ក្មេងទំនើង១០នាក់ បង្ហោះម៉ូតូយ៉ាងអនាធិបតេយ្យតាមផ្លូវ ត្រូវកម្លាំងអាវុធហត្ថខេត្តកំពង់ស្ពឺ បង្ក្រាប និងឃាត់ខ្លួនយកមកអប់រំណែនាំធ្វើកិច្ចសន្យាបញ្ឈប់ តែបានដកហូតម៉ូតូទុកជាបណ្តោះអាសន្ន
17-06-2026 14:24
(កំពង់ស្ពឺ)៖ ដោយអនុវត្តតាមបទបញ្ជាយ៉ាងម៉ឺងម៉ាត់របស់លោកឧត្តមសេនីយ៍ត្រី ម៉េង ស្រ៊ុន មេបញ្ជាការកងរាជអាវុធហត្ថខេត្តកំពង់ស្ពឺ, កម្លាំងជំនាញកងរាជអាវុធហត្ថខេត្តកំពង់ស្ពឺ បានបង្ក្រាប និងឃាត់ខ្លួនក្មេងទំនើងដែលនិយម ចូលចិត្តបង្ហោះម៉ូតូតាមដងផ្លូវសាធារណៈយកមកអប់រំណែនាំធ្វើកិច្ចសន្យាបញ្ឈប់ និងដកហូតម៉ូតូទុកជាបណ្តោះអាសន្ន នៅទីបញ្ជាការកងរាជអាវុធហត្ថខេត្តកំពង់ស្ពឺ ជាបន្តបន្ទាប់នាពេលកន្លងមក។
ជាក់ស្តែងថ្មីៗនេះ កម្លាំងអង្គភាពនគរបាលយុត្តិធម៌ នៃបញ្ជាការដ្ឋានកងរាជអាវុធហត្ថខេត្តកំពង់ស្ពឺ បានបង្ក្រាប និងឃាត់ខ្លួនក្មេងទំនើងមួយក្រុមមានគ្នា១០នាក់។ នៅវេលាម៉ោងប្រមាណ ២១៖៣០នាទីនាថ្ងៃទី១៣ ខែមិថុនា ឆ្នាំ២០២៦ ក្មេងទំនើងមួយក្រុមនេះ បានបង្ហោះម៉ូតូតាមផ្លូវសាធារណៈនៅលើផ្លូវលេខ១០៦ ស្ថិតក្នុងភូមិពាណិជ្ជកម្ម សង្កាត់រការធំ ក្រុងច្បារមន ខេត្តកំពង់ស្ពឺ ដែលជាហេតុបង្កឲ្យភាពអនាធិបតេយ្យ ប៉ះពាល់ដល់សុខសុវត្តិភាព បង្កការភាពភ័យខ្លាចដល់ពលរដ្ឋក្នុងមូលដ្ឋាន បាត់សីលធម៌ គុណធម៌ វិន័យ និងច្បាប់ទម្លាប់។
ក្មេងទំនើងទាំង១០នាក់នេះរួមមាន៖
*ទី១៖ ឈ្មោះ នី ដានីន អាយុ២១ឆ្នាំ មុខរបរកម្មករ
*ទី២៖ ឈ្មោះ យ៉ាន ចាន់ អាយុ១៦ឆ្នាំ មុខរបរកម្មករ
*ទី៣៖ ឈ្មោះ ភាព សាន់នី អាយុ១៩ឆ្នាំ មុខរបរកម្មករ
*ទី៤៖ ឈ្មោះ វឿន វណ្ណេត អាយុ១៧ឆ្នាំ មុខរបរកម្មករ
*ទី៥៖ ឈ្មោះ ផុន សុផាក អាយុ២៤ឆ្នាំ មុខរបរកម្មករ
*ទី៦៖ ឈ្មោះ គុណ សំណាង អាយុ១៩ឆ្នាំ មុខរបរកម្មកររោងចក្រ
*ទី៧៖ ឈ្មោះ ទីន ស៊ីណា អាយុ២២ឆ្នាំ មុខរបរកម្មកររោងចក្រ
*ទី៨៖ ឈ្មោះ ហាក់ ប៊ុនសាក់ អាយុ១៨ឆ្នាំ មុខរបរកម្មកររោងចក្រ
*ទី៩៖ ឈ្មោះ រិន ភារៈ អាយុ២៣ឆ្នាំ មុខរបរកម្មកររោងចក្រ
*ទី១០៖ ឈ្មោះ រិទ្ធ វាសនា អាយុ១៧ឆ្នាំ មុខរបរមិនពិតប្រាកដ។
កម្លាំងអាវុធហត្ថបានចាប់យកវត្ថុតាងរួមមាន៖ ម៉ូតូ ចំនួន០៥គ្រឿង (ម៉ាក NEX ពណ៌ខៀវ ឆ្នាំ២០១៨ ផ្លាកលេខកំពង់ឆ្នាំង 1G-4644, HONDA DREAM ពណ៌ខ្មៅ ឆ្នាំ២០២០ ផ្លាកលេខ ភ្នំពេញ 1IN-7395, HONDA DREAM ពណ៌ខ្មៅ ឆ្នាំ២០២៤ ផ្លាកលេខ ភ្នំពេញ 1KU-6795, HONDA DREAM ពណ៌ឈាមជ្រូក ឆ្នាំ២០២៦ ផ្លាកលេខ កំពង់ធំ 1U-0188, HONDA DREAM ពណ៌ឈាមជ្រូក ឆ្នាំ២០២៦ ផ្លាកលេខ កំពង់ឆ្នាំង 1Q-1266) និងទូរស័ព្ទ ចំនួន១២គ្រឿង (ម៉ាក IPHONE ១១គ្រឿង, VIVO ០១គ្រឿង)ថែមទៀត។
បច្ចុប្បន្នក្មេងទំនើងដែលបង្ហោះម៉ូទូទាំងនេះ ត្រូវបានកម្លាំងកងរាជអាវុធហត្ថខេត្តកំពង់ស្ពឺ យកមកអប់រំណែនាំ និងធ្វើកិច្ចសន្យាចំពោះមុខ ម្តាយ ឪពុក និងអាណាព្យាបាល ដើម្បីបញ្ឈប់រាល់សកម្មភាពទំនើងទាំងនេះ ដែលនាំឱ្យប៉ះពាល់ ជាហេតុដែលបំផ្លាញទ្រព្យសម្បត្តិក៏ដូចជាកិត្តិយសគ្រួសារ ព្រមទាំងបង្ករការភ័យខ្លាចដល់អ្នកជុំវិញ បង្កភាពអនាធិបតេយ្យក្នុងសង្គម ចំណែកម៉ូតូត្រូវដកហូតយកទៅរក្សាទុករយៈពេល០៣ខែ នៅទីបញ្ជាការកងរាជអាវុធហត្ថខេត្តកំពង់ស្ពឺ៕
