(ពោធិ៍សាត់)៖ នៅព្រឹកថ្ងៃព្រហស្បតិ៍ ៤កើត ខែបឋមាសាឍ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី១៨ ខែមិថុនា ឆ្នាំ២០២៦ សាខាកាកបាទក្រហមកម្ពុជាខេត្តពោធិ៍សាត់ បានរៀបចំពិធីសូត្រមន្តចម្រើនព្រះបរិត្ត ដើម្បីថ្វាយព្រះពរជ័យសិរីមង្គល ក្នុងឱកាសព្រះរាជពិធីបុណ្យចម្រើនព្រះជន្មវឌ្ឍនមង្គលគម្រប់ ៩០ យាងចូល ៩១ព្រះវស្សា សម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ក្នុងសេរីភាព សេចក្តីថ្លៃថ្នូរ និងសុភមង្គល ព្រះប្រធានកិត្តិយសកាកបាទក្រហមកម្ពុជា។

ពិធីដ៏មហាកិត្តិយសនេះ បានប្រព្រឹត្តទៅនៅវត្តបាកាន ឃុំត្រពាំងជង ស្រុកបាកាន ក្រោមអធិបតីភាព លោក ម៉ក់ រ៉ា ប្រធានក្រុមប្រឹក្សាខេត្ត និងជាអនុប្រធានកិត្តិយសសាខាកាកបាទក្រហមកម្ពុជាខេត្ត និងលោក ហៀម ឃួន អនុប្រធានអចិន្ត្រៃយ៍ គណៈកម្មាធិការសាខា តំណាងលោក ខូយ រីដា អភិបាលនៃគណៈអភិបាលខេត្ត និងជាប្រធានគណៈកម្មាធិការសាខា ដោយមានការនិមន្តព្រះសង្ឃចម្រើនព្រះបរិត្ត ស្របតាមព្រះរាជប្បវេណី និងគន្លងព្រះពុទ្ធសាសនា។

ក្នុងនោះ ក៏មានការអញ្ជើញចូលរួមពីសមាជិក សមាជិកាក្រុមប្រឹក្សាខេត្ត គណៈកិត្តិយសសាខា អនុសាខាក្រុងស្រុក មន្ទីរ អង្គភាពជុំវិញខេត្ត កងកម្លាំងប្រដាប់អាវុធ មន្ត្រីក្រុមប្រតិបត្តិសាខា អ្នកស្ម័គ្រចិត្ត និងយុវជនកាកបាទក្រហមកម្ពុជាយ៉ាងច្រើនកុះករ។

លោក ហៀម ឃួន តំណាងដ៏ខ្ពង់ខ្ពស់របស់លោកប្រធានគណៈកម្មាធិការសាខា និងសហការីទាំងអស់ បានសម្តែងនូវសេចក្តីសោមនស្សរីករាយ និងលំឱនកាយថ្វាយព្រះរាជសព្ទសាធុការពរ បវរសួស្តី សិរីវឌ្ឍនាជយាមហាប្រសើរ សូមព្រះអង្គប្រកបដោយព្រះរាជសុខភាពល្អបរិបូរណ៍ ព្រះកាយពលមាំមួន ព្រះបញ្ញាញាណភ្លឺថ្លា និងព្រះជន្មាយុយឺនយូរជាងរយព្រះវស្សា ដើម្បីគង់ប្រថាប់ជាមហាម្លប់ដ៏ត្រជាក់ត្រជំសម្រាប់ប្រជានុរាស្ត្រជាកូនចៅជ្រកកោនក្នុងក្តីសុខក្សេមក្សាន្តជានិច្ចនិរន្តរ៍។

លោក ហៀម ឃួន បានអភិវន្ទថ្វាយនូវព្រះរាជកតញ្ញូតាធម៌ដ៏ជ្រាលជ្រៅបំផុត ចំពោះព្រះរាជបូជនីយកិច្ចដ៏ឧត្តុង្គឧត្តមរបស់សម្តេចព្រះមហាក្សត្រី ដែលបានចូលរួមចំណែកកសាងសមិទ្ធផលជាប្រវត្តិសាស្ត្រជាច្រើនសម្រាប់ជាតិមាតុភូមិ។ ពិសេសគឺ "ព្រះរាជវីរគំរូផ្នែកមនុស្សធម៌" ដែលព្រះអង្គតែងតែប្រោសព្រះរាជូបត្ថម្ភគាំទ្រកាកបាទក្រហមកម្ពុជាគ្រប់កាលៈទេសៈ ដែលជាកម្លាំងចិត្តដ៏ធំធេងដល់សម្តេចកិត្តិព្រឹទ្ធបណ្ឌិត ប្រធានកាកបាទក្រហមកម្ពុជា ក្នុងការបំពេញបេសកកម្មមនុស្សធម៌ដើម្បីឧត្តមប្រយោជន៍ជាតិ សាសនា ព្រះមហាក្សត្រ។

ឆ្លៀតក្នុងឱកាសនៃពិធីដ៏មានអត្ថន័យនេះ លោក ម៉ក់ រ៉ា និងលោក ហៀម ឃួន បានប្រគេនទេយ្យទានដល់ព្រះមន្ត្រីសង្ឃ ចំនួន៩អង្គ និងចែកថវិកាជូនដល់យាយជី តាជី ដែលបានអញ្ជើញមកចូលរួមផងដែរ៕