(ស្វាយរៀង)៖ កម្លាំង​គណគណៈបញ្ជាការឯកភាពរដ្ឋបាលក្រុងបាវិត ខេត្តស្វាយរៀង បានចុះ​ធ្វើ​រដ្ឋ​បាលស្រាវជ្រាវ ចំនួន៤ទីតាំង និងឈានដល់ការបង្ក្រាបសង្ស័យលួចលាក់ ប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា (Online Scams)​ ដោយ​ឃាត់​ខ្លួន​ជនសង្ស័យ៣២នាក់ (ស្រី២នាក់)​ និងវត្ថុតាងមួយចំនួន។

ប្រតិបត្តិការនេះ បានធ្វើឡើងក្រោមការបញ្ជាពីនាយឧត្តមសេនីយ៍ ស ថេត អគ្គស្នងការនគរបាលជាតិ, លោក ប៉េង ពោធិ៍សា អភិបាលខេត្តស្វាយរៀង និង​លោក​ឧត្ដមសេនីយ៍​ទោ​ ពេជ្រ​ វីរៈ​ ស្នងការ​នគរបាលខេត្ត​ស្វាយរៀង​ ក្រោមការសម្របសម្រួលពី​លោកស្រី ពៅ ទេវី ព្រះរាជអាជ្ញារង នៃអយ្យការអមសាលាដំបូងខេត្ត។

សមត្ថកិច្ចក្រុងបាវិត បានឲ្យដឹងថា កាលពីនៅថ្ងៃទី១៨ ខែមិថុនា ឆ្នាំ២០២៦ កម្លាំងគណៈបញ្ជាការឯកភាពក្រុង បានចុះស្រាវជ្រាវ និងបង្រ្កាប ពាក់ព័ន្ធករណីសង្ស័យឆបោកតាមប្រព័ន្ធបច្ចេកវិទ្យា (Online Scam) ចំនួន៤ទីតាំង ស្ថិតនៅភូមិបាវិតលើ សង្កាត់បាវិត។

ជាលទ្ធផល ក្រុមការងារបានរកឃើញករណីពាន់ព័ន្ធ បទល្មើសឆបោកតាមប្រព័ន្ធបច្ចេកវិទ្យាមានមនុស្សសរុបចំនួន ៣២នាក់ ស្រី២នាក់ ទីតាំងទី១ វត្ថុតាងមាន កុំព្យូទ័រយួរដៃ ៣គ្រឿង និងកុំព្យូទ័រលើតុ ៦គ្រឿង, ទីតាំងទី២ មាន កុំព្យូទ័រយួរដៃចំនួន ២៥គ្រឿង កុំព្យូទ័រលើតុចំនួន២៣៨គ្រឿង ធុងCPU ចំនួន ៥គ្រឿង ទូរស័ព្ទដៃចំនួន ១៨១គ្រឿង និង Ipad ចំនួន ២៥គ្រឿង, ទីតាំងទី៣ រកឃើញជនជាតិចិនសរុបចំនួន ១០នាក់ មានជនជាតិ ១នាក់ មានលិខិតឆ្លងដែនត្រឹមត្រូវ និងទីតាំងទី៤ ផ្ទះវីឡា (ភូមិបាវិតលើ) ឈ្មោះ មោះ ប៉ុលរដ្ឋា បានធ្វើការរកឃើញ វត្ថុតាងមួយចំនួនដែលសង្ស័យ បម្រើឱ្យសកម្មភាពឆបោកតាមប្រព័ន្ធបច្ចេកវិទ្យា (Online Scam) រួមមាន កុំព្យូទ័រលើតុចំនួន ១២គ្រឿង កុំព្យូទ័រយួរដៃ ១គ្រឿង ទូរស័ព្ទដៃចំនួន ២០គ្រឿង ក្រោយធ្វើការត្រួតពិនិត្យជាក់ស្ដែងរួចរាល់ ជនបរទេសទាំង ៣២នាក់ ស្រី ២នាក់ រួមទាំងវត្ថុតាងខាងលើ បានបញ្ជូនទៅស្នងការនគរបាលខេត្ត ដើម្បីធ្វើនីតិវិធីបន្ត។

សូមបញ្ជាក់ សមាសភាពក្នុងប្រតិបត្តិការបង្ក្រាបស្គេមអនឡាញនេះ មានការចូលរួមពីលោកអនុប្រធាននាយកដ្ឋាននគរបាលព្រហ្មទណ្ឌ លោកស្នងការរងខេត្ត លោកអធិការរងទទួលការងារយុត្តិធម៌ក្រុង លោកប្រធានការិយាល័យនីតិកម្ម កម្លាំងប៉ុស្តិ៍នគរបាលរដ្ឋបាលសង្កាត់បាវិត៕