(ព្រះវិហារ)៖ លោក លោក ហោ គឹមឡុង អនុប្រធានក្រុមការងារគណបក្សខេត្តចុះមូលដ្ឋានស្រុកឆែប និងជាប្រធានក្រុមការងារគណបក្សចុះមូលដ្ឋានឃុំកំពង់ស្រឡៅពីរ នៅថ្ងៃទី១៨ ខែមិថុនា ឆ្នាំ២០២៦ បានដឹកនាំក្រុមការងារចូលរួម ក្នុងកិច្ចប្រជុំផ្សព្វផ្សាយសេចក្ដីសម្រេចស្ដីពីផែនការរួមឆ្ពោះទៅកាន់ការបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៦ ឆ្នាំ២០២៧ នៅទីស្នាក់ការគណបក្សឃុំកំពង់ស្រឡៅពីរ ស្រុកឆែប ខេត្តព្រះវិហារ។

ក្នុងឱកាសនោះ លោក ហោ គឹមឡុង បានថ្លែងនាំនូវការផ្តាំផ្ញើសាកសួរសុខទុក្ខពីលោក ប្រាក់ សុវណ្ណ សមាជិកគណៈកម្មាធិការកណ្តាល និងប្រធានគណបក្សប្រជាជនកម្ពុជា ខេត្តព្រះវិហារ និងលោក គីម រិទ្ធី សមាជិកគណៈកម្មាធិការកណ្តាល និងជាអនុប្រធានគណបក្សខេត្ត និងលោក សំ លាងទ្រី សមាជិកគណៈអចិន្ត្រៃយ៍គណៈកម្មាធិការគណបក្សប្រជាជនកម្ពុជាខេត្តព្រះវិហារ និងជាប្រធានក្រុមការងារគណបក្សខេត្តចុះមូលដ្ឋានស្រុកឆែប ជូនថ្នាក់ដឹកនាំ សមាជិក សមាជិកា គណបក្សប្រជាជនកម្ពុជាទូទាំងឃុំកំពង់ស្រឡៅពីរ ស្រុកឆែប។

លោក ហោ គឹមឡុង បានថ្លែងធ្វើការផ្សព្វផ្សាយ និងណែនាំអំពីផែនការរួមរបស់គណបក្សឆ្ពោះទៅកាន់ការបោះឆ្នោតឃុំ-សង្កាត់ ឆ្នាំ២០២៧ ដោយជំរុញឱ្យគ្រប់ថ្នាក់ដឹកនាំ និងសមាជិកគណបក្ស បន្តពង្រឹងសាមគ្គីភាពផ្ទៃក្នុង បង្កើនទំនាក់ទំនងជិតស្និទ្ធជាមួយប្រជាពលរដ្ឋ និងអនុវត្តការងារនយោបាយឱ្យមានប្រសិទ្ធភាពខ្ពស់។

លោក ហោ គឹមឡុង បានថ្លែងទៀតថា «យើងទាំងអស់គ្នា ត្រូវបន្តថែរក្សាសាមគ្គីភាព ឯកភាពផ្ទៃក្នុងឱ្យបានរឹងមាំ ចុះជាប់ជាមួយប្រជាពលរដ្ឋ ស្តាប់ពីសំណូមពរ និងដោះស្រាយបញ្ហាប្រឈមនានាជូនប្រជាពលរដ្ឋឲ្យបានទាន់ពេលវេលា ដើម្បីរក្សាទំនុកចិត្ត និងការគាំទ្រពីប្រជាពលរដ្ឋចំពោះគណបក្សប្រជាជនកម្ពុជា»។

លោកបានបន្តថា «ការត្រៀមខ្លួនឱ្យបានល្អតាំងពីពេលនេះ គឺជាកត្តាសំខាន់ក្នុងការធានាភាពជោគជ័យសម្រាប់ការបោះឆ្នោតក្រុមប្រឹក្សាឃុំ-សង្កាត់ អាណត្តិទី៦ ឆ្នាំ២០២៧ ដោយត្រូវអនុវត្តផែនការការងារ ឱ្យបានច្បាស់លាស់ និងមានការទទួលខុសត្រូវខ្ពស់»។ លោកបានណែនាំឱ្យបន្តលើកកម្ពស់ស្មារតីបម្រើប្រជាពលរដ្ឋដោយស្មោះត្រង់ ប្រកាន់ខ្ជាប់នូវគោលការណ៍របស់គណបក្ស និងរួមគ្នាអនុវត្តភារកិច្ច ដែលបានកំណត់ឱ្យទទួលបានលទ្ធផលល្អប្រសើរ។

លោកថាកិច្ចប្រជុំផ្សព្វផ្សាយនេះ មានគោលបំណងបញ្ជ្រាបការយល់ដឹងអំពីផែនការរួមរបស់គណបក្ស និងពង្រឹងការត្រៀមលក្ខណៈរបស់មន្ត្រី និងសមាជិកគណបក្សនៅមូលដ្ឋាន ដើម្បីឆ្ពោះទៅរកភាពជោគជ័យ ក្នុងការបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៦ ឆ្នាំ២០២៧ ខាងមុខ៕