(ភ្នំពេញ)៖ សាស្ត្រាចារ្យ ផាន់ វណ្ណរ័ត្ន បានដាក់ចេញនូវអត្ថបទទី ២២ - វគ្គ៣ របស់លោក ដែលមានខ្លឹមសារដូចតទៅ៖ បងប្អូនប្រជាពលរដ្ឋខ្មែរជាទីគោរព! នៅក្នុងវគ្គមុនៗ យើងបានយល់ដឹងពីនីតិវិធីច្បាប់ និងមេរៀនជោគជ័យរបស់ប្រទេសជិតខាងរួចមកហើយ។ នៅក្នុងវគ្គបញ្ចប់នេះ យើងមកជជែកគ្នាអំពីសំណួរដែលសំខាន់ បំផុតសម្រាប់ពួកយើងគ្រប់គ្នាថា «តើការដោះស្រាយព្រំដែនសមុទ្រជាមួយថៃបានជោគជ័យ នឹងផ្តល់ផលប្រយោជន៍អ្វីខ្លះដល់ប្រទេសជាតិ និងជីវភាពរបស់ប្រជាពលរដ្ឋយើង?»

តំបន់ទាមទារត្រួតស៊ីគ្នា (OCA) ដែលមានទំហំប្រមាណ ២៦,០០០គីឡូម៉ែត្រក្រឡានៅក្នុងឈូងសមុទ្រថៃ មិនមែនគ្រាន់តែជាផ្ទៃទឹកទទេរនោះទេ ប៉ុន្តែវាជា «ឃ្លាំងទ្រព្យសម្បត្តិដ៏មហាសាល» របស់ជាតិ៖

១. ឯករាជ្យភាព និងសន្តិសុខថាមពលជាតិ បច្ចុប្បន្ន កម្ពុជាយើងត្រូវនាំចូលប្រេងឥន្ធនៈ និងហ្គាសពីបរទេសទាំងស្រុង ដើម្បីប្រើប្រាស់ក្នុងវិស័យដឹកជញ្ជូន និងការរស់នៅ។

- តាមការប៉ាន់ស្មានរបស់អ្នកជំនាញ តំបន់ត្រួតស៊ីគ្នានេះ មានផ្ទុកទៅដោយប្រេងកាត និងឧស្ម័នធម្មជាតិ (ហ្គាស) រាប់រយលានបារ៉ែល។

- នៅពេលដែលយើងកំណត់ព្រំដែនច្បាស់លាស់តាមច្បាប់ UNCLOS យើងនឹងអាចទាញយក «មាសខ្មៅ» ទាំងនេះមកប្រើប្រាស់។ វាជួយឱ្យកម្ពុជាមានប្រភពថាមពលផ្ទាល់ខ្លួន មិនបារម្ភពីរឿងប្រេងឡើងថ្លៃតាមទីផ្សារពិភពលោក និងធានាការផ្គត់ផ្គង់អគ្គិសនីបានថោកជាងមុន។

២. ប្រភពចំណូលជាតិដ៏ធំធេង ដើម្បីអភិវឌ្ឍប្រទេស ការរុករក និងផលិតប្រេងក្នុងសមុទ្រ នឹងបង្កើតជាប្រភពចំណូលពន្ធ និងសួយសារអាកររាប់ពាន់លានដុល្លារជូនរដ្ឋ។ ចំណូលទាំងនេះ នឹងត្រូវយកទៅ កសាង និងពង្រីកហេដ្ឋារចនាសម្ព័ន្ធជាតិដូចជា ផ្លូវល្បឿនលឿន ស្ពាន កំពង់ផែទឹកជ្រៅ និងពង្រឹងវិស័យការពារជាតិទៀតផង។ វិនិយោគបន្ថែមលើប្រព័ន្ធអប់រំ មន្ទីរពេទ្យទំនើបៗ និងការតម្លើងប្រាក់បៀវត្សរ៍ជូនមន្ត្រីរាជការ លោកគ្រូ អ្នកគ្រូ និងកងកម្លាំងប្រដាប់អាវុធ។

៣. បង្កើតឱកាសការងាររាប់ម៉ឺនកន្លែងសម្រាប់យុវជន

វិស័យប្រេងកាត និងឧស្ម័នធម្មជាតិ ជាវិស័យបច្ចេកវិទ្យាកម្រិតខ្ពស់។ វានឹងបង្កើតឱ្យមាន៖

- ការងារដែលមានប្រាក់ខែខ្ពស់សម្រាប់វិស្វករខ្មែរ អ្នកជំនាញផ្នែកច្បាប់សមុទ្រ អ្នកគ្រប់គ្រងភស្តុភារកម្ម និងកម្មករជំនាញរាប់ម៉ឺននាក់។

- ឱកាសសម្រាប់សិស្ស-និស្សិតខ្មែរ ក្នុងការចាប់យកជំនាញថ្មីៗកម្រិតពិភពលោក ដែលកន្លងមកយើងពុំទាន់មានឱកាសបានអនុវត្តជាក់ស្តែងក្នុងទ្រង់ទ្រាយធំ។

៤. ភាពច្បាស់លាស់សម្រាប់អ្នកវិនិយោគអន្តរជាតិ

ក្រុមហ៊ុនប្រេងលំដាប់យក្សនៅលើពិភពលោក មិនហ៊ានបញ្ចេញទុនរាប់ពាន់លានដុល្លារមកខួងប្រេងឡើយ ប្រសិនបើតំបន់នោះនៅមានទំនាស់ព្រំដែនមិនច្បាស់លាស់។ ការប្រើប្រាស់យន្តការ UNCLOS នឹងផ្តល់ភាពច្បាស់លាស់ខាងផ្លូវច្បាប់ ដែលជា «ភ្លើងខៀវ» ទាក់ទាញក្រុមហ៊ុនអន្តរជាតិធំៗឱ្យមកបណ្តាក់ទុនដោយទំនុកចិត្ត។

សរុបមក ការសម្រេចចិត្តប្រើប្រាស់យន្តការច្បាប់អន្តរជាតិ UNCLOS របស់រាជរដ្ឋាភិបាលកម្ពុជា មិនមែនគ្រាន់តែជាកិច្ចការនយោបាយការទូតនោះទេ ប៉ុន្តែវាជា «យុទ្ធសាស្ត្រសេដ្ឋកិច្ច និងអធិបតេយ្យភាពជាតិដ៏រឹងមាំ» ដើម្បីធានាថា ទ្រព្យសម្បត្តិធម្មជាតិរបស់ដូនតាខ្មែរ ត្រូវបានការពារ និងយកមកបម្រើដល់ការរីកចម្រើនរបស់ជាតិ និងយុវជនខ្មែរគ្រប់រូបទាំងក្នុងពេលបច្ចុប្បន្ន និងទៅអនាគត៕