(កំពង់ឆ្នាំង)៖ ពលរដ្ឋមួយគ្រួសារមានជីវភាពក្រីក្រថែមទាំងមានសមាជិកក្នុងគ្រួសារចំនួន ៣នាក់មានពិការភាព និងចៅស្រីវ័យជំទង់ម្នាក់នៅក្នុងបន្ទុកដែរនោះ មានជំងឺចម្លែក ដែលធ្វើឱ្យនាងរស់នៅទាំងលំបាកលំបិនស្ថិតក្នុងវ័យកំពុងសិក្សា ហើយការរស់នៅរបស់គ្រួសារខាងលើនេះ ធ្វើឱ្យពលរដ្ឋដែលរស់នៅក្នុងភូមិផងរបងជាមួយមានការអាណិតអាសូរយ៉ាងក្រៃលែង និងតែងតែបានជួយឧបត្ថម្ភចំណីអាហារ ទៅតាមធនធានទាំងពលរដ្ឋអ្នករស់នៅជិតខាងក៏ដូចជាអាជ្ញាធរមូលដ្ឋានផងដែរ។

ក្រុមគ្រួសារខាងលើនេះរស់នៅក្នុងភូមិបាញ់ឆ្គោល ឃុំជ្រៃ បាក់ ស្រុករលាប្អៀរ ខេត្តកំពង់ឆ្នាំង ដោយមើលឃើញពីស្ថានភាពលំបាកលំបិនក្នុងការរស់នៅរបស់ក្រុមគ្រួសារនេះ នៅព្រឹកថ្ងៃទី១៨ ខែមិថុនា ឆ្នាំ២០២៦នេះដែរ លោក សំ សំណាង អាជ្ញាធរភូមិបាញ់ឆ្គោល បានស្នើសុំឲ្យអង្គភាពព័ត៌មាន fresh news ជួយផ្សព្វផ្សាយដើម្បីស្វែងរកសប្បុរសជនជួយឧបត្ថម្ភទៅតាមលទ្ធភាព ពិសេសជួយព្យាបាលក្មួយស្រីម្នាក់ ដែលរស់នៅក្នុងបន្ទុកជាមួយលោកតា និងលោកយាយ ដែលពួកគាត់ទាំង២នាក់ ក៏មានវ័យកាន់តែចាស់ណាស់ទៅហើយ និងមិនមានមុខរបរអ្វីក្រៅពីធ្វើស្រែ ដោយមិនមានលទ្ធភាពក្នុងការព្យាបាលចៅស្រីនោះឡើយ។

លោកតា ស៊ុំ ស៊ុន អាយុ ៧៧ឆ្នាំ និងលោកយាយថោង គាំ អាយុ ៧៣ឆ្នាំ មានមុខរបរធ្វើស្រែ ដែលមានចៅស្រីម្នាក់រស់នៅជាមួយមានជំងឺចម្លែកនោះ បានរៀបរាប់ឲ្យដឹងថា លោកតាមានកូនប្រុស ៤នាក់ ក្នុងនោះកូនប្រុស ៣នាក់ រស់នៅក្នុងបន្ទុកជាមួយគាត់ ចំណែកកូនប្រុសម្នាក់ទៀតទៅរស់នៅជាមួយប្រពន្ធតែបច្ចុប្បន្នក៏ពិការផងដែរ គឺពិការដោយគ្រោះថ្នាក់ចរាចរណ៍ ចំណែកកូនប្រុស ៣នាក់ ដែលរស់នៅជាមួយលោកតាសព្វថ្ងៃនេះ ២នាក់ពិការខ្វិនដៃជើងតាំងពីក្មេងៗ ដើរមិនរួចនោះទេ ចំណែកកូនប្រុសម្នាក់ទៀតពិការថ្លង់ខ្លាំង និយាយស្តាប់មិនឮនោះឡើយតែអាចធ្វើការងារបាន។

លោកតាបានរៀបរាប់ឲ្យដឹងទៀតថា ដោយឡែកចៅស្រីម្នាក់ ដែលត្រូវជាកូនរបស់ជនពិការត្រចៀក(ថ្លង់)តាំងពីឪពុកម្ដាយលែងលះគ្នាមកគឺបានមករស់នៅជាមួយនឹងលោកតា តាំងពីនាងនៅតូចបច្ចុប្បន្ននាងមានអាយុ ១៧ឆ្នាំហើយ រៀនថ្នាក់ទី៨ គឺរៀននៅវិទ្យាល័យ ប៊ុន រ៉ានី ហ៊ុនសែន រលាប្អៀរត្បូង, លោកតា បានឲ្យដឹងទៀតថា ចំណែកលោកយាយទើបតែវះកាត់តម្រងនោមមួយចំហៀង មិនទាន់ជាស្រួលបួលផង។

សព្វថ្ងៃនេះលោកតានិងលោកយាយមានការអាណិតអាសូរចៅស្រីយ៉ាងខ្លាំងដោយសារតែនាងមានជំងឺម្យ៉ាងនៅពេលនាងបន្ទោរបង់មិនដឹងខ្លួនចាំ បាច់ត្រូវស្លៀកខោទឹកនោមជាប់ជាប្រចាំ តាំងពីនាងនៅតូចរហូតដល់បច្ចុប្បន្ន ពេលនាងទៅរៀនម្ដងៗគឺនាងត្រូវដាក់ខោទឹកនោមតាមខ្លួន ដើម្បីផ្លាស់ប្ដូរជាប់រហូតដោយមួយថ្ងៃនាងត្រូវប្តូរខោទឹកនោម ៣ដងដែលធ្វើឱ្យនាងរស់នៅសែនលំបាកលំបិនជាទីបំផុត តែទោះជាលំបាកយ៉ាងនេះក៏ដោយក៏ចៅស្រីរបស់លោកតា ពុំបានបោះបង់នូវការសិក្សានោះដែរ គឺនាងនៅតែតស៊ូព្យាយាមរៀនសូត្រពុំដែលខកខានម្ដងណាឡើយ។

ក្មួយស្រី ថេង មរកត ដែលមានជំងឺចម្លែកម្យ៉ាងជាច្រើនឆ្នាំមកហើយនោះ បានសម្រេចចិត្តទម្លាយអំពីស្ថានភាពជម្ងឺរបស់នាងដែលនាងបានលាក់ទុកជាយូរខែឆ្នាំមកហើយនោះ ព្រោះតែនាងមានការខ្មាស់អៀន និងខ្លាចមិត្តភក្កិមានការរើសអើងចំពោះរូបនាង តែដោយសារតែនាងចង់ជាសះស្បើយ និងចង់មានជីវិតរស់នៅប្រកបដោយសុខភាពបរិបូរណ៍មាំមួនដូចមិត្តភក្កិដទៃទៀតនោះ ទើបនាងបានរៀបរាប់ប្រាប់នូវការពិតអំពីស្ថានភាពជម្ងឺរបស់នាងដែលកើតមកលើរូបនាងបច្ចុប្បន្ន ក្រែងមានសប្បុរ សជននិងថ្នាក់ដឹកនាំលោកជួយព្យាបាលរូបនាងឲ្យបានជាសះស្បើយ។

នាងប្រាប់ថាសព្វថ្ងៃនេះនាងមានការអាណិតអាសូរដល់លោកតា លោកយាយចាស់ៗ និងលោកឪពុកពិកាដែលខំធ្វើការសំណង់យកប្រាក់មកចិញ្ចឹមលោកតាលោកយាយ និងពូៗ ដែលពិកាទាំងពីរនាក់រួមទាំងផ្គត់ផ្គង់ឱ្យនាងរៀនសូត្រ និងចំណាយទិញខោទឹកនោមសម្រាប់នាងរយៈពេ លជាច្រើនឆ្នាំកន្លងមកនេះ។ នាងបានសន្យាថា បើនាងបានជាសះស្បើយពីជំងឺ មានសុខភាពល្អដូចគេនាងនឹងនឹងខិតខំសិក្សាយកចំណេះវិជ្ជាដើម្បីធ្វើការរកប្រាក់តបស្នងសងគុណលោកយាយលោកតានិងលោកឪពុកវិញ។

ជាចុងក្រោយក្រុមគ្រួសារលោកយាយ លោកតាទាំងអស់ បានលើកដៃសំពះគោរពស្នើសុំដល់ថ្នាក់ដឹកនាំគ្រប់ជាន់ ថ្នាក់ និងសប្បុរសជនដែលលោកមានចិត្តសប្បុរសធម៌ មេត្តាជួយសម្រាលនូវជីវភាពដល់ក្រុមគ្រួសាររបស់ពួកគាត់ទៅតាមលទ្ធភាព ពិសេសស្នើសុំជួយព្យាបាលជំងឺក្មួយស្រី ដែលនាងកំពុងខិតខំសិក្សាទាំងខ្លួនមានជំងឺក្រែងបានជា សះស្បើយពីជំងឺដ៏ចម្លែកមួយនេះ និងមានសុខភាពមាំមួនដូចគេដូចឯងដោយក្តីអនុគ្រោះផង។

សូមបញ្ជាក់ថា៖កាលពីថ្ងៃទី១៦ ខែមិថុនា ឆ្នាំ២០២៦ លោកស្រី កែ ច័ន្ទមុន្នី អ្នកតំណាងរាស្ត្រមណ្ឌលកំពង់ឆ្នាំង និងលោក សេង វិចិត្រ អភិបាលស្រុករលាប្អៀរ បានដឹកនាំក្រុមការងារអាជ្ញាធរមូលដ្ឋាន និងសប្បុរសជនយកអំណោយផ្ទាល់ខ្លួនរបស់លោកទាំងពីរ និងអំណោយរបស់សប្បុរសជន ជាគ្រឿងឧបភោគបរិភោគ និងថវិកាមួយចំនួនផ្ដ ល់ជូនក្រុមគ្រួសារលោកយាយ លោកតាខាងលើនេះ ដើម្បីជួយសម្រាលនូវជីវភាពរបស់ពួកគាត់បានមួយចំណែកផងដែរ៕