(ព្រះវិហារ)៖ ក្រសួងបរិស្ថាន និងរដ្ឋបាលខេត្តព្រះវិហារ នៅព្រឹកថ្ងៃទី១៩ ខែមិថុនា ឆ្នាំ២០២៦ បានរៀបចំពិធីបើកយុទ្ធនាការសម្អាតផ្លូវជាតិ ក្រោមប្រធានបទ «ផ្លូវជាតិគ្មានសំរាមផ្លាស្ទិក» ដែលប្រារព្ធធ្វើនៅបរិវេណ សាលាខេត្តព្រះវិហារ ក្រោមវត្តមានលោកស្រី ភុន កេសរ អនុរដ្ឋលេខាធិការក្រសួងបរិស្ថាន តំណាងលោកបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន និងលោក គីម រិទ្ធី អភិបាលខេត្តព្រះវិហារ ដោយមានការចូលរួមពីថ្នាក់ដឹកនាំខេត្ត មន្ត្រីរាជការ មន្ទីរ អង្គភាព ជុំវិញខេត្ត លោកគ្រូអ្នកគ្រូ សិស្សានុសិស្ស ជាច្រើនរូបទៀត។

លោកស្រី ភុន កេសរ បានថ្លែងថា យុទ្ធនាការនេះត្រូវបានរៀបចំឡើងក្នុងគោលបំណងលើកកម្ពស់ការយល់ដឹង និងបំផុសស្មារតីប្រជាពលរដ្ឋគ្រប់រូបឱ្យចូលរួមថែរក្សាអនាម័យបរិស្ថាន តាមរយៈការកាត់បន្ថយ និងបញ្ឈប់ការបោះចោលកាកសំណល់ប្លាស្ទិកដោយគ្មានសណ្តាប់ធ្នាប់ ដើម្បីរួមចំណែកកសាងដងផ្លូវជាតិឱ្យមានភាពបៃតង ស្អាត និងគ្មានការបំពុល ព្រមទាំងបង្កើនភាពទាក់ទាញសម្រាប់ភ្ញៀវទេសចរជាតិ និងអន្តរជាតិដែលមកទស្សនាខេត្តព្រះវិហារ។

លោកស្រី ភុន កេសរ បានថ្លែងបញ្ជាក់ទៀតថា ការសម្អាតបរិស្ថាន និងការកាត់បន្ថយសំណល់ប្លាស្ទិក មិនមែនជាកាតព្វកិច្ចរបស់ស្ថាប័នណាមួយតែឯងនោះទេ ប៉ុន្តែជាការទទួលខុសត្រូវរួមរបស់ប្រជាពលរដ្ឋគ្រប់រូប។ លោកស្រីបានអំពាវនាវឱ្យប្រជាពលរដ្ឋផ្លាស់ប្តូរទម្លាប់ប្រើប្រាស់ និងបោះចោលសំណល់ ដើម្បីរួមគ្នាកសាងបរិស្ថានស្អាត និងនិរន្តរភាពសម្រាប់មនុស្សជំនាន់ក្រោយ។

លោកស្រីអនុរដ្ឋលេខាធិការ ក៏បានថ្លែងបញ្ជាក់ទៀតថា «ការសម្អាតបរិស្ថាន មិនមែនជាតួនាទីរបស់បុគ្គលណាម្នាក់ឡើយ ប៉ុន្តែវាជាកាតព្វកិច្ច និងជាក្តីស្រឡាញ់របស់យើងទាំងអស់គ្នា ដើម្បីអនាគតមាតុភូមិដ៏ស្រស់បំព្រង»។

លោក គីម រិទ្ធី អភិបាលខេត្តព្រះវិហារ បានថ្លែងថា ការថែរក្សាអនាម័យបរិស្ថាន និងការកាត់បន្ថយសំណល់ប្លាស្ទិក គឺជាកត្តាសំខាន់ក្នុងការលើកកម្ពស់សោភ័ណភាពខេត្ត និងទាក់ទាញវិស័យទេសចរណ៍។

អភិបាលខេត្តព្រះវិហារ ក៏បានថ្លែងអំពាវនាវឱ្យមន្ត្រីរាជការ កងកម្លាំងប្រដាប់អាវុធ សិស្សានុសិស្ស និងប្រជាពលរដ្ឋទាំងអស់ បន្តចូលរួមអនុវត្តសកម្មភាពសម្អាតបរិស្ថាន និងបង្កើតទម្លាប់រស់នៅប្រកបដោយអនាម័យ ដើម្បីប្រែក្លាយខេត្តព្រះវិហារឱ្យក្លាយជាខេត្តស្អាត បៃតង និងមានភាពទាក់ទាញកាន់តែខ្លាំង។

លោក គីម រិទ្ធី បានថ្លែងគូសបញ្ជាក់ថា ការចាប់ផ្តើមពីទម្លាប់ល្អរបស់មនុស្សម្នាក់ៗ នឹងក្លាយជាកម្លាំងរួមដ៏ធំមួយក្នុងការសម្រេចគោលដៅ «កម្ពុជាស្អាត និងបៃតង» និងធានាបាននូវបរិស្ថានរស់នៅប្រកប ដោយគុណភាពសម្រាប់សង្គមទាំងមូល៕