អភិបាលខេត្តស្ទឹងត្រែង អំពាវនាវពលរដ្ឋផ្លាស់ប្តូរទម្លាប់ កុំទុកដីទំនេរចោល ត្រូវបង្កើនការដាំដុះ លើកកម្ពស់ជីវភាពរស់នៅ
19-06-2026 15:03
(ស្ទឹងត្រែង)៖ ថ្មីៗនេះ មន្ទីរកសិកម្ម រុក្ខាប្រមាញ់ និងនេសាទខេត្ត បានប្រារព្ធទិវាពិភពលោក ដើម្បីប្រយុទ្ធប្រឆាំងនឹងការធ្លាក់ចុះ គុណភាពដី និងគ្រោះរាំងស្ងួត ឆ្នាំ២០២៦ នៃUNCCD. ក្រោមប្រធានបទ «ការឲ្យតម្លៃ ការទទួលស្គាល់ ដើម្បីស្តារគុណភាពដីឡើងវិញ» ពិធីដ៏មានអត្ថន័យនេះ គឺមានការអញ្ជើញចូលរួមក្រោមអធិបតីភាពលោកស្រី ចាន់ ផលលឿន អនុរដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ លោក សរ សុពុត្រា អភិបាលខេត្តស្ទឹងត្រែង បានលើកឡើងថា នៅពេលយើងការពារធនធានធម្មជាតិ នោះធម្មជាតិ នឹងជួយយើងមកវិញ នៅជីវិតដ៏ស្រស់បំព្រង តែផ្ទុយទៅវិញ ចំពោះគ្រោះរាំងស្ងួត គ្រោះទឹកជំនន់ គ្រោះរញ្ជួយដី គឺកើតឡើងដោយសារមនុស្សមួយចំនួនបានបំផ្លាញធម្មជាតិ។
ទិវាដ៏មានសារៈសំខាន់នេះ ត្រូវបន្តរួបរួមគ្នាអភិរក្សធនធានធម្មជាតិ ជាមួយការប្រើប្រាស់ដីឲ្យអស់ពីលទ្ធភាព នៃការដាំដុះ ដំណាំឈើហូបផ្លែ រឺការដាំដើមឈើចម្រុះ មិនត្រឹមតែជួយការពារជីវចម្រុះប៉ុណ្ណោះទេ ថែមទាំងបង្កើតប្រាក់ចំណូលបន្ថែម និងលើកកម្ពស់ជីវភាពរស់នៅឲ្យកាន់តែប្រសើរឡើងផងដែរ។ លោក សរ សុពុត្រា បានអំពាវនាវដល់ប្រជាពលរដ្ឋឲ្យផ្លាស់ប្តូរទម្លាប់ ដោយកុំទុកដីទំនេរចោល ហើយត្រូវចូលរួមប្រើប្រាស់ដីទាំងនោះ ឲ្យអស់សក្តានុពល ដើម្បីប្រែក្លាយទីតាំងទាំងនោះ ជាសហគមន៍បៃតង។
លោកស្រី ចាន់ ផលលឿន អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានគូសបញ្ជាក់ថា ការប្រយុទ្ធប្រឆាំងនឹងការធ្លាក់ចុះគុណភាពដី និងគ្រោះរាំងស្ងួត មិនមែនជាកាតព្វកិច្ចរបស់បុគ្គលណាម្នាក់ឡើយ ប៉ុន្តែវាទាមទារឲ្យមានការចូលរួមយ៉ាងសកម្មពីគ្រប់ភាគីពាក់ព័ន្ធ ទាំងការបញ្ឈប់ការបំផ្លាញព្រៃឈើ និងការបង្កើនការដាំដុះឡើងវិញ ដើម្បីធានាថាដីនៅតែមានជីវជាតិសម្រាប់ទ្រទ្រង់សេដ្ឋកិច្ចកសិកម្មរបស់ខេត្តស្ទឹងត្រែង ឲ្យមានភាពរឹងមាំ និងនិរន្តរភាពតទៅអនាគត។
លោក ទុំ នីរ៉ូ ប្រធានមន្ទីរកសិកម្ម រុក្ខប្រមាញ់ និងនេសាទខេត្ត បានលើកឡើងថា ទិវាពិភពលោកនេះ ត្រូវបានបង្កើតឡើងដោយមហាសន្និបាតអង្គការសហប្រជាជាតិ តាំងពីឆ្នាំ១៩៩៤ ដែលមានប្រទេស ជាសមាជិកចំនួន១៩៥ ចូលរួមប្ដេជ្ញាចិត្តសម្រេចឲ្យបាននូវការអភិវឌ្ឍប្រកបដោយនិរន្តរភាព បង្ការ រហោស្ថានកម្ម និងការធ្លាក់ចុះគុណភាពដី។ វិស័យកសិកម្ម គឺជាឆ្អឹងខ្នងសេដ្ឋកិច្ចដ៏សំខាន់របស់ខេត្តស្ទឹងត្រែង ដែលស្រូបយកកម្លាំងពលកម្មប្រជាពលរដ្ឋរហូតដល់៨៣%។
លោកប្រធានមន្ទីរ បានបន្តថា ផ្អែកលើរបាយការណ៍វឌ្ឍនភាពទិន្នផលឆ្នាំ២០២៥ ការបង្កបង្កើនផលស្រូវសម្រេចបាន ២៨,៩២០ហិកតា លើសផែនការ ២,៥៩% ធានាបាននូវសន្តិសុខស្បៀងលើស តម្រូវការជាង១៣,០០០តោន ព្រមទាំងមានផ្ទៃដីដាំដុះដំណាំសាកវប្បកម្ម និងឧស្សាហកម្ម ដូចជា ដំឡូងមី ស្វាយចន្ទី កៅស៊ូ សរុបជាង ១១ ម៉ឺនហិកតា សម្រាប់បម្រើការនាំចេញ។ ក្នុងស្ថានភាពបច្ចុប្បន្ន គិតត្រឹមខែឧសភា ឆ្នាំ២០២៦ ការងារដាំដុះស្រូវវស្សាសម្រេចបាន ២៣,៣៣% នៃផែនការសរុប២៩,៨៥០ហិកតា រួមជាមួយដំណាំឧស្សាហកម្មជាង៦០,០០០ហិកតាទៀត៕
