(ព្រះវិហារ)៖ គណៈកម្មការអន្តរក្រសួង ដែលមានក្រសួងសេដ្ឋកិច្ច និងហិរញ្ញវត្ថុ និងក្រសួងសាធារណការ និងដឹកជញ្ជូន ដោយមានការចូលរួមពីលោក សំ លាងទ្រី ប្រធានមន្ទីរសាធារណការ និងដឹកជញ្ជូន ខេត្តព្រះវិហារ និងមន្ត្រីបច្ចេកទេស នៅព្រឹកថ្ងៃទី១៩ ខែមិថុនា ឆ្នាំ២០២៦នេះ បានចុះពិនិត្យមើល និងប្រគល់-ទទួលការងារស្ថាបនាប្រព័ន្ធលូអ៊ុយ (U-Drain) ប្រវែង ២,០១៥ម៉ែត្រ មុខកាត់ទំហំ ៥០០មីលីម៉ែត្រ ស្ថិតក្នុងសង្កាត់កំពង់ប្រណាក ក្រុងព្រះវិហារ ខេត្តព្រះវិហារ។

ការស្ថាបនាប្រព័ន្ធលូអ៊ុយ (U-Drain) ប្រវែង២,០១៥ម៉ែត្រ មុខកាត់ទំហំ៥០០មីលីម៉ែត្រ ស្ថិតក្នុងសង្កាត់កំពង់ប្រណាក ក្រុងព្រះវិហារ ដែលគណៈកម្មការអន្តរក្រសួងចុះពិនិត្យនាពេលនេះ គឺអនុវត្តផ្ទាល់ដោយមន្ទីរសាធារណការ និងដឹកជញ្ជូន ខេត្តព្រះវិហារ ស្របទៅតាមស្តង់ដារបច្ចេកទេស និងមានគុណភាព ដែលគណៈកម្មការត្រួតពិនិត្យអន្តរក្រសួង បានឯកភាពទទួលយកលទ្ធផល នៃអនុវត្តការងាររបស់មន្ទីរសាធារណការ និងដឹកជញ្ជូនខេត្តព្រះវិហារ ដោយយល់ឃើញថាលទ្ធផលនេះ ត្រឹមត្រូវតាមការកំណត់ក្នុងបទដ្ឋានបច្ចេកទេស។

ក្រោយពេលពិធីប្រគល់-ទទួលសមិទ្ធផលថ្មីនេះរួច គេសង្កេតឃើញសកម្មភាពលក់ដូររំលោភលើដីចំណីផ្លូវ និងចិញ្ចើមផ្លូវលើប្រព័ន្ធលូអ៊ុយ បានចាប់ផ្តើមកើតមានឡើងជាបណ្តើរៗ ដែលអាចបង្កផលប៉ះពាល់ ដល់សណ្តាប់ធ្នាប់សាធារណៈ សោភ័ណភាពទីក្រុង សុវត្ថិភាពចរាចរណ៍ បរិស្ថាន និងអនាម័យរស់នៅរបស់ប្រជាពលរដ្ឋ។

ជាមួយសកម្មភាពលក់ដូររបស់ប្រជាពលរដ្ឋនៅលើប្រព័ន្ធលូដីចំណីផ្លូវនេះ លោក សំ លាងទ្រី ប្រធានមន្ទីរសាធារណការ និងដឹកជញ្ជូនខេត្តព្រះវិហារ បានថ្លែងអំពាវនាវយ៉ាងទទូចដល់ប្រជាពលរដ្ឋ និងអាជីវករដែលកំពុងរស់នៅ និងប្រកបអាជីវកម្មតាមដងផ្លូវនេះ សូមចូលរួមគោរពច្បាប់ និងរួមគ្នាថែរក្សាសមិទ្ធផលដែលបានសាងសង់ឡើងឱ្យបានគង់វង្ស ដើម្បីធានាបាននូវការប្រើប្រាស់ ប្រកបដោយប្រសិទ្ធភាព និងយូរអង្វែង ព្រមទាំងរួមចំណែកលើកកម្ពស់សុខុមាលភាពសាធារណៈ។

លោក សំ លាងទ្រី ក៏បានសំណូមពរដល់អាជ្ញាធរក្រុងព្រះវិហារ អាជ្ញាធរសង្កាត់ និងស្ថាប័នពាក់ព័ន្ធទាំងអស់ សូមបន្តចុះអប់រំ ផ្សព្វផ្សាយ និងណែនាំដល់ប្រជាពលរដ្ឋឱ្យបានទូលំទូលាយ ដើម្បីពង្រឹងការគោរពសណ្តាប់ធ្នាប់សាធារណៈ និងរក្សាបាននូវភាពរៀបរយ ស្អាត និងមានសុវត្ថិភាពក្នុងទីប្រជុំជន។ លោកបានថ្លែងអំណរគុណយ៉ាងជ្រាលជ្រៅផងដែរ ចំពោះប្រជាពលរដ្ឋ និងអាជ្ញាធរគ្រប់លំដាប់ថ្នាក់ ដែលបានសហការប្រកបដោយស្មារតីទទួលខុសត្រូវខ្ពស់ ក្នុងការថែរក្សាសមិទ្ធផលសាធារណៈ និងរួមចំណែកកសាងក្រុងព្រះវិហារឱ្យកាន់តែមានសោភ័ណភាព សណ្តាប់ធ្នាប់ និងបរិស្ថានរស់នៅល្អប្រសើរឡើង៕