(កណ្ដាល)៖ ក្រុមក្មេងទំនើងចំនួន៥នាក់ ប្រដាប់ដោយកាំបិតផ្គាក់ ដំបង និងចំពាមកៅស៊ូ ជិះម៉ូតូប្រសាចពេញផ្លូវបណ្ដាលឲ្យអ្នកភូមិមានការភិតភ័យ ហើយប្ដឹងនគរបាលឲ្យជួយអន្តរាគមន៍ ហើយត្រូវបានចាប់ក្របួចយកទៅសួរនាំនៅប៉ុស្ដិ៍នគរបាលរដ្ឋបាល ដើម្បីចាត់ការតាមនីតិវិធី។ ករណីនេះ បានកើតឡើងកាលថ្ងៃទី១៤ ខែមិថុនា ឆ្នាំ២០២៦ នៅភូមិទួលស្រម៉រ ឃុំពើក ស្រុកអង្គស្នួល ខេត្ដកណ្ដាល។

ប្រភពព័ត៌មានពីនគរបាល បានឲ្យដឹងនៅថ្ងៃទី១៨ ខែមិថុនា ឆ្នាំ២០២៦នេះថា ជនសង្ស័យចំនួន៥នាក់ ទី១៖ឈ្មោះ ឈឿន រតនៈ ហៅក្រៅណាក់ អាយុ១៨ឆ្នាំ (អ្នកកាន់កាំបិត), ទី២៖ឈ្មោះ ពៅ សោភណ្ឌ អាយុ១៦ឆ្នាំ (អ្នកកាន់ជំពាម), ទី៣៖ឈ្មោះ ទី ប៊ុនហេង អាយុ១៧ឆ្នាំ, ទី៤៖ឈ្មោះ សែន វិចិត្រ អាយុ១៩ឆ្នាំ និងទី៥៖ឈ្មោះ ហឿន ផានី អាយុ១៧ឆ្នាំ។ វត្ថុតាងចាប់យក ម៉ូតូ៣គ្រឿង, កាំបិតផ្គាក់ ដងឈើចំនួន១ប្រហែង ៨០សង់ទីម៉ែត្រ និងជំពាមកៅស៊ូ ដងជ័រចំនួន១។

នៅមុនពេលកើតហេតុកម្លាំងសមត្ថកិច្ចប៉ុស្ដិ៍នគរបាលរដ្ឋបាលពើក បានទទួលសេចក្តីរាយការណ៍ពីប្រជាពលរដ្ឋល្អថា មានក្មេងទំនើងមួយក្រុមដៃកាន់ដោយកាំបិតផ្គាក់ និងចំពាមកៅស៊ូ បានធ្វើសកម្មភាពជិះម៉ូតូប្រសាចពេញផ្លូវ នៅត្រង់ចំណុចកើតហេតុខាងលើ។ ក្រោយទទួលបានសេចក្ដីរាយការណ៍កម្លាំងប៉ុស្ដិ៍ សហការជាមួយកម្លាំងផ្នែកជំនាញ រួមជាមួយប្រជាការពារ បានធ្វើការចេញល្បាតប្រទាក់ក្រឡាពួនស្ទាក់រហូតធ្វើការឃាត់ខ្លួន ក្រុមជនសង្ស័យរួមទាំងវត្ថុតាងយកទៅអធិការដ្ឋាននគរបាលស្រុកអង្គស្នួលដើម្បីសួរនាំតាមនីតិវិធី។

ប្រភពបន្តថា នៅចំពោះមុខសមត្ថកិច្ចក្រុមជនសង្ស័យទាំង៥នាក់ បានឆ្លើយសារភាពថាខ្លួន និងបក្ខពួកពិតជាបានកាន់កាំបិតផ្គាក់ និងជំពាមកៅស៊ូ ជិះម៉ូតូតាមដងផ្លូវពិតប្រាកដមែន។ ចំពោះករណីខាងលើនេះ កម្លាំងប៉ុស្ដិ៍ និងផ្នែកជំនាញកសាងសំណុំរឿងតាមនីតិវិធី៕