(ភ្នំពេញ)៖ នៅពេលពិភាក្សាអំពីការប្រែប្រួលអាកាសធាតុ ការចាប់អារម្មណ៍របស់សាធារណជនជារឿយៗតែងតែផ្តោតទៅលើរោងចក្រអគ្គិសនី រោងចក្រឧស្សាហកម្ម យានយន្ត និងការកាប់បំផ្លាញព្រៃឈើ។ ប្រភពទាំងនេះពិតជាអ្នករួមចំណែកដ៏ធំក្នុងការភាយឧស្ម័នផ្ទះកញ្ចក់។ ទោះជាយ៉ាងណាក៏ដោយ សកម្មភាពអាកាសធាតុទាមទារឱ្យមានការយកចិត្តទុកដាក់លើគ្រប់ប្រភពភាយទាំងអស់ រួមទាំងប្រភពទាំងឡាយណាដែលមិនសូវមើលឃើញច្បាស់ ប៉ុន្តែនៅតែមានសារៈសំខាន់។

ប្រភពមួយក្នុងចំណោមនោះ គឺ «វិស័យសារធាតុរំលាយ»។ សារធាតុរំលាយ (Solvents) គឺជាសារធាតុដែលគេប្រើសម្រាប់រំលាយ ពង្រាវ ឬសម្អាតវត្ថុធាតុដទៃទៀត។ គេឃើញមានវត្តមានរបស់ពួកវានៅក្នុងផលិតផល និងឧស្សាហកម្មយ៉ាងទូលំទូលាយ រួមមាន ថ្នាំលាប ជ័រលាបការពារ (Coatings) ទឹកថ្នាំបោះពុម្ព កាវ ភ្នាក់ងារសម្អាត គ្រឿងសម្អាង ឱសថ ការផលិតគ្រឿងអេឡិចត្រូនិច និងការផលិតសារធាតុគីមី។ មនុស្សភាគច្រើនប្រើប្រាស់ផលិតផលដែលមានផ្ទុកសារធាតុរំលាយទាំងនេះនៅក្នុងជីវភាពរស់នៅប្រចាំថ្ងៃ ដោយជារឿយៗមិនបានដឹងខ្លួននោះឡើយ។

ទោះបីជាវិស័យសារធាតុរំលាយនេះ រួមចំណែកក្នុងចំណែកតូចមួយនៃការភាយឧស្ម័នផ្ទះកញ្ចក់ បើធៀបនឹងវិស័យថាមពល ឬឧស្សាហកម្មធុនធ្ងន់ក៏ដោយ ប៉ុន្តែវានៅតែជាផ្នែកមួយដ៏សំខាន់នៃសកម្មភាពអាកាសធាតុ ព្រោះវាភាយចេញនូវសមាសធាតុសរីរាង្គងាយនឹងបង្កជាឧស្ម័ន(Volatile Organic Compounds - VOCs) និងសារធាតុបំពុលខ្យល់ដទៃទៀត ដែលជះឥទ្ធិពលទាំងដល់បរិស្ថាន និងសុខភាពមនុស្សជាតិ។

សារធាតុរំលាយជាច្រើនបានហួតចូលទៅក្នុងបរិយាកាស ក្នុងកំឡុងពេលដំណើរការផលិត ការរក្សាទុក ការដឹកជញ្ជូន និងការប្រើប្រាស់។ ការភាយទាំងនេះរួមចំណែកដល់ការកកើតអូហ្សូននៅកម្រិតដី (Ground-level ozone) និងផ្សែងអ័ព្ទពុល (Smog) ដែលអាចបំផ្លាញដំណាំកសិកម្ម ព្រៃឈើ ប្រព័ន្ធអេកូឡូស៊ី និងប្រព័ន្ធដកដង្ហើមរបស់មនុស្ស។ សារធាតុគីមីមួយចំនួនដែលពាក់ព័ន្ធនឹងសារធាតុរំលាយ ក៏មានផលប៉ះពាល់ផ្ទាល់ ឬប្រយោលដល់អាកាសធាតុផងដែរ។

ខណៈពេលដែលបណ្តាប្រទេសនានាកំពុងខិតខំកាត់បន្ថយការភាយឧស្ម័នផ្ទះកញ្ចក់ និងលើកកម្ពស់គុណភាពបរិស្ថាន វិស័យសារធាតុរំលាយបានផ្តល់នូវឱកាសមួយសម្រាប់សកម្មភាពអាកាសធាតុជាក់ស្តែង និងមានប្រសិទ្ធភាពចំណាយខ្ពស់។
សកម្មភាពដំបូងនិងមានប្រសិទ្ធភាពបំផុត គឺការកាត់បន្ថយការប្រើប្រាស់សារធាតុរំលាយដែលមានការភាយខ្ពស់ នៅពេលណាដែលមានសារធាតុជំនួសផ្សេងទៀតដែលអាចប្រើបានដោយសមស្រប។

ការរីកចម្រើនខាងបច្ចេកវិទ្យា បានធ្វើឱ្យគេអាចជំនួសផលិតផលផ្អែកលើសារធាតុរំលាយបែបប្រពៃណីជាច្រើន មកជាផលិតផលផ្អែកលើទឹក (Water-based) ផលិតផលដែលមានកម្រិតសមាសធាតុសរីរាង្គងាយនឹងបង្កជាឧស្ម័ន (Volatile Organic Compounds -VOC) ទាប ឬផលិតផលដែលគ្មានសារធាតុរំលាយទាល់តែសោះ។ ថ្នាំលាប ជ័រលាបការពារ និងផលិតផលសម្អាតដែលផ្អែកលើទឹក ជារឿយៗផ្តល់នូវគុណភាពស្រដៀងគ្នា ខណៈពេលដែលជួយកាត់បន្ថយការភាយបានយ៉ាងច្រើន។

ការបង្កើតថ្មី (Innovation) ដើរតួនាទីយ៉ាងសំខាន់។ អ្នកស្រាវជ្រាវ និងក្រុមហ៊ុនផលិតនានានៅជុំវិញពិភពលោក កំពុងអភិវឌ្ឍសារធាតុគីមីដែលបៃតងជាងមុន និងវិធីសាស្ត្រផលិតដែលមេត្រីភាពចំពោះបរិស្ថាន។ ការបង្កើតថ្មីទាំងនេះអនុញ្ញាតឱ្យវិស័យឧស្សាហកម្មរក្សាបាននូវផលិតភាពរបស់ខ្លួន ព្រមទាំងកាត់បន្ថយផលប៉ះពាល់បរិស្ថាន។ អាជីវកម្មដែលវិនិយោគលើបច្ចេកវិទ្យាស្អាតជាងមុន មិនត្រឹមតែជួយការពារបរិស្ថានប៉ុណ្ណោះទេ ប៉ុន្តែជារឿយៗថែមទាំងទទួលបានផលចំណេញពីការបង្កើនប្រសិទ្ធភាព និងសមត្ថភាពប្រកួតប្រជែងលើទីផ្សារទៀតផង។ សកម្មភាពអាកាសធាតុដ៏សំខាន់មួយទៀត គឺការកែលម្អការអនុវត្តក្នុងវិស័យឧស្សាហកម្ម។

ការភាយជាច្រើនកើតឡើងដោយសារតែសារធាតុរំលាយមិនត្រូវបានរក្សាទុក កាន់កាប់ ឬប្រមូលទុកឡើងវិញបានត្រឹមត្រូវ។ ឧបករណ៍ទំនើបៗអាចចាប់យក និងកែច្នៃចំហាយសារធាតុរំលាយឡើងវិញ មុនពេលពួកវាត្រូវបានភាយចូលទៅក្នុងបរិយាកាស។ ការថែទាំឱ្យបានល្អជាងមុន ការការពារការលេចធ្លាយ ប្រព័ន្ធផលិតកម្មបែបបិទជិត និងកន្លែងរក្សាទុកដែលមានប្រសិទ្ធភាពខ្ពស់ អាចកាត់បន្ថយការភាយបានយ៉ាងច្រើនសន្ធឹកសន្ធាប់។
ការគ្រប់គ្រង និងស្តង់ដារបរិស្ថានដ៏ល្អ ក៏មានសារៈសំខាន់ដូចគ្នាដែរ។

រដ្ឋាភិបាលអាចលើកទឹកចិត្តឱ្យវិស័យឧស្សាហកម្មចាប់យកបច្ចេកវិទ្យាស្អាតៗ តាមរយៈបទប្បញ្ញត្តិ យន្តការលើកទឹកចិត្ត ការគាំទ្រផ្នែកបច្ចេកទេស និងកម្មវិធីលើកកម្ពស់ការយល់ដឹងជាសាធារណៈ។ ស្តង់ដារបរិស្ថានជួយធានាថា អាជីវកម្មនានាដំណើរការដោយមានការទទួលខុសត្រូវ ព្រមទាំងការពារសុខភាពសាធារណៈ និងបរិស្ថាន។ សកម្មភាពអាកាសធាតុនៅក្នុងវិស័យសារធាតុរំលាយ ក៏រួមចំណែកដល់ការធ្វើឱ្យខ្យល់អាកាសស្អាតជាងមុនផងដែរ។

គុណភាពខ្យល់អាកាសខ្សោយ ប៉ះពាល់ដល់មនុស្សរាប់លាននាក់នៅទូទាំងពិភពលោក និងអាចនាំឱ្យមានជំងឺផ្លូវដង្ហើម បញ្ហាសរសៃឈាមបេះដូង និងការធ្លាក់ចុះគុណភាពជីវិត។ តាមរយៈការកាត់បន្ថយការភាយពីសារធាតុរំលាយ បណ្តាប្រទេសនានាអាចដោះស្រាយបញ្ហាប្រែប្រួលអាកាសធាតុ លើកកម្ពស់សុខភាពសាធារណៈ និងបង្កើនគុណភាពបរិស្ថានក្នុងពេលតែមួយ។

សម្រាប់ប្រទេសកំពុងអភិវឌ្ឍន៍ សកម្មភាពអាកាសធាតុក្នុងវិស័យសារធាតុរំលាយ ផ្តល់នូវឱកាសមួយក្នុងការចាប់យកការអនុវត្តឧស្សាហកម្មទំនើបៗតាំងពីដំបូងទី។ នៅពេលដែលឧស្សាហកម្មពង្រីកខ្លួន និងសេដ្ឋកិច្ចរីកចម្រើន បច្ចេកវិទ្យាស្អាតជាងមុនអាចត្រូវបានបញ្ចូលទៅក្នុងប្រព័ន្ធផលិតកម្ម មុនពេលដែលការបំពុលក្លាយជាបញ្ហាប្រឈមដ៏ធំធេង។
អ្នកប្រើប្រាស់ក៏មានតួនាទីត្រូវចូលរួមផងដែរ។

ការជ្រើសរើសផលិតផលដែលមេត្រីភាពចំពោះបរិស្ថាន ការគាំទ្រក្រុមហ៊ុនដែលផ្តល់អាទិភាពលើនិរន្តរភាព និងការអនុវត្តតាមការណែនាំនៃការប្រើប្រាស់ផលិតផល អាចជួយកាត់បន្ថយការភាយបាន។ ជម្រើសតូចៗដែលធ្វើឡើងដោយអ្នកប្រើប្រាស់រាប់លាននាក់ នឹងរួមគ្នាបង្កើតជាផលប្រយោជន៍បរិស្ថានដ៏ធំធេង។ មេរៀនដ៏សំខាន់មួយនៃសកម្មភាពអាកាសធាតុ គឺគ្រប់វិស័យទាំងអស់សុទ្ធតែមានតម្លៃ។

ការកាត់បន្ថយការភាយក្នុងទំហំធំពីវិស័យថាមពល ការដឹកជញ្ជូន ព្រៃឈើ និងឧស្សាហកម្មធុនធ្ងន់ គឺជារឿងចាំបាច់មិនអាចខ្វះបាន។ ទោះជាយ៉ាងណាក៏ដោយ ដើម្បីសម្រេចបាននូវគោលដៅអាកាសទុករយៈពេលវែង វាក៏ទាមទារឱ្យមានការយកចិត្តទុកដាក់លើប្រភពតូចៗដែលជារឿយៗត្រូវបានមើលរំលងផងដែរ។ វិស័យសារធាតុរំលាយបានបង្ហាញឱ្យឃើញថា ការកែលម្អបន្តិចម្តងៗនៅតាមសកម្មភាពចម្រុះជាច្រើន អាចរួមចំណែកដល់ការទទួលបានផលប្រយោជន៍បរិស្ថានយ៉ាងច្រើនសន្ធឹកសន្ធាប់។

សកម្មភាពអាកាសធាតុ មិនមែនតែងតែសំដៅលើការផ្លាស់ប្តូរដែលគួរឱ្យភ្ញាក់ផ្អើលនោះទេ។ ជារឿយៗ វាគឺជារឿងនៃការកែលម្អដំណើរការផលិត ការចាប់យកបច្ចេកវិទ្យាល្អជាងមុន និងការធ្វើជម្រើសដែលឆ្លាតវៃជាងមុន។ សកម្មភាពទាំងនេះអាចមើលទៅហាក់ដូចជាសាមញ្ញៗនៅពេលពិនិត្យម្នាក់ៗ ប៉ុន្តែនៅពេលរួមចូលគ្នា ពួកវាជួយកសាងអនាគតមួយដែលស្អាត និងមាននិរន្តរភាពជាងមុន។

ការអន្តរកាលទៅកាន់សេដ្ឋកិច្ចកាបូនទាប នឹងទាមទារឱ្យមានការបង្កើតថ្មី ការទទួលខុសត្រូវ និងកិច្ចសហប្រតិបត្តិការនៅគ្រប់វិស័យទាំងអស់នៅក្នុងសង្គម។ វិស័យសារធាតុរំលាយក៏មិនមែនជាការលើកលែងនោះដែរ។

តាមរយៈការលើកកម្ពស់ផលិតផលស្អាតៗ ការកាត់បន្ថយការភាយ ការចាប់យកបច្ចេកវិទ្យាបៃតង និងការងើបឈរពង្រឹងការគ្រប់គ្រងបរិស្ថាន យើងអាចធានាបានថា សូម្បីតែប្រភពបំពុលដែលតូចជាងគេបំផុត ក៏អាចក្លាយជាផ្នែកមួយនៃដំណោះស្រាយចំពោះការប្រែប្រួលអាកាសធាតុផងដែរ។

នៅក្នុងសមរភូមិប្រយុទ្ធប្រឆាំងនឹងការប្រែប្រួលអាកាសធាតុ គ្រប់វិស័យទាំងអស់សុទ្ធតែរាប់បញ្ចូល គ្រប់ការកែលម្អសុទ្ធតែមានតម្លៃ ហើយរាល់សកម្មភាពទាំងអស់ សុទ្ធតែនាំយើងឱ្យខិតជិតមួយជំហានទៀត ទៅរកភពផែនដីដែលមានសុខភាពល្អជាងមុន សម្រាប់មនុស្សជំនាន់ក្រោយៗទៅថ្ងៃអនាគត៕