(បរទេស)៖ ក្រុមម្ចាស់ផ្ទះសហរដ្ឋអាមេរិក បានឡើងទៅវគ្គ ៣២ក្រុមនៃព្រឹត្តិការណ៍បាល់ទាត់ពិភពលោក FIFA World Cup 2026 ក្រោយផ្តួលក្រុមនៅអាស៊ី អូស្រ្តាលី ២-០ យប់មិញ។

នេះជាជ័យជម្នះលើកទី២ សម្រាប់អាមេរិក ក្រោយផ្តួលប៉ារ៉ាហ្គាយ មកពីតំបន់អាមេរិកឡាទីន ៤-១ នៅថ្ងៃបើកឆាក World Cup លើកទី២៣។

៣ពិន្ទុបន្ថែមនេះដែរ បានធ្វើឲ្យប្រទេសម្ចាស់ផ្ទះ World Cup ជាលើកទី២ នេះមាន ៦ពិន្ទុពេញ និងឈរកំពូលតារាងនៃពូល D យ៉ាងរឹងមាំ និងទទួលបានកៅអី១ ដូចសហម្ចាស់ផ្ទះមិចស៊ិកដែរ ដើម្បីឡើងទៅវគ្គចាញ់-ធ្លាក់ជាបន្តទៀត។

ម៉ារ៉ុក មកពីអាហ្រ្វិកដែលស្ថិតក្នុងពូល C ក៏បានយកឈ្នះក្រុមនៅអឺរ៉ុប ស្កុតឡេន ១-០ មាន ៤ពិន្ទុឈរទីកំពូលតារាងបណ្តោះអាសន្នផងដែរ ក្រោយលេងស្មើប្រេស៊ីល ១-១ នៅថ្ងៃបើកឆាក៕