(កណ្ដាល)៖ ដោយសារតែជង្ហុកធំៗកើតក្រោយពេលមន្ទីរសាធារណៈការខេត្តកណ្ដាល កាយផ្លូវដាក់លូមក មានសភាពជ្រៅៗ ដែលបណ្ដាលឲ្យពលរដ្ឋមានការលំបាកក្នុងការធ្វើដំណើរ ខណៈដែលសិស្សសាលា និងពលរដ្ឋធ្វើដំណើរតាមរយៈម៉ូតូកើតមានករណីដួលបណ្ដាលឲ្យរបួសក៏មាននោះ បានញ៉ាំងឲ្យពលរដ្ឋ ស្នើរសុំលោក បូរី វង្សសានីត ប្រធានមន្ទីរសាធារណការ និងដឹកជញ្ជូនខេត្តកណ្ដាល មេត្តាត្រួតពិនិត្យមើលឡើងវិញ ចំពោះក្រុមការងារដែលចាក់បំពេញល្បាយថ្មមិនហាប់ណែន និងមិនបំពេញស្មើរផ្លូវថ្នល់កៅស៊ូ ។

ជាក់ស្ដែង ពលរដ្ឋបានផ្ញើរសារចូលគ្រុបមួយនារសៀលថ្ងៃទី ១៨ ខែមិថុនា ឆ្នាំ ២០២៦នេះ ដែលមានសំណេរស្នើរសុំដូចនេះថា «ជម្រាបសួរបងៗនិងក្រុមការងារដែលធ្វេីការជួយសម្របសម្រួលប្រជាជននៅក្រុងតាខ្មៅនេះ, ប្អូនមានបញ្ហាមួយដែលទាក់ទងទៅនឹងបញ្ហាផ្លូវនៅខាងជួរមាត់ទន្លេទល់មុខវត្តព្រែកសំរោង ចន្លោះជង្ហុកមួយនេះបានធ្វេីអោយបងៗប្រជាជនរួមទាំងនាងខ្ញុំផងដែរដែលរងគ្រោះថ្នាក់ មិនមានសញ្ញា រឺអ្វីមួយសម្គាល់សោះធ្វេីអោយអ្នកដំណេីរខ្លះគេចទាន់មិនអីទេ តែបេីគេចមិនទាន់ដួលពេញផ្លូវ ។ សូមបងៗដែលធ្វេីការសូមជួយមេត្តាសម្រួលផងជៀសវាងមានការគ្រោះថ្នាក់»។

សូមជម្រាបថា មន្ទីរសាធារណៈការ និងដឹកជញ្ជូនខេត្តកណ្ដាល បានធ្វើការកែសម្រួលប្រព័ន្ធលូរំដោះទឹកឡើងវិញទូទាំងក្រុងតាខ្មៅ ដែលសកម្មភាពការងារនេះមានភាពសស្រាក់សស្រាំ ហើយក្រុមការងារបានធ្វើការលើរឿងនេះទាំងយប់ទាំងថ្ងៃ ខណៈដែលចន្លោះប្រហោងមានតិចតួច ។

ពលរដ្ឋស្នើរសុំដោយសារតែពួកគេធ្លាប់រងគ្រោះដួលម៉ូតូជាបន្តបន្ទាប់ មិនមានចេតនាក្នុងការស្ដីបន្ទោសបង្អាប់អ្វីឡើយ មានតែអរគុណចំពោះការយកចិត្តទុកដាក់ចំពោះការធ្វើប្រព័ន្ធលូនេះ ក៍ព្រោះតែកន្លងទៅ ឲ្យតែភ្លៀងខ្លាំងម្ដងៗ ក្រុងតាខ្មៅស្ទើរតែក្លាយជាទន្ល លិចលង់រាប់ម៉ោងទម្រាំស្រកទឹកអស់ ៕