(កណ្ដាល)៖ លោក ឃឹម សំភារ អភិបាលក្រុងតាខ្មៅ បានចាត់ឲ្យក្រុមការងារចុះផ្អាកសំណង់រឹង៣ទីតាំងផ្សេងគ្នា ដែលលួចសាងសង់ដោយមិនសុំច្បាប់អនុញ្ញាតត្រឹមត្រូវ។

ទីតាំងទាំង៣ ដែលអភិបាលក្រុងបង្គាប់ឲ្យផ្អាកនោះគឺ៖

*ទី១៖ ស្ថិតនៅភូមិស្វាយពងអង្ក្រង សង្កាត់កោះអន្លង់ចិន ដោយហាមទៅលើសំណង់រឹងមាំរបស់បុគ្គលឈ្មោះ គីម ដែលអាជ្ញាធរតម្រូវឲ្យរុះរើចេញវិញទាំងអស់
*ទី២៖ ស្ថិតនៅភូមិព្រែកត្រែង សង្កាត់សិត្បូ ដោយហាមទៅលើសំណង់រឹងមាំរបស់បុគ្គលឈ្មោះ គង់ សុវណ្ណ ដែលអាជ្ញាធរតម្រូវឲ្យរុះរើចេញទាំងអស់
*ទី៣៖ ស្ថិតនៅភូមិកោះគរ សង្កាត់រការខ្ពស់ ដោយហាមទៅលើសំណង់រឹងមាំរបស់បុគ្គលឈ្មោះ ឈុន ម៉ៅ ដែលអាជ្ញាធរតម្រូវឲ្យរុះរើចេញទាំងអស់។

ថ្លែងប្រាប់ភ្នាក់ងារ Fresh News នៅថ្ងៃទី១៨ ខែមិថុនា ឆ្នាំ២០២៦នេះ លោកអភិបាលក្រុង បានអរគុណពលរដ្ឋ ដែលរាយការណ៍ជុំវិញករណីរំលោភយកច្រាំងទន្លេ មកធ្វើសំណង់រឹងមាំដោយគ្មានច្បាប់អនុញ្ញាត្តនេះ។ ទោះយ៉ាងនេះក្ដី លោកទទូចឲ្យម្ចាស់ទីតាំងទាំងអស់ និងពលរដ្ឋទាំងឡាយណា ដែលមានបំណងសង់ទប់ច្រាំងទន្លេ ឬចង់អភិវឌ្ឍន៍អ្វីមួយនៅលើដីចំណីទន្លេ សូមមេត្តាមកសុំច្បាប់ដល់សាលាក្រុងឲ្យបានត្រឹមត្រូវជាមុនសិន។

សូមជម្រាបថា រដ្ឋបាលក្រុងតាខ្មៅ បានធ្វើការកែសម្រួល និងរៀបចំសណ្ដាប់ធ្នាប់ផ្លូវសាធារណៈដែលត្រូវបានរំលោភយកដោយពលរដ្ឋអមសងខាងផ្លូវ និងចំណីទន្លេ បឹង អូ ស្ទឹងជាដើម ដែលប្រតិបត្តិការនេះ ដើម្បីរំដោះចិញ្ចើមផ្លូវ និងចំណីដីសាធារណៈឲ្យបានស្អាត មានសណ្ដាប់ធ្នាប់ ទូលាយ ហើយទទួលបានការសាទរជាពន្លឹកពីសំណាក់ប្រជាពលរដ្ឋពេញក្រុងតាខ្មៅតែម្ដង។ ប៉ុន្តែបែរជាមានករណីមួយរបស់អ្នកលុយទាំង៣នាក់ខាងលើ លួចសាងសង់សំណង់រឹងមាំចូលដីចំណីទន្លេស្ងាត់ៗទៅវិញ ដែលផ្ទុយពីគោលបំណងរបស់រដ្ឋបាលខេត្ត និងរដ្ឋបាលក្រុងតាខ្មៅ ដែលបានខិតខំធ្វើការយ៉ាងសស្រាក់ស្រាំ។

អភិបាលខេត្តកណ្ដាល លោក គួច ចំរើន កាលពីពេលថ្មីៗនេះ ក្នុងកម្មវិធីចែកប្លង់ដីជូនពលរដ្ឋនីតាមបណ្ដាក្រុង-ស្រុកមួយចំនួន បានលើកឡើងពីបញ្ហាសំណង់យ៉ាងច្រើន ដែលលួចសាងសង់ដោយគ្មានសុំច្បាប់ទម្លាប់នោះឡើយ។ លោកអភិបាលខេត្ត ណែនាំឲ្យរដ្ឋបាលស្រុក-ក្រុងទាំងអស់ យកចិត្តទុកឲ្យមែនទែនទៅលើបញ្ហានេះ និងស្នើរពលរដ្ឋទាំងអស់ មានមនសិការគោរពច្បាប់ទាំងអស់គ្នា៕