(តាកែវ)៖ លោក សុខ ពុទ្ធិវុធ រដ្ឋលេខាធិការក្រសួងប្រៃសណីយ៍ និងទូរគមនាគមន៍ បានឲ្យដឹងថា នៅក្នុងឆ្នាំសិក្សា ២០២៥-២០២៦ ការអនុវត្តថ្នាលអប់រំឌីជីថល EBC (E-Learning and Blended Learning Platform) នៅតាមវិទ្យាល័យដែលមានមជ្ឈមណ្ឌលបច្ចេកវិទ្យាសហគមន៍ (ម.ប.ស.) ទាំង១៨ ក្នុងខេត្តតាកែវ បានប្រព្រឹត្តទៅដោយរលូន និងទទួលបានលទ្ធផលគួរជាទីកត់សម្គាល់។

ថ្លែងបែបនេះ នៅក្នុងកិច្ចប្រជុំបូកសរុបលទ្ធផលនៃការអនុវត្តថ្នាល EBC នៅតាមវិទ្យាល័យដែលមានមជ្ឈមណ្ឌលបច្ចេកវិទ្យាសហគមន៍ ​(CTC) ទាំង១៨ ក្នុងខេត្តតាកែវ ឆ្នាំសិក្សា ២០២៥-២០២៦​ និងទិសដៅការងារបន្ត» នៅព្រឹកថ្ងៃសុក្រ ទី១៩ ខែមិថុនា ឆ្នាំ២០២៦ ដោយមានការចូលរួមពីមន្រ្តីជាន់ខ្ពស់ក្រសួងអប់រំ និងអាជ្ញាធខេត្តតាកែវ​ និងនាយក នាយករង លោកគ្រូអ្នកគ្រូ វិទ្យាល័យទាំង៥៤ ក្នុងខេត្តតាកែវ។

លោក សុខ ពុទ្ធិវុធ បានលើកឡើងថា លោកបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្រ្តី រដ្ឋមន្រ្តីក្រសួងអប់រំ និងលោក ជា វ៉ាន់ដេត រដ្ឋមន្រ្តីក្រសួងប្រៃសណីយ៍ និងទូរគមនាគមន៍ តែងតែលើកទឹកចិត្តជាប់ជាប្រចាំ ឱ្យធ្វើការផ្សព្វផ្សាយ និងជំរុញការប្រើប្រាស់ថ្នាល EBC ឱ្យកាន់តែទូលំទូលាយ តាមរយៈការបណ្តុះបណ្តាល ការណែនាំជាក់ស្តែង និងការគាំទ្របច្ចេកទេសជាបន្តបន្ទាប់ ដោយបង្ហាញឱ្យឃើញនូវការរួមបញ្ចូលបច្ចេកវិទ្យាឌីជីថល ដូចជាប្រព័ន្ធ LMS ក្នុងការបង្រៀន និងរៀន និងក្លាយជាកត្តាសំខាន់ ក្នុងការពង្រឹងគុណភាពអប់រំ និងការអភិវឌ្ឍជំនាញឌីជីថលសម្រាប់កម្ពុជា។

លោក សុខ ពុទ្ធិវិធ បានលើកឡើងបន្តថា ជាក់ស្ដែងការអនុវត្តថ្នាលអប់រំឌីជីថល នៅតាមវិទ្យាល័យដែលមានមជ្ឈមណ្ឌលបច្ចេកវិទ្យាសហគមន៍ (ម.ប.ស.) ទាំង១៨ ក្នុងខេត្តតាកែវ បានប្រព្រឹត្តទៅដោយរលូន និងទទួលបាន លទ្ធផលគួរជាទីកត់សម្គាល់ វាបានបង្ហាញឱ្យឃើញពីដំណើរការនៃការរីកចម្រើនលើផ្នែកអប់រំឌីជីថលនៅកម្ពុជា ពោលគឺបរិវត្តន៍ឌីជីថលវិស័យអប់រំ ដើម្បីផ្លាស់ប្តូរវិធីសាស្រ្តបង្រៀន និងរៀន ប្រកបដោយគុណវឌ្ឍិ និងបរិយាបន្ន ដោយមានការចូលរួមចំណែកពីក្រសួងជំនាញរួមមាន ក្រសួងអប់រំ យុវជន និងកីឡា ក្រសួងប្រៃសណីយ៍និងទូរគមនាគមន៍ ក្រសួងព័ត៌មាន និងក្រសួងសេដ្ឋកិច្ចនិងហិរញវត្ថុ ដែលបាននិងកំពុងគាំទ្រដល់ដំណើរការប្រតិបត្តិការ កម្មវិធីនានាប្រកបដោយចក្ខុវិស័យវែងឆ្ងាយ។

បើតាមលោក សុខ ពុទ្ធិវុធ, លទ្ធផលដែលសម្រេចបានក្នុងឆ្នាំសិក្សា​ ២០២៥-២០២៦ គឺជាមូលដ្ឋានដ៏សំខាន់មួយសម្រាប់ការបន្តអភិវឌ្ឍវិស័យឌីជីថល និងការលើកកម្ពស់គុណភាពធនធានមនុស្សនៅក្នុងខេត្តតាកែវ ស្របតាមយុទ្ធសាស្ត្របរិវត្តកម្មឌីជីថលរបស់រាជរដ្ឋាភិបាលកម្ពុជា៕