(កំពង់ចាម)៖ ក្នុងគោលដៅកែលម្អសោភ័ណភាពក្រុងកំពង់ចាម លោក អ៊ុន ចាន់ដា អភិបាលខេត្ត នៅព្រឹកថ្ងៃទី១៨ ខែមិថុនា ឆ្នាំ២០២៦នេះ បានដឹកនាំក្រុមការងារ ចុះត្រួតពិនិត្យផែនការឆ្ពោះទៅការជួសជុលច្រាំងទន្លេ ក្នុងសង្កាត់កំពង់ចាម ក្រុងកំពង់ចាម ដែលបានទទួលរងគ្រោះដោយសារទឹកជំនន់ទន្លេមេគង្គ នាពេលកន្លងមក។

តាមមន្ត្រីរដ្ឋបាលខេត្តកំពង់ចាម បានឲ្យដឹងថា បន្ទាប់ពីដំណើរសុំកិច្ចអន្តរាគមន៍ពីសំណាក់ក្រសួងធនធានទឹក និងឧតុនិយម លោក ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម បានសហការជាមួយរដ្ឋបាលខេត្ត និងមន្ទីរធនធានទឹក និងឧតុនិយមខេត្តកំពង់ចាម និងបានដាក់ចេញនូវវិធានការ អន្តរាគមន៍ជាបណ្ដោះអាសន្ន ដើម្បីទប់ស្កាត់ការបាក់ស្រុតច្រាំងទន្លេមេគង្គជាបន្តបន្ទាប់ទៀត ដោយប្រើប្រាស់បាវខ្សាច់ (GeoTextile) រហូតមកពេលនេះសម្រេច រួចរាល់១០០ភាគរយ។

មន្ត្រីដដែលបានរំលឹកថា ហេតុការណ៍បាក់ស្រុតច្រាំងទន្លេមេគង្គ ស្ថិតនៅក្នុងភូមិសាស្ត្រខាងលើ បានកើតឡើងកាលពីយប់ថ្ងៃទី៣០ ខែមករា ឆ្នាំ២០២៦។ ច្រាំងទន្លេនេះ បានកសាងតាំងពីឆ្នាំ២០១២ ដោយរដ្ឋបាលខេត្តកំពង់ចាម។

ទំហំនៃការខូចខាត រួមមាន៖ ១៖ ផ្នែកខាងលើ បាក់ស្រុតការ៉ូឡាបណ្តោយប្រវែង ៧០ម៉ែត្រ ទទឹង១.១ម៉ែត្រ និងកម្ពស់ចាប់ពី ០.៣ម៉ែត្រ-១.៦ម៉ែត្រ និង២៖ ផ្នែកខាងក្រោម បាក់ស្រុតបេតុងបណ្តោយប្រវែង៧០ម៉ែត្រ ទទឹង៣២ម៉ែត្រ ក្នុងនោះបញ្ហាប្រឈមប្រវែង៣៥ម៉ែត្រ កម្ពស់ចាប់ពី០.១ម៉ែត្រ-០.៣ម៉ែត្រ៕