(ក្រចេះ)៖ ឃុំបឹងចារ ស្រុកសំបូរ ខេត្តក្រចេះ ស្ថិតនៅត្រើយខាងលិចទន្លេមេគង្គ ដែល​ជាភូមិ​សាស្ត្រ​​ដាច់ស្រយាលមួយក្នុងទឹកដីភាគឦសានប្រទេសកម្ពុជា។ ក្នុងឃុំនេះមានប្រជាពលរដ្ឋរស់​នៅ​ច្រើនគ្រួសារតែជីវភាពមិន​សូវ​ល្អ​ប្រសើរ​ឡើយ។

របរដែលប្រជាពលរដ្ឋនៅតំបន់នោះ ពឹងអាស្រ័យមានការធ្វើស្រែចម្ការ នេសាទត្រី រកអនុផលព្រៃ​ឈើ រកសត្វព្រៃជាដើម។ ដោយ​​សារភូមិឋាននេះជាប់នឹងព្រៃឡង់ មានប្រជាពលរដ្ឋខ្លះចូលព្រៃ​កាប់​ឈើដែរ។ របរ​ដែល​មិន​ច្បាស់លាស់នេះ មិនបានធ្វើឱ្យជីវភាបរបស់ពួកគេបានល្អប្រសើរ​នោះ​ឡើយ។

ការលើកកម្ពស់ជីវភាពប្រជាពលរដ្ឋតាមទីជនបទដាច់ស្រយាលដោយភ្ជាប់ជាមួយគម្រោងវិនិយោគ គឺជា​គោល​នយោ​បាយដែលរាជរដ្ឋាភិបាលកម្ពុជាបានប្រកាន់យក។ ការវិនិយោគតាមទីជន​បទ បានផ្តល់​ការងារ និងប្រាក់ចំណូលទៀងទាត់ជូនប្រជាពលរដ្ឋ។

ឆ្នាំ២០១៩ ដើម្បីប្រែក្លាយដីព្រៃរិចរិលទៅជាថាមពលថ្មីសម្រាប់សេដ្ឋកិច្ចនៅទីជនបទ រាជរដ្ឋា​ភិ​បាល​​កម្ពុជា បានផ្តល់ដីស្ថានីយផ្សព្វផ្សាយ ស្តារព្រៃឈើរបស់ក្រសួងកសិកម្ម រុក្ខាប្រមាញ់ និងនេ​សាទ ទំហំជិត ៣ម៉ឺនហិកតា ក្នុងភូមិសាស្ត្រ ស្រុកសំបូរ ខេត្តក្រចេះ និងស្រុកសៀមបូក ខេត្តស្ទឹង​ត្រែង ជូនក្រុមហ៊ុនហូលីផ្លេនថេសិន ដាំដុះដើមប្រេងខ្យល់។

តាមរយៈការវិនិយោគនេះ ក្រុមហ៊ុនបានផ្តល់ការងារទៀងទាត់ជូនប្រជាពលរដ្ឋនៅក្នុងឃុំបឹងចារ ស្រុកសំបូរ តាមរយៈការដាំដើមប្រេងខ្យល់ ការថែទាំដើមប្រេងខ្យល់ ការកាត់ប្រមូលដើមប្រេង​ខ្យល់ និងការធ្វើការងារនៅក្នុងរោងចក្រកែច្នៃឈើជាដើម។ តាមរយៈការងារក្នុងចំការដើមប្រេង​ខ្យល់ ដែលជាចម្ការឈើដាំខ្នាតយក្សលើកដំបូងនៅកម្ពុជានេះ បានផ្តល់ប្រាក់ចំណូលទៀង​ទាត់ ហើយក៏បានជួយលើកកម្ពស់ជីវភាពប្រជាពលរដ្ឋនៅតំបន់បានល្អប្រសើរជាងមុន។

មិនត្រឹម​ផ្តល់ការងារ និងប្រាក់ចំណូលប៉ុណ្ណោះទេ តាមរយៈការវិនិយោគនេះ ក្រុមហ៊ុនបានចូលរួម​ចំណែកធ្វើផ្លូវ និងស្ពានសម្រាប់ប្រជាពលរដ្ឋធ្វើដំណើរ និងការដឹកកសិកផលកាន់តែងាយស្រួល។

បើទោះបីការដាំដុះដើមប្រេងខ្យល់ទទួលបានជោគជ័យយ៉ាងណាក្តី តែបរិមាណឈើដែលបានដាំ​ប្រមាណ ១៣ ០០០ហិកតាក្នុងរយៈពេល៧ឆ្នាំមកនេះ មិនអាចផ្គត់ផ្គង់ឱ្យគ្រប់គ្រាន់សម្រាប់ច្រវាក់​ផលិតកម្មកែច្នៃឈើដែលមានតម្រូវការខ្ពស់ក្នុងប្រទេសកម្ពុជានោះឡើយ។

ដើម្បីជាដំណោះ​ស្រាយឈ្នះ-ឈ្នះ ដែលជាអភិក្រមនយោបាយរបស់សម្តេចតេជោ ហ៊ុន សែន ជួយឱ្យក្រុមហ៊ុន និងប្រជាពលរដ្ឋទទួលបានប្រយោជន៍ទាំងអស់គ្នា ក្រុមហ៊ុនហូលីផ្លេនថេសិន បានលើកទឹក​ចិត្តឱ្យ​ប្រជាពលរដ្ឋនៅតំបន់នោះ ដាំដើមប្រេងខ្យល់ ហើយក្រុមហ៊ុនជាអ្នក​ប្រមូល​ទិញត្រឡប់មកវិញ។ ការដាំនេះទៀតសោត ក្រុមហ៊ុន បានផ្តល់ទាំងកូនប្រេងខ្យល់ជូន​ទៅប្រជា​ពល​រដ្ឋដោយមិនមាន​ការ​លក់​ដូរនោះទេ។

បើតាមការរៀបរាប់ទាំងខាងក្រុមហ៊ុន និងប្រជាពលរដ្ឋដែលបានចាប់យករបរដាំដើមប្រេងខ្យល់​នេះ បានឱ្យដឹងថា ដើមប្រេងខ្យល់ងាយស្រួលដាំ ហើយមិនលំបាកថែទាំនោះឡើយ ពោលមិន​ហត់​​ស្រោចទឹក ឬដាក់ជីនោះទេ គេគ្រាន់តែកាត់ស្មៅ និងថែទាំកុំឱ្យភ្លើងឆេះប៉ុណ្ណោះ។ ក្រោយដាំ​៥​ឆ្នាំ ដើមប្រេងខ្យល់នឹងត្រូវប្រមូលផលដោយមួយដើមអាចបានទម្ងន់ចាប់ពី១០០គីឡូក្រាមឡើង​ទៅ។ បន្ទាប់ពីកាត់លើកទី១ហើយនោះ ដើមប្រេងខ្យល់នឹងបន្តដុះចេញពីគល់ដែលកាត់ច្រើនដើម តែជា​ទូទៅគេរក្សាទុកតែពីរដើមប៉ុណ្ណោះ ហើយការលូតលាស់លឿនឆាប់បានប្រមូលផល​ទៀត​ផង។ ការ​កាត់​ហើយដុះបែបនេះ អាចបានរហូតដល់ទៅបួនដង។

ដើមប្រេងខ្យល់ដែលប្រមូលផល ត្រូវបាន​ក្រុម​ហ៊ុនទិញក្នុងមួយតោនតម្លៃ ៤៥ដុល្លារ។ ពីជីវភាព​ធ្លាប់ខ្វះខាត របរដាំដើមប្រេងខ្យល់បានក្លាយជាប្រភពចំណូលបន្ថែមពីលើការងារ​ស៊ី​ឈ្នួល​​ជាមួយ​ក្រុមហ៊ុន និងរបរប្រចាំថ្ងៃរបស់ប្រជាពលរដ្ឋក្នុងឃុំបឹងចារ ស្រុកសំបូរ ខេត្ត​ក្រចេះ។ របរដាំដើម​ប្រេង​ខ្យល់បានក្លាយជាថាមពលសេដ្ឋកិច្ចថ្មី ជួយឱ្យជីវភាពរបស់ប្រជាពលរដ្ឋ​នៅទីឋាន​​ទីដាច់​ស្រយាល​នេះ មានភាពល្អប្រសើរជាងមុន។

ពេលមិនទាន់ទទួលបានផល ការជំរុញ និងលើកទឹកចិត្តឱ្យដាំដើមប្រេងខ្យល់​នៅតំបន់នោះ ជា​ការ​លំបាក ប៉ុន្តែក្រោយពេលដើមប្រេងខ្យល់ទទួលបានផល បានក្លាយទៅជាកម្លាំងចិត្តសម្រាប់​ប្រជា​ពលរដ្ឋ ហើយពួកគេនឹងបន្តពង្រីកការដាំដុះនៅលើផ្ទៃដីដែលពួកគេទុកចោលនាពេល​បច្ចុ​ប្បន្ន។ ប្រជាពលរដ្ឋនៅឃុំបឹងចារមានក្តីសង្ឃឹមយ៉ាងមុតមាំថា របរដាំដើមប្រេងខ្យល់នេះ នឹងជួយធ្វើ​ឱ្យ​ជីវភាពរបស់ពួកគេកាន់តែល្អប្រសើរ។

ការវិនិយោគដាំប្រេងខ្យល់របស់ក្រុមហ៊ុនហូលីផ្លេនថេសិន និងការចាប់យករបរដាំដើមប្រេងខ្យល់​របស់​ប្រជាពលរដ្ឋនៅក្នុងឃុំបឹងចារ ស្រុកសំបូរ ខេត្តក្រចេះ ដែលមានភូមិសាស្ត្រជាប់នឹងព្រៃឡង់​នេះ មិនត្រឹមតែជាពរជ័យជួយលើកកម្ពស់ជីវភាពប្រជាពលរដ្ឋប៉ុណ្ណោះទេ ថែមទាំងចូលរួម​ចំណែក​ការពារបទល្មើសកាប់បំផ្លាញព្រៃឈើធម្មជាតិនៅតំបន់នោះថែមទៀតផង។ ប្រជាពលរដ្ឋ​ដែលធ្លាប់ចូលព្រៃកាប់ឈើលក់ ក៏សម្រេចបោះបង់របរនោះ បន្ទាប់ពីពួកគាត់មានការងារ និងចំណូលច្បាស់លាស់៕