(កណ្តាល)៖ បញ្ហាទូទាត់លុយថ្លៃទិញដីដែលនៅសេសសល់រវាងអ្នកឧកញ៉ា ហុង ពីវ និងប្រជា​ពល​រដ្ឋចំនួន២៦គ្រួសារ រស់នៅភូមិរទាំងត្បូង ឃុំភូមិត្បូង ស្រុកកៀនស្វាយ ខេត្ត​​កណ្តាល ត្រូវបានដោះស្រាយបញ្ចប់ ពោលអ្នកឧកញ៉ា ហុង ពីវ បានប្រគល់ថវិកាថ្លៃដីគ្រប់គ្រាន់តាម​ការព្រមព្រៀងរួចរាល់អស់ហើយ។

កាលពីថ្ងៃទី៦ ខែមិថុនា ឆ្នាំ២០២៦កន្លងទៅនេះ ប្រជាពលរដ្ឋទាំង២៦គ្រួសារខាងលើ តាមរយៈ សារព័ត៌មាន Fresh News បានអំពាវនាវថ្នាក់ដឹកនាំខេត្ត និងអាជ្ញាធរពាក់ព័ន្ធជួយរកដំណោះ​ស្រាយជូនពួកគាត់ បន្ទាប់​​លក់ដីជូនអ្នកឧកញ៉ា ហុង ពីវ តាមរយៈលោក ស៊ុម ធន អភិបាល​រង​ស្រុកកៀនស្វាយ ខេត្តកណ្តាល តែមិនទទួលបានលុយគ្រប់តាមតម្លៃដី ខណៈប្លង់ដីត្រូវបាន​កាត់​ជូន​អ្នកឧកញ៉ារួចរាល់ហើយនោះ។

បន្ទាប់ពីទទួលបានព័ត៌មានពាក់ព័ន្ធបញ្ហាខាងលើនេះ លោក គួច ចំរើន អភិបាលខេត្តកណ្តាល បានព្យាយាមសម្រួលដោះស្រាយ ដោយបានជជែកជាមួយភាគីក្រុមហ៊ុនរបស់អ្នកឧកញ៉ា ហុង ពីវ ហើយក៏បានដោះស្រាយបញ្ចប់ជាស្ថាពរ ដោយក្រុមហ៊ុនបានទូទាត់លុយនៅសេសសល់ជាង ១លាន ៣សែនដុល្លារនោះជូនទៅប្រជាពលរដ្ឋរួចរាល់ហើយ។

ប្រជាពលរដ្ឋបានចាត់ទុកបញ្ហារបស់ខ្លួន មិនមែនដោយសារក្រុមហ៊ុនរបស់អ្នកឧកញ៉ា ហុង ពីវ នោះទេ តែបណ្តាលមកពីលោក ស៊ុម ធន អភិបាលរងស្រុងកៀនស្វាយ ដែលជាអ្នកឈរឈ្មោះ​ទិញ​ដី​ជូនអ្នកឧកញ៉ា ហុង ពីវ។

តំណាងប្រជាពលរដ្ឋទាំង២៦គ្រួសារ បានថ្លែងអំណរគុណលោក គួច ចំរើន ដែលបានជួយសម្រប​សម្រួលដោះស្រាយបញ្ហារបស់ពួកគាត់បានចប់ជាស្ថាពរ និងទទួលបានលុយថ្លៃគ្រប់គ្រាន់តាមការ​ព្រមព្រៀងលក់ និងទិញ៕