(សៀមរាប)៖ លោក ហួត ហាក់ រដ្ឋមន្ត្រីក្រសួងទេសចរណ៍ និងលោក វ៉ាន់ឡាល់វ៉ាវណា បាវីតឡុង (Vanlalvawna Bawitlung) ឯកអគ្គរដ្ឋទូតវិសាមញ្ញ និងពេញសមត្ថភាព នៃសាធារណរដ្ឋឥណ្ឌាប្រចាំព្រះរាជាណាចក្រកម្ពុជា នៅថ្ងៃទី១៩ ខែមិថុនា ឆ្នាំ២០២៦នេះ បានអញ្ជើញជាអធិបតីក្នុងព្រឹត្តិការណ៍ «ទិវាយោគៈអន្តរជាតិលើកទី១២» ឆ្នាំ២០២៦ នៅខេត្តសៀមរាប។

ថ្លែងក្នុងឱកាសនោះ លោក ហួត ហាក់ បានលើកឡើងថា ព្រឹត្តិការណ៍នេះ បានចូលរួមលើកកម្ពស់សុខភាពផ្លូវកាយផង, ផ្លូវចិត្តផង និងក៏បានជួយជំរុញការផ្សព្វផ្សាយគោលដៅទេសចរណ៍កម្ពុជា ឱ្យកាន់តែទូលំទូលាយទៅកាន់ទីផ្សារឥណ្ឌា ស្របពេលដែលឆ្នាំ២០២៦ ត្រូវបានបន្តជា «ឆ្នាំទេសចរណ៍កម្ពុជា-ឥណ្ឌា»។

លោកបានបន្តថា អ្វីដែលពិសេសសម្រាប់ព្រឹត្តិការណ៍នេះ គឺត្រូវបានរៀបចំបាននៅក្នុងអំឡុងពេលដែលក្រសួងទេសចរណ៍ បានដាក់ចេញនូវយុទ្ធនាការទស្សនាកម្ពុជានៅរដូវកាលបៃតង ចាប់ពីខែឧសភា ដល់ខែតុលា នៅពេលដែលកម្ពុជា បញ្ចេញនូវសម្រស់ពិតប្រាកដរបស់ខ្លួន ជាមួយនឹងភាពស្រស់បំព្រងនៃធម្មជាតិ ពណ៌បៃតងខ្ចី និងបរិយាកាសបរិសុទ្ធ ដែលស័ក្តិសមបំផុតសម្រាប់ទេសចរណ៍បែបធម្មជាតិ អេកូទេសចរណ៍ និងការលំហែកាយដើម្បីសុខុមាលភាព។

លោកបន្តថា នាពេលកន្លងមក ក្រសួងទេសចរណ៍ និងភាគីឥណ្ឌា បានរៀបចំព្រឹត្តិការណ៍ទេសចរណ៍រួមគ្នាជាច្រើន ទាំងនៅក្នុងប្រទេសឥណ្ឌា និងនៅកម្ពុជា។ ជាពិសេសក្រសួងទេសចរណ៍, ក្រុមប្រឹក្សាភិបាលសិក្សាទីផ្សារ និងផ្សព្វផ្សាយទេសចរណ៍កម្ពុជា ដោយមានកិច្ចសហការជាមួយវិស័យឯកជន ក៏បានសម្របសម្រួលដំណើរទស្សនកិច្ចសិក្សា (FAM TRIP) បុគ្គលល្បីៗ, Influencers របស់ឥណ្ឌា មកកម្ពុជា បានជាច្រើនក្រុម នាពេលកន្លងមក ដើម្បីផ្សព្វផ្សាយអំពីសក្តានុពលទេសចរណ៍របស់ប្រទេសកម្ពុជា ទៅកាន់ទីផ្សារឥណ្ឌា។

លោករដ្ឋមន្ត្រី ហួត ហាក់ បន្ថែមថា ការរៀបចំឆ្នាំទេសចរណ៍កម្ពុជា-ឥណ្ឌា ការរៀបចំព្រឹត្តិការណ៍ជាច្រើនរួមគ្នាកន្លងមក និងទៅអនាគត និងការផ្សព្វផ្សាយរួមគ្នានឹងក្លាយជាកាតាលីករដ៏សំខាន់ក្នុងការជំរុញទំនាក់ទំនង និង ការតភ្ជាប់វិស័យទេសចរណ៍ ក៏ដូចជាទំនាក់ទំនង និងបេះដូងរវាងប្រជាជន នៃប្រទេសទាំងពីរ កម្ពុជា-ឥណ្ឌា ដែលនឹងក្លាយជាមូលដ្ឋានគ្រឹះដ៏រឹងមាំ ក្នុងការសម្រេចបាននូវការកសាងកិច្ចសហប្រតិបត្តិការ គ្រប់ជ្រុងជ្រោយនាពេលអនាគត។

លោក វ៉ាន់ឡាល់វ៉ាវណា បាវីតឡុង បានលើកឡើងថា យោគៈ មានប្រភពដើមមកពីប្រទេសឥណ្ឌាបុរាណ។ ឆ្លងកាត់ជាច្រើនសតវត្សរ៍មកនេះ យោគៈបានរីកសាយភាយលើដែនសង្គម និងភូមិសាស្ត្រ ហើយនៅពេលបច្ចុប្បន្ននេះ ត្រូវបានប្រជាពលរដ្ឋនៅគ្រប់ទ្វីបទាំងអស់ ទទួលយក និងអនុវត្តជាវិថីដ៏គួរឱ្យទុកចិត្តមួយ ឆ្ពោះទៅរកការរស់នៅប្រកបដោយសុខភាពល្អ និងសកម្មភាពរស់រវើក។

លោកបានបន្តថា ដោយសារតែការទទួលស្គាល់នូវតម្លៃទាំងនេះហើយ ទើបវិស័យយោគៈ ទទួលបានការគាំទ្រយ៉ាងច្រើនលើសលប់ពីបណ្ដាប្រទេសចំនួន ១៧៧ នៅពេលដែលមហាសន្និបាតអង្គការសហប្រជាជាតិ បានសម្រេចអនុម័តយកថ្ងៃទី២១ ខែមិថុនា ធ្វើជាទិវាយោគៈអន្តរជាតិ កាលពីខែធ្នូ ឆ្នាំ២០១៤។ កម្ពុជាបានរៀបចំប្រារព្ធទិវាយោគៈអន្តរជាតិនេះ ចាប់តាំងពីឆ្នាំ២០១៥ មកម្លេះ។ ការប្រារព្ធទិវានេះ បានរួមចំណែកយ៉ាងមានអត្ថន័យដល់ការកើនឡើងនៃចំនួនអ្នកគាំទ្រ និងអ្នកហាត់យោគៈនៅក្នុងប្រទេសដ៏ស្រស់ស្អាតមួយនេះ។

លោក វ៉ាន់ឡាល់វ៉ាវណា បាវីតឡុង បញ្ជាក់ថា ក្រៅពីព្រឹត្តិការណ៍នាថ្ងៃនេះ ស្ថានទូតឥណ្ឌាក៍បានចាប់ដៃគូស ហការជាមួយស្ថាប័នរដ្ឋ និងអង្កការមិនមែនរដ្ឋាភិបាលនានា រួមមាន៖ ក្រសួងទេសចរណ៍ និងក្រសួងកិច្ចការនារី ព្រមទាំងគ្រឹះស្ថានអប់រំជាច្រើន ដូចជា៖ សាកលវិទ្យាល័យពុទ្ធិសាស្ត្រ, ពុទ្ធិកសាកលវិទ្យាល័យព្រះសីហនុរាជ, វិទ្យាស្ថានបច្ចេកវិទ្យាគីរីរម្យ, សាកលវិទ្យាល័យភូមិន្ទវិចិត្រសិល្បៈ និងសាលាមិត្តភាពកម្ពុជា-ឥណ្ឌាជាដើម។

លោក ង៉ូវ សេងកក់ អភិបាលរងខេត្តសៀមរាប បានលើកឡើងថា ព្រឹត្តិការណ៍ដ៏មានសារៈសំខាន់នេះ មិនត្រឹមតែជាការលើកកម្ពស់ការយល់ដឹងអំពីសុខភាព សុខុមាលភាព និងគុណភាពជីវិតរបស់ប្រជាពលរដ្ឋប៉ុណ្ណោះទេ ប៉ុន្តែថែមទាំងជាការបង្ហាញពីស្មារតីនៃការរួបរួម សន្តិភាព និងភាពសុខដុមរមនារវាងមនុស្ស និងធម្មជាតិ ដែលជាគុណតម្លៃសកលរបស់យោគៈ។

ជាមួយគ្នានេះ លោកបញ្ជាក់ថា ព្រឹត្តិការណ៍នេះ ក៏ជាឱកាសមួយដ៏ប្រសើរបំផុតក្នុងការផ្សព្វផ្សាយសក្តានុពលទេសចរណ៍ វប្បធម៌ និងទេសចរណ៍សុខុមាលភាពរបស់កម្ពុជា ក៏ដូចជាការពង្រឹងចំណងមិត្តភាព និងកិច្ចសហប្រតិបត្តិការដ៏ល្អប្រសើររវាងព្រះរាជាណាចក្រកម្ពុជា និងសាធារណរដ្ឋឥណ្ឌា ឱ្យកាន់តែរឹងមាំថែមទៀត៕