(បន្ទាយមានជ័យ)៖ នៅរសៀលថ្ងៃទី១៨ ខែមិថុនា ឆ្នាំ ២០២៦ លោក អ៊ុំ រាត្រី អភិបាលខេត្តបន្ទាយមានជ័យ និងលោក វង្ស ពិសិដ្ឋ អនុរដ្ឋលេខាធិការ និងជានាយកគម្រោងកែលម្អ គ្រប់គ្រងបរិស្ថានក្រុងជុំវិញបឹងទន្លេសាបជំហានទី២ ដឹកនាំកិច្ចប្រជុំពិនិត្យវឌ្ឍនភាពគម្រោង ជាមួយប្រតិភូធនាគារអភិវឌ្ឍន៍អាស៊ី (ADB) នៃគម្រោងកែលម្អគ្រប់គ្រងបរិស្ថានក្រុង ជុំវិញបឹងទន្លេសាបជំហានទី២ ទីលានទុកដាក់សំរាមចាស់ និងទីលានទុកដាក់សំរាមថ្មី ក្នុងក្រុងសិរីសោភ័ណ ជាមួយមន្ត្រីបច្ចេកទេស។

លោក វង្ស ពិសិដ្ឋ អនុរដ្ឋលេខាធិការ និងជានាយកគម្រោងកែលម្អគ្រប់គ្រងបរិស្ថានក្រុងជុំវិញបឹងទន្លេសាបជំហានទី២ បានលើកឡើងថា គម្រោងកែលម្អគ្រប់គ្រងបរិស្ថានក្រុងជុំវិញបឹងទន្លេសាបជំហានទី២នេះ និងធ្វេីឲ្យក្រុងមានភាពល្អប្រសេីរឡេីង តាមរយៈកែរៀបចំទីលានទុកដាក់សំរាម ប្រកបដោយប្រសិទ្ធភាព ការរៀបចំបណ្តាញលូទឹកកខ្វក់ជាដេីម ក្នុងការជួយលើកកម្ពស់ការរស់នៅរបស់ប្រជាពលរដ្ឋ ប្រកបដោយអនាម័យបរិស្ថាន និងជីវភាពរស់នៅប្រកបដោយផាសុកភាព។

ក្នុងនាមអាជ្ញាធរខេត្ត លោក អ៊ុំ រាត្រី បានថ្លែងអំណរគុណដល់ក្រសួងសាធារណការ និងដឹកជញ្ជូន ក៏ដូចជាគម្រោងកែលម្អគ្រប់គ្រងបរិស្ថានក្រុងជុំវិញបឹងទន្លេសាបជំហានទី២ ដែលកំពុងអនុវត្ត នៅក្នុងក្រុងសិរីសោភ័ណ ដែលជិតនឹងបញ្ចប់នូវគម្រោងនេះនៅចុងខែមិថុនាខាងមុខ។ លោកអភិបាលខេត្តជំរុញដល់ក្រុមហ៊ុន ដែលបានអនុវត្តគម្រោងពន្លឿន នៃការជួសជុលផ្លូវដែលគម្រោងបានអនុវត្ត ឲ្យឆាប់រួចរាល់មុនពេលគម្រោងត្រូវបញ្ចប់។

មួយវិញទៀត ទាក់ទងទៅនឹងការគ្របគ្រងប្រព័ន្ធចម្រុះទឹកកខ្វក់ លោកអភិបាលខេត្ត បានសំណូមដល់ក្រសួង ក៏ដូចជាជំនាញបច្ចេកទេស ត្រូវធ្វេីការបណ្តុះបណ្តាញអ្នកជំនាញ ដែលគ្រប់គ្រងប្រព័ន្ធចម្រុះទឹកកខ្វក់ មុនបញ្ចប់គម្រោង ដេីម្បីធានាថា ពេលចម្រុះទឹកកខ្វក់រួចមានសុវត្ថិភាព និងមិនប៉ះពាល់ដល់មច្ឆជាតិ។

ឆ្លេីយតបទៅនឹងការសំណូមពរបស់អាជ្ញាធរខេត្ត ក្រុមហ៊ុនម៉ៅការ កែលម្អប្រព័ន្ធទឹកកខ្វក់ ក៏បានធ្វើការសន្យាពន្លឿនការជួសជុលចំណុចដែលនៅសេសសល់ ឲ្យបានឆាប់រួចរាល់ មុនគម្រោងត្រូវបញ្ចប់នៅថ្ងៃទី៣០ ខែមិថុនាខាងមុខ។

សូមបញ្ជាក់ថា គម្រោងកែលម្អគ្រប់គ្រងបរិស្ថានក្រុងជុំវិញបឹងទន្លេសាបជំហានទី២ គឺបានសាងសង់ទីលានទុកដាក់សំរាមក្រុងសិរីសោភ័ណ ដែលបានសាងសង់ឡើងនៅលើផ្ទៃដីសរុបទំហំ១១ហិកតា ដែលនឹងគ្រោងឲ្យប្រើប្រាស់រហូតដល់ឆ្នាំ២០៤០ សម្រាប់ប្រជាជនប្រមាណជាង១២៨,២០៨នាក់ ដែលរស់នៅក្នុងសង្កាត់ម្កាក់ កំពង់ស្វាយ ព្រះពន្លា ទឹកថ្លា អូរអំបិល ភ្នៀត និងកោះពង់សត្វ ក្រុងសិរីសោភ័ណ ខេត្តបន្ទាយមានជ័យ៕