(ព្រះសីហនុ)៖ លោក ម៉ាង ស៊ីណេត ប្រធានគណៈកម្មាធិការសាខាកាកបាទក្រហមកម្ពុជាខេត្តព្រះសីហនុ បានដឹកនាំសប្បុរសធម៌ និងមន្ត្រីប្រតិបត្តិសាខា មន្ត្រីរាជការនៅតាមមន្ទីរអង្គភាព និងភ្ញៀវកិត្តិយសជាច្រើនរូប នាំយកទេយ្យវត្ថុ និងបច្ច័យប្រគេនដល់ព្រះសង្ឃគង់នៅវត្តមុនីវង្ស កំពង់សីលា ដើម្បីអបអរសាទរព្រះរាជពិធីបុណ្យចម្រើន ព្រះជន្មគម្រប់ខួប ៩០ព្រះវស្សា យាងចូល៩១ព្រះវស្សារបស់សម្តេចព្រះមហាក្សត្រី នរោត្តម មុនិនាថ សីហនុ ព្រះប្រធានកិត្តិយសកាកបាទក្រហមកម្ពុជា។

នាឱកាសដ៏វិសេសវិសាលនេះ ទូលព្រះបង្គំជាថ្នាក់ដឹកនាំ និងសមាជិក សមាជិកា យើងខ្ញុំទាំងអស់គ្នា សូមបួងសួងដល់គុណបុណ្យព្រះរតនៈត្រ័យ បារមីថែរក្សាព្រះមហាស្វេតឆ័ត្រ វត្ថុសក្តិសិទ្ធក្នុងលោកសូមជួយបីបាច់ថែរក្សា សម្តេចព្រះមហាក្សត្រីនរោត្តម មុនិនាថ សីហនុ ព្រះវររាជមាតាជាតិខ្មែរជាទីសក្ការៈដ៏ខ្ពង់ខ្ពស់ សូមព្រះអង្គមានព្រះបរមសុខគ្រប់ប្រការ ដើម្បីគង់ប្រថាប់ជាម្លប់ដ៏ត្រជាក់ដល់ប្រជារាស្រ្ត ជាកូនចៅ ចៅទួតរបស់ព្រះអង្គ សូមព្រះអង្គប្រកបតែនឹងពុទ្ធពរទាំងបួនប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ។

ក្នុងឱកាសដ៏ថ្លៃថ្លានេះ ប្រធានគណៈកម្មាធិការសាខាបាននាំយកអំណោយកាកបាទក្រហមកម្ពុជាខេត្តព្រះសីហនុ ចែកជូនប្រជាពលរដ្ឋមានជីវភាពខ្វះខាត ជនចាស់ជរា ជនមានពិការភាព ស្ដ្រីមេម៉ាយ កុមារកំព្រា និងអ្នកមានជំងឺប្រចាំកាយចំនួន៣០០គ្រួសារ នៅបរិវេណវត្តមុនីវង្ស កំពង់សីលា ស្ថិតឃុំកំពង់សីលា ស្រុកកំពង់សីលា ខេត្តព្រះសីហនុ។

ជាមួយគ្នានេះ លោក ម៉ាង ស៊ីណេត បានសំណេះសំណាលជាមួយប្រជាពលរដ្ឋងាយរងគ្រោះក្នុងស្រុកកំពង់សិលា ព្រមទាំងថ្លែងអំណអគុណដល់ លោក លោកស្រីសប្បុរសជន ប្រធានមន្ទីរ អង្គភាព ជុំវិញខេត្ត ជាពិសេសក្រុមការងារកាកបាទក្រហមខេត្ត អនុសាខា និងអ្នកស្ម័គ្រចិត្តកាកបាទក្រហម បានចូលរួមជាមួយកាកបាទក្រហម ស្របតាមការចង្អុលបង្ហាញរបស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ហើយសម្តេចកិត្តិព្រឹទ្ធបណ្ឌិត បានផ្ដាំផ្ញើនាំនូវការសួរសុខទុក្ខ និងសេចក្តីនឹករលឹកពីសម្តេចកិត្តិព្រឹទ្ធបណ្ឌិតជូនចំពោះប្រជាពលរដ្ឋនៅទីនេះ។

ក្រោមការដឹកនាំរបស់រាជរដ្ឋាភិបាលកម្ពុជា បានគិតគូរពីជីវភាពរស់នៅរបស់ប្រជាពលរដ្ឋទីទ័លក្រ ដោយបង្កើតមូលនិធិសមធម៌ ក្នុងការផ្តល់ភាពងាយស្រួល ហើយក៏ជាសមិទ្ធិផលដែលប្រទេសកម្ពុជាក្រោមម្លប់ នៃសុខសន្តិភាព។ លោកក៏បានបានជូនពរបងប្អូនពុក ម៉ែ ពូ មីងមានសុខភាពល្អ កម្លាំងកាយខ្លាំងក្លា និងមានអាយុ១០០ឆ្នាំគ្រប់ៗគ្នា។

ជាការយកចិត្តទុកដាក់ពុំដែលភ្លេចនោះ លោក គាំ សុខុម នាយកសាខា បានផ្សព្វផ្សាយវិធីសាស្ត្រ ដើម្បីឲ្យមានសុខភាពល្អក្នុងការរស់នៅប្រចាំថ្ងៃ ដូចជាធ្វើ លំហាត់ប្រាណជាប្រចាំ ពិនិត្យសុខភាពប្រាំមួយខែម្ដង កាត់បន្ថយហូបផ្អែម និងប្រៃ។

សូមជម្រាបថា គ្រឿងឧបភោគបរិភោគ និងបច្ច័យ ដែលបានប្រគេននាពេលនេះរួមមាន៖ អង្ករ១៥០គីឡូក្រាម, មី៤កេស, ត្រីខ៥យួរ, ទឹកត្រី៨យួរ, ទឹកសុទ្ធ៦កេស, និងបច្ច័យចំនួន២លាន២០ម៉ឺនរៀល។

ចំណែកសម្ភារដែលបានផ្ដល់ជូនក្នុងមួយគ្រួសារទទួលបាន៖ អង្ករ២៥គីឡូក្រាម, ត្រីខ១យួរ, មី១កេស, ទឹកត្រី១យួរ, កន្ទេល១, ទឹកសុទ្ធ១កេស, ឃីត១ (មុង១ ភួយ១ ក្រមា១ សារុង១) នំសណ្ដែកដី១កញ្ចប់ និងថវិកាចំនួន៥ម៉ឺនរៀលផងដែរ៕