(ត្បូងឃ្មុំ)៖ នាថ្ងៃទី១៩ ខែមិថុនា ឆ្នាំ២០២៦ លោកបណ្ឌិត ជាម ច័ន្ទសោភ័ណ អភិបាលខេត្តកំពង់ស្ពឺ និងឧត្តមភរិយាលោកស្រី ម៉េង វ៉ាន់ដានីន ព្រមទាំងក្រុមគ្រួសារ បានអញ្ជើញជាអធិបតី ក្នុងពិធីក្រុងពាលី សាងសង់ដងទង់មួយគូរ និងពុទ្ធាភិសេកព្រះអង្គធំលើព្រះវិហារ ស្ថិតក្នុងវត្តតេជសុវណ្ណភូមិ នៅភូមិនិគមលើ ឃុំស្រឡប់ ស្រុកត្បូងឃ្មុំ ខេត្តត្បូងឃ្មុំ។

ពិធីនេះមានការអញ្ជើញចូលរួមពីសំណាក់ លោក គន់ រ័ត្នមុនី អភិបាលរងខេត្តត្បូងឃ្មុំ លោក ពាង ណារិទ្ធ អភិបាលរងខេត្តក្រចេះ លោកឧកញ៉ាអគ្គមហាឧបាសក នៅ គន់ និងលោកស្រី លោកអភិបាលស្រុកត្បូងឃ្មុំ ប្រធាន-អនុប្រធានមន្ទីរអង្គភាពជុំវិញខេត្ត អាជ្ញាធរមូលដ្ឋាន លោកតា លោកយាយ និងពុទ្ធបរិស័ទចំណុះជើងវត្តជិតឆ្ងាយយ៉ាងច្រើនកុះករ។

សូមជម្រាបជូនថា លោកបណ្ឌិត ជាម ច័ន្ទសោភ័ណ និងលោកស្រី បានប្រគេននូវព្រះពុទ្ធបដិមាព្រះអង្គធំសាងអំពីស្ពាន់ មានតម្លៃ ១៧,៥០០ដុល្លា និងដងទង់១គូ មានតម្លៃ ៣២,០០០ដុល្លា ក្នុងវត្តតេជសុវណ្ណភូមិ ដើម្បីទុកជាទីសការៈបូជាដ៏ខ្ពង់ខ្ពស់ចំពោះព្រះសម្មាសម្ពុទ្ធ និងជួយលើកកម្ពស់វិស័យព្រះពុទ្ធសាសនាឱ្យគង់វង្សតទៅមុខ។

នៅក្នុងឱកាសនោះ គណៈអធិបតី និងអ្នកចូលរួមទាំងអស់ បានបូជាទៀនធូប ផ្កាភ្ញី ថ្វាយព្រះរតនត្រ័យ និងធ្វើកិច្ចក្រុងពាលីតាមទំនៀមទម្លាប់ព្រះពុទ្ធសាសនា ដើម្បីសុំម្ចាស់ទឹកម្ចាស់ដីក្នុងការសាងសង់ដងទង់មួយគូរទុកជាទីសក្ការៈ។

បន្ទាប់មក ក៏មានការរៀបចំពិធីពុទ្ធាភិសេកព្រះពុទ្ធបដិមា ព្រះអង្គធំកសាងអំពីស្ពាន់ ដែលតម្កល់នៅក្នុងព្រះវិហារ ដើម្បីបង្កើននូវសេចក្តីជ្រះថ្លា និងជាទីសក្ការៈបូជាដ៏ខ្ពង់ខ្ពស់សម្រាប់ពុទ្ធសាសនិកជនដែលមកធ្វើបុណ្យទាន។

ការអញ្ជើញចូលរួមថ្នាក់ដឹកនាំខេត្ត និងពុទ្ធបរិស័ទ្ធជិតឆ្ងាយ ក្នុងពិធីនេះ មិនត្រឹមតែបង្ហាញពីការយកចិត្តទុកដាក់លើវិស័យពុទ្ធសាសនា ដែលជាសាសនារបស់រដ្ឋប៉ុណ្ណោះទេ ប៉ុន្តែថែមទាំងឆ្លុះបញ្ចាំងពីសាមគ្គីភាព និងការរួមចំណែកកសាងសមិទ្ធផលនានាក្នុងវត្តអារាម ដើម្បីទុកជាមរតកសម្រាប់កូនចៅជំនាន់ក្រោយ និងជួយលើកកម្ពស់សីលធម៌សង្គមឱ្យកាន់តែប្រសើរឡើងផងដែរ៕