(ភ្នំពេញ)៖ ស្ថានប្រតិភូសហភាពអឺរ៉ុបប្រចាំកម្ពុជា នៅថ្ងៃទី១៩ ខែមិថុនា ឆ្នាំ២០២៦ បានអញ្ជើញអ្នកសារព័ត៌មាន ចូលរួមក្នុងជំនួបជជែកហូបអាហារពេលព្រឹក ក្រោមអធិបតីភាព លោក Igor Driesmans ឯកអគ្គរដ្ឋទូតសហភាពអឺរ៉ុបប្រចាំកម្ពុជា។

តំណាងស្ថានប្រតិភូសហភាពអឺរ៉ុបប្រចាំកម្ពុជា បានបង្ហោះសារថា «យើងខ្ញុំមានក្ដីសោមនស្សរីករាយ ដែលបានស្វាគមន៍បងប្អូនជានិពន្ធនាយក និងអ្នកសារព័ត៌មានក្នុងស្រុក មកកាន់ស្ថានប្រតិភូសហភាពអឺរ៉ុប នាព្រឹកនេះ។ គោលបំណងរបស់យើង គឺដើម្បីស្តាប់ ផ្លាស់ប្តូរគំនិតយោបល់ និងពង្រឹងទំនាក់ទំនងកាន់តែជិតស្និទ្ធជាមួយបងប្អូនអ្នកសារព័ត៌មានកម្ពុជា»។

តំណាងស្ថានប្រតិភូសហភាពអឺរ៉ុបប្រចាំកម្ពុជា បានបន្តថា «ការអង្គុយជជែកគ្នាលេងផ្ទាល់ៗក្នុងបរិយាកាសដ៏មានផាសុកភាពនេះ គឺជាឱកាសដ៏ល្អមួយក្នុងការទទួលបានមតិកែលម្អលើការងារការទូតសាធារណៈ និងគំនិតផ្តួចផ្តើមច្រកទ្វារសកល (Global Gateway) របស់យើង។ សូមអរគុណបងប្អូនអ្នកសារព័ត៌មានទាំងអស់គ្នា ដែលបានចំណាយពេលមកជួបជុំ និងជជែកគ្នាយ៉ាងរីករាយជាមួយយើងខ្ញុំនៅថ្ងៃនេះ!»៕