(ស្ទឹងត្រែង)៖ នៅព្រឹកថ្ងៃទី១៨ ខែមិថុនា ឆ្នាំ២០២៦ មន្ត្រីរដ្ឋបាលព្រៃឈើខេត្តស្ទឹងត្រែង បានចុះប្រតិបត្តិការឆ្មក់ត្រួតពិនិត្យ និងបង្ក្រាបបទល្មើសសត្វព្រៃនៅក្នុងផ្សារសាមគ្គី ក្រុងស្ទឹងត្រែង ខេត្តស្ទឹងត្រែង ដោយបានរកឃើញ និងដកហូតសាច់សត្វព្រៃ ចំនួន៣ប្រភេទ ដែលមានទម្ងន់សរុបប្រមាណ៦០គីឡូក្រាម។

ប្រតិបត្តិការនេះ ធ្វើឡើងក្នុងគោលបំណងទប់ស្កាត់ និងបង្ក្រាបការជួញដូរ ដឹកជញ្ជូន និងលក់ដូរសត្វព្រៃខុសច្បាប់ ស្របតាមច្បាប់ស្តីពីព្រៃឈើ និងការអភិរក្សជីវចម្រុះ។ បន្ទាប់ពីការដកហូត សាច់សត្វព្រៃទាំងអស់ត្រូវបានយកទៅរក្សាទុកជាវត្ថុតាង និងចាត់ការតាមនីតិវិធីច្បាប់ជាធរមាន។

មន្ត្រីជំនាញបានបញ្ជាក់ថា មុនពេលសមត្ថកិច្ចទៅដល់ទីតាំងបង្ក្រាប អ្នកលក់សាច់សត្វព្រៃបានដឹងខ្លួនមុន និងរត់គេចខ្លួនចេញពីកន្លែងកើតហេតុភ្លាមៗ។ មន្ត្រីជំនាញបានអំពាវនាវដល់ប្រជាពលរដ្ឋ បញ្ឈប់ការបរបាញ់ ការដឹកជញ្ជូន ការជួញដូរ និងការបរិភោគសត្វព្រៃខុសច្បាប់ ដើម្បីរួមចំណែកអភិរក្សធនធានធម្មជាតិ និងជីវចម្រុះឲ្យបានគង់វង្សសម្រាប់មនុស្សជំនាន់ក្រោយ។

មន្ត្រីជំនាញនឹងបន្តពង្រឹងការត្រួតពិនិត្យ និងបង្ក្រាបបទល្មើសពាក់ព័ន្ធនឹងសត្វព្រៃនៅតាមទីផ្សារ និងតំបន់គោលដៅនានាផងដែរនៅក្នុងភូមិសាស្រ្តខេត្តស្ទឹងត្រែងផងដែរ៕