(កណ្ដាល)៖ រដ្ឋបាលស្រុកពញាឮ ខេត្តកណ្តាល បានរៀបចំសណ្ដាប់ធ្នាប់តាមផ្លូវជាតិលេខ៥ ក្នុងគម្រោងដាក់ប្រព័ន្ធលូរំដោះទឹក និងរៀបឥដ្ឋការ៉ូឡាឲ្យស្អាត ដើម្បីលើកកម្ពស់សោភ័ណភាពចំណីផ្លូវឲ្យស្រលះ ទូលាយ មានរបៀបរៀបរយ និងងាយស្រួលសម្រាប់ពលរដ្ឋអាចហាត់ប្រាណ និងដើរលំហែកាយបានយ៉ាងងាយស្រួល ពិសេសពេលភ្លៀងមកម្ដងៗ អាចរំដោះទឹកចេញបានលឿនរហ័ស មិនលិចដូចកាលមុន។

លោក ថន សុវណ្ណា អភិបាលស្រុកពញាឮ ឲ្យដឹងនៅថ្ងៃទី១៩ ខែមិថុនា ឆ្នាំ២០២៦ថា គម្រោងគឺរៀបចំតាមការណែនាំរបស់លោក គួច ចំរើន អភិបាលខេត្ត ដោយត្រូវរៀបចំសណ្ដាប់ធ្នាប់តាមដងផ្លូវជាតិលេខ៥ ឲ្យបានស្អាត និងរៀបចំដាក់លូ ដាក់ការ៉ូឡា ដើម្បីលើកកម្ពស់សោភ័ណភាពតាមដងផ្លូវ និងបម្រើដល់ផលប្រយោជន៍ពលរដ្ឋអមសងខាងផ្លូវ ដោយអាចដើរ-រត់ហាត់ប្រាណយ៉ាងងាយស្រួល ហើយសិស្សសាលាដើរ ឬជិះកង់ទៅរៀនដោយមិនបាច់ភ័យខ្លាចឡានធំៗលើផ្លូវដូចមុនឡើយ។

អភិបាលស្រុក សូមអរគុណបងប្អូនពលរដ្ឋទាំងអស់ ដែលបានចូលរួមសហការ ហើយក្រុមការងារនឹងពន្លឿនលើការងារនេះឲ្យឆាប់រហ័សបំផុតតាមដែលអាចធ្វើបាន។

លោក ប៉ក់ សុខលី ប្រធានក្រុមប្រឹក្សាឃុំពញាឮ បានឲ្យដឹងថា គម្រោងនេះ ពលរដ្ឋបានអបអរសាទរខ្លាំងណាស់ ព្រោះវាជួយលើកម្ពស់ម្រស់តាមដងផ្លូវ ហើយមុខផ្ទះពួកគាត់ក៏មានរបៀបរៀបរយ ស្អាត ងាយស្រួលដល់ពួកគាត់ ហាត់ប្រាណ ដើរលេង ឬដើរ-រត់ហាត់ប្រាណ ហើយក្មេងៗអាចជិះកង់ទៅរៀនបានយ៉ាងងាយស្រួល។ លោកសំណូមពរឲ្យក្រុមការងារពន្លឿនការងារឲ្យបានលឿន ដោយសារពលរដ្ឋលំបាកចេញ-ចូលផ្ទះ ព្រោះកាយផ្លូវរៀបស្មើរ តែមុខផ្ទះពួកគាត់នៅខ្ពស់ជាងផ្លូវបន្តិច។

លោក អឹម ថានុត្តម៉ូ អាយុ៣៧ឆ្នាំ និងលោកស្រី ជា ធី អាយុ៦៧ឆ្នាំ ពលរដ្ឋរស់នៅភូមិ-ឃុំ-ស្រុកពញាឮ បានថ្លែងអំណរគុណជាអនេកកប្បការដល់លោក គួច ចំរើន អភិបាលខេត្តកណ្ដាល, លោក ថន សុវណ្ណា អភិបាលស្រុកពញាឮ ដែលបានយកចិត្តទុកដាក់ទៅលើការរៀបចំសណ្ដាប់ធ្នាប់ ការដាក់ប្រព័ន្ធលូ និងរៀបឥដ្ឋការ៉ូឡានេះ ដែលធ្វើឲ្យពួកគាត់មានភាពងាយស្រួលជាងមុន ហើយមុខផ្ទះក៍ស្អាត មិនបាច់ភ័យ ឬលំបាកដោយលិចទឹកពេលភ្លៀងដូចមុន ហើយក្មេងៗអាចជិះកង់ទៅរៀនលើផ្លូវនេះក៍មានសុវត្ថិភាពផងដែរ។

ពលរដ្ឋបានសំណូមពរក្រុមការងារ មេត្តាជួយពន្លឿនការងារ ពោលគឺធ្វើឲ្យបានឆាប់រហ័ស ដោយសារតែពេលកាយដីមុខផ្ទះគាត់បែបនេះ បណ្ដាលឲ្យមានការលំបាកចេញ-ចូលផ្ទះ តែយ៉ាងណាក៍នៅតែសប្បាយចិត្ត៕