(បន្ទាយមានជ័យ)៖ កម្លាំងគណៈបញ្ជាការឯកភាព ខេត្តបន្ទាយមានជ័យ នៅថ្ងៃទី១៨ ខែមិថុនា ឆ្នាំ២០២៦នេះ បានបន្តប្រតិបត្តិការចុះត្រួតពិនិត្យទីតាំងមួយចំនួននៅក្នុងភូមិសាស្ដ្រក្រុងប៉ោយប៉ែត ខេត្ដបន្ទាយមានជ័យ ដោយរកឃើញជនជាតិបរទេស ៥៣នាក់ ដែលមួយចំនួនមិនមានលិខិតឆ្លងដែន តែមិនពាក់ព័ន្ធនឹងបទល្មើស Online Scams នោះទេ។

ប្រតិបត្ដិការនេះធ្វើឡើងក្រោមការបញ្ជា និងដឹកនាំផ្ទាល់ពីលោក អ៊ុំ រាត្រី ប្រធានគណៈបញ្ជាការឯកភាពខេត្ត និងសម្របសម្រួលនីតិវិធីពីលោក កើត វណ្ណារ៉េត ព្រះរាជអាជ្ញាអមសាលាដំបូងខេត្ត។

របាយការណ៍របស់រដ្ឋបាលខេត្ត បានបញ្ជាក់ថា ថ្ងៃទី១៨ ខែមិថុនា ឆ្នាំ២០២៦ ក្រុមការងារចម្រុះ ដោយមានការសម្របសម្រួលនីតិវិធីពីលោក សំរឹទ្ធ សុខុន ព្រះរាជអាជ្ញារងនៃអយ្យការអមសាលាដំបូងខេត្ត បានចុះត្រួតពិនិត្យរដ្ឋបាលចំនួន ៣ទីតាំង រកឃើញជនបរទេសសរុបចំនួន ៥២នាក់ ស្រី ១៣នាក់ ២សញ្ជាតិ រួមមាន៖ ឥណ្ឌូនេស៊ី ៤៩នាក់ ស្រី ១១នាក់ និងថៃ ៣នាក់ ស្រី ២នាក់។

បើតាមរបាយការណ៍បានឱ្យដឹងដូចនេះថា

ទីតាំងទី១៖ (ម្ចាស់ឈ្មោះ លាង ពុទ្ធី ) អគារកម្ពស់ ៥ជាន់ ២៧បន្ទប់ ជាបន្ទប់ស្នាក់នៅ ស្ថិតនៅភូមិសាមគ្គីមានជ័យ សង្កាត់អូរជ្រៅ ក្រុងប៉ោយប៉ែត មានអ្នកគ្រប់គ្រងឈ្មោះ អ៉ិន រដ្ឋា , មានជនជាតិឥណ្ឌូនេស៊ីស្នាក់នៅប្រមូលផ្ដុំចំនួន ៣២នាក់ ស្រី១០នាក់ ពុំមានសម្ភារសង្ស័យ តែបានអប់រំធ្វើកិច្ចសន្យា និងផាកពិន័យម្ចាស់ទីតាំងដែលមិនបានរាយការណ៍ពីវត្តមានជនបរទេស។

ទីតាំងទី២៖ ផ្ទះ ១ល្វែង កម្ពស់ ២ជាន់ នៅភូមិសាមគ្គីមានជ័យ សង្កាត់អូរជ្រៅ ក្រុងប៉ោយប៉ែត រកឃើញជនជាតិឥណ្ឌូនេស៊ី ១៧នាក់ ស្រី ១នាក់ ក្នុងនោះ ៩នាក់ប្រុស មិនមានលិខិតឆ្លងដែន។ បញ្ជូនជនជាតិឥណ្ឌូនេស៊ី ៩នាក់ ទៅមណ្ឌលកងវ៉ាខេត្ត។ ប្រគល់ឱ្យចៅសង្កាត់ស្រាវជ្រាវរកម្ចាស់ទីតាំង ធ្វើការផាកពិន័យ និងបិទទីតាំងជាបណ្ដោះអាសន្ន ករណីផ្ដល់ទីតាំងឲ្យជនបរទេសស្នាក់នៅខុសច្បាប់។

ទីតាំងទី៣៖ (ម្ចាស់ឈ្មោះ ហេង ដានី)ផ្ទះ ១ល្វែង កម្ពស់ ២ជាន់ នៅភូមិសាមគ្គីមានជ័យ សង្កាត់អូរជ្រៅ ក្រុងប៉ោយប៉ែត មានជនជាតិថៃស្នាក់នៅចំនួន ៣នាក់ ស្រី ២នាក់ ក្នុងនោះជនជាតិថៃ ២នាក់ ស្រី១នាក់ មិនមានលិខិតឆ្លងដែន បញ្ជូនទៅមណ្ឌលកងវ៉ា ដើម្បីបន្ដនីតិវិធី ហើយបានអប់រំណែនាំ និងផាកពិន័យម្ចាស់ទីតាំង៕