្យាល័យស៊ីហនុរាជ ដែលលោកបដិបតិ្តសមាធិយូរហើយ ហើយនាមរបស់គាត់ គឺលោកគ្រូ នួន ថោង។ ដើម្បីឲ្យផ្លូវចិត្តរឹងមាំ ហើយកុំចេះតែឲ្យតម្លៃទៅលើតែសម្ភារ រហូតដល់ភ្លេចគិតទៅដល់អី្វដែលហៅថាសកម្មភាពផ្លូវចិត្ត ឬការងារផ្លូវចិត្ត ពីព្រោះចិត្តវាគ្រប់គ្រងកាយ។
ជាមួយគ្នានេះ មហាឧបាសក អៀង សុធារ៉ា បានសំណូមពរថា ព្រះពុទ្ធសាសនា ជាសាសនារបស់រដ្ឋ ហើយនៅក្នុងប្រវតិ្តរូបយើងភាគច្រើនជាអ្នកកាន់ព្រះពុទ្ធសាសនា ដូច្នេះសូមសំណូមពរដល់ប្រជាពលរដ្ឋយើងទាំងអស់គ្នា ត្រូវខិតខំរៀនឲ្យបានជ្រៅជ្រះ ខំរៀនឲ្យយល់ឲ្យបានច្រើននូវពុទ្ធវចនៈ គឺទស្សនៈវិជ្ជាដែលមាននៅក្នុងពុទ្ធសាសនា ពីព្រោះថាទស្សនវិជ្ជាក្នុងពុទ្ធសាសនានេះធំធេងណាស់ ហើយបើយើងអាចអនុវត្តទៅបាន ដោយរួមគ្នាជាមួយនឹងចំណេះ បច្ចេកទេសផងដែរ។
លោកបានបន្តថា យើងមានចំណេះបច្ចេកទេសហើយ ឧទាហរណ៍ថាវិស្វករ ស្ថាបយ្យករ បើយើងមានចំណេះផ្នែកពុទ្ធវចនៈ ទស្សនវិជ្ជាពុទ្ធសាសនាទៀត វាធ្វើឲ្យម្នាក់ៗ គ្រួសារនីមួយៗ ស្ថាប័ននីមួយៗ ប្រទេសនីមួយៗ ទទួលបាននូវសុខសន្តិភាពផង ទទួលបាននូវការអភិវឌ្ឍន៍មួយដ៏ធំធេង ហើយមាននិរន្តរភាពផង។ តែបើមិនមានពុទ្ធសាសនាជាបង្គោលទេ គឺយើងអាចមានការអភិវឌ្ឍន៍ទៅមុខ ប៉ុន្តែមិនយូរមិនឆាប់ អាចនឹងធ្លាក់ចុះមកវិញ ដោយសារតែប្រជាជនមានសភាពផ្លូវចិត្តមិននឹងហ្ន មានសភាពផ្លូវចិត្តមិនរឹងមាំ មានសភាពផ្លូវចិត្តដែលអាចទាស់គ្នា ហើយបំផ្លាញគ្នាទៅវិញទៅមកបាន។ ដូច្នេះពុទ្ធសាសនានេះសំខាន់ណាស់ នៅក្នុងការរស់នៅប្រចាំថ្ងៃ ក្នុងការធ្វើអាជីវកម្ម នៅក្នុងការដឹកនាំស្ថាប័ន។
មហាឧបាសក អៀង សុធារ៉ា បានបញ្ជាក់ថា មនុស្សយើងម្នាក់ៗគួរតែពង្រឹងទាំងផ្លូវលោកទាំងផ្លូវធម៌ ទាំងពុទ្ធចក្រ ទាំងអាណាចក្រ ដើម្បីឲ្យកង់ទាំងពីរដើរស្មើគ្នា គឺកង់អាណាចក្រ មានន័យថា ចំណេះវិជ្ជាបច្ចេកទេសដូចជាវិស្វករ ស្ថាបយ្យករ ត្រូវរៀនឲ្យមុតមាំឲ្យច្បាស់លាស់ ទាំង AI អ្វីក៏ដោយឲ្យមុតមាំ។ ប៉ុន្តែទាំងអស់នេះ កាលណាយើងចេះវាតែមួយមុខ វាគ្រោះថ្នាក់ណាស់ ពីព្រោះវាធ្វើឲ្យមនុស្សមានលោភៈទោសៈនិងមោហៈ។ ដូច្នេះយើងត្រូវមានការរៀនសូត្រព្រះពុទ្ធសាសនាមួយទៀត ដើម្បីឲ្យកង់ពុទ្ធចក្រនេះវាធំប៉ុនគ្នាជាមួយនឹងកង់អាណាចក្រដែរ ដើម្បីឲ្យយានដែលយើងជិះពីលើ ទៅមុខបានស្រួល។ និយាយជារួម បច្ចុប្បន្ននេះយើងមានកង់អាណាចក្រធំ ប៉ុន្តែកង់ពុទ្ធចក្រតូច ម្ល៉ោះហើយវាធ្វើដំណើរទៅមុខវារលីករលាក់ វាកំពីកកំពក ហើយអាចវៀចខុសផ្លូវ វាក៏អាចនឹងធ្លាក់ខុសផ្លូវ និងមានគ្រោះថ្នាក់ផងដែរ៕
