(កំពង់ធំ)៖ ឃុំក្រយា ជាឃុំមួយក្នុងចំណោមឃុំទាំង៧ក្នុងស្រុកប្រាសាទបល្ល័ង្ក ខេត្តកំពង់ធំ ដែល​មាន​ប្រជាពលរដ្ឋរស់នៅយ៉ាងច្រើនកុះករប្រកបរបរស្រែចម្ការ និងអាជីវកម្មផ្សេងៗទៀត។ ក្នុងឃុំ​នេះ មានផ្លូវអភិវឌ្ឍន៍ជនបទមួយខ្សែដែលតភ្ជាប់ពីទីប្រជុំជនស្រុកប្រាសាទបាល្ល័ង្ក ឆ្ពោះទៅខាង​ស្រុកស្ទោងនៃខេត្តកំពង់ធំ។ ផ្លូវមួយខ្សែនេះ ជាបណ្តាញតភ្ជាប់យ៉ាងសំខាន់រវាងប្រជាពលរដ្ឋក្នុង​ស្រុកប្រាសាទបល្ល័ង្ក និងស្រុកស្ទោង ក៏ដូចជាបណ្តាឃុំនានាក្នុងស្រុកប្រាសាទបល្ល័ង្ក។

ការ​តភ្ជាប់នៃផ្លូវមួយខ្សែនេះ ប្រៀបដូចសសៃឈាមដ៏សំខាន់របស់ប្រជាពលរដ្ឋ ហើយក៏ជាហេតុនាំ​ឱ្យមានចរាចរណ៍ដ៏មមាញឹកដែរ។ ការធ្វើដំណើរពេលថ្ងៃមិនជាចំណោទនោះទេ ប៉ុន្តែការធ្វើ​ដំណើរ​ពេលរាត្រីវិញ ភាពងងឹតក្នុងស្បៃអន្ធការបានបង្កការលំបាក និងប្រឈមបញ្ហាជាច្រើនលើដង​វិថី។

ដោយមើលឃើញការប្រឈម និងការលំបាករបស់ប្រជាពលរដ្ឋ បេសកជនពិសេស​របស់​សម្តេច​តេជោ ហ៊ុន សែន គឺលោកអ្នកឧកញ៉ា ទ្រី ភាព ប្រធានគណៈពង្រឹងការងារក្នុងស្រុក​ប្រាសាទ​បល្ល័ង្ក បានចូលខ្លួនបញ្ចប់ការប្រឈម ដោយផ្តល់អំពូលភ្លើងសឡាចំនួន ២៥០​ដើម ដំឡើងនៅ​សងខាងផ្លូវក្នុងភូមិសាស្ត្រទីប្រជុំជនឃុំក្រយា ដែលជា​កន្លែងមានពល​រដ្ឋរស់​នៅច្រើន និងមាន​ចរាចរណ៍​មមាញឹក។

ភ្លើងភ្លឺចិញ្ចែងចិញ្ចាចពេលរាត្រីប្រហែលមិនមែនជារឿងប្លែកនោះទេ សម្រាប់អ្នករាជធានី និង​ទី​ប្រ​ជុំ​​​ជនខេត្ត ក្រុង។ ប៉ុន្តែសម្រាប់ទីជនបទដាច់ស្រយាល​ដែលភ្លើងបំភ្លឺតាម​ដង​ផ្លូវ​សា​ធា​រណៈ​មិន​ទាន់​មានទូលំទូលាយនោះ គឺពិតជារឿងចម្លែកសម្រាប់ប្រជាពលរដ្ឋ។ ទីដែលធ្លាប់តែងងឹត​សូន្យ​សុង​ក្នុងពេលរាត្រី ស្រាប់តែប្រែមកភ្លឺចិញ្ចែងចិញ្ចាចនោះ អ្នកឃុំក្រយាពិតជាប្លែកអារម្មណ៍​ណាស់ ហើយពន្លឺភ្លើងនេះក៏បាននាំមកនូវពន្លឺក្តីរីករាយដល់ពលរដ្ឋក្នុងឃុំក្រយា។

លើសពីអារម្មណ៍រីករាយ ការដាក់ភ្លើងបំភ្លឺផ្លូវពេលរាត្រីតាមដងវិថីលើដីជនបទ គឺបានជួយឱ្យការ​ដំណើរ​ទៅសាលារបស់សិស្សានុសិស្ស ការធ្វើដំណើរ និងដឹកជញ្ជូនកសិផល​របស់ប្រជាពលរដ្ឋ​បាន​​កាន់តែងាយស្រួល កាត់បន្ថយអារម្មណ៍ភ័យខ្លាចដែលធ្លាប់កើតមាន​កាល​ពីពេលងងឹត​មិន​ទាន់​មានភ្លើង ជាពិសេស គឺការរួមចំណែកកាត់បន្ថយគ្រោះថ្នាក់ចរាចរណ៍។

ជាមួយនឹងការទទួលបានភ្លើងបំភ្លឺផ្លូវជាលើកដំបូងក្នុងភូមិឋានខ្លួនរស់នៅកើតចេញពីទឹកចិត្តគិត​គូររបស់លោកអ្នកឧកញ៉ា ទ្រី ភាព នោះ អាជ្ញាធរ និងប្រជាពលរដ្ឋក្នុងឃុំក្រយា បានថ្លែងអំណរ​គុណយ៉ាងជ្រាលជ្រៅចំពោះលោកអ្នកឧកញ៉ា។ ពួកគេក៏រំពឹងថា លោកអ្នកឧកញ៉ា ទ្រី ភាព នឹង​បន្ត​​​ដំឡើងអំពូលសឡានៅតាមដងវិថីក្នុងឃុំនានានៅស្រុកប្រាសាទបល្ល័ង្ក ហើយចូលរួម​ចំណែក​កសាងសមិទ្ធផលដទៃទៀត ដើម្បីលើកកម្ពស់ការរស់នៅរបស់ប្រជាពលរដ្ឋទីជនបទឱ្យកាន់តែល្អ​ប្រសើរ។

សូមបញ្ជាក់ថា បន្ទាប់ពីទទួលបានសេចក្តីទុកចិត្តពីសម្តេចតេជោ ហ៊ុន សែន ប្រធានគណបក្ស​ប្រជា​​ជនកម្ពុជា ចាត់តាំងឱ្យធ្វើជាប្រធានគណៈពង្រឹងការងារនៅស្រុកប្រាសាទបល្ល័ង្ក ខេត្តកំពង់ធំ លោកអ្នកឧកញ៉ា ទ្រី ភាព បានយកចិត្តទុកដាក់លើការរស់នៅរបស់ប្រជាពលរដ្ឋ។ រយៈពេល​ជាង​មួយឆ្នាំកន្លងមកនេះ លោកអ្នកឧកញ៉ា ទ្រី ភាព និងក្រុមការងារតែងចុះមកកាន់ស្រុក​ប្រាសាទ​បល្ល័ង្កជាញឹកញាប់ ហើយបានកសាងសមិទ្ធផលមួយចំនួនរួចហើយបំពេញតាមបំណង​របស់​ប្រជា​ពលរដ្ឋ។ សមិទ្ធផលដែលសម្រេចនោះមានដូចជាការសាងសង់ប៉ុស្តិ៍នគរបាល ការជួស​ជុល​ស្ពាន​ឈើទ្រុឌទ្រោម ការសាងសង់ផ្លូវក្រួសក្រហមជាដើម។ ក្នុងនោះផ្លូវក្រួសក្រហមមួយខ្សែ​បាន​សាង​សង់រួចរាល់ និងមួយខ្សែទៀតកំពុងសាងសង់ ខណៈស្ពានបេឡេឆ្លងស្ទឹងស្ទោងនៅភូមិ​គេន្ទាក​​នឹងចាប់ផ្តើមការដ្ឋានឆាប់ៗខាងមុខនេះ។

បន្ថែមពីលើនោះ លោកអ្នកឧកញ៉ា ក៏បានដាក់ចេញកម្មវិធីឧតប្ថម្ភពលរដ្ឋក្នុង​ស្រុកប្រាសាទ​បល្ល័ង្ក ដែលមានសមាជិកទទួលមរណភាពនូវថវិកា ២០ម៉ឺនរៀល អង្ករ៥០គីឡូក្រាម ហើយ​សម្រាប់​អ្នក​រៀប​អាពាហ៍ពិពាហ៍ក្នុងមួយគូចងដៃ១០០ដុល្លារ។ តាមរយៈកម្មវិធី បានផ្សារភ្ជាប់​មនោ​សញ្ចេត​នា​ការស្រឡាញ់រាប់អានរវាងលោកអ្នកឧកញ៉ា និងប្រជាពលរដ្ឋនៅស្រុកប្រាសាទ​បល្ល័ង្ក​ប្រៀបបីដូច​ជា​គ្រួសារ៕