(ភ្នំពេញ)៖ លោកឧត្ដមសេនីយ៍ឯក រ័ត្ន ស្រ៊ាង មេបញ្ជាការរង កងរាជអាវុធហត្ថលើផ្ទៃប្រទេស មេបញ្ជាការ កងរាជអាវុធហត្ថរាជធានីភ្នំពេញ នៅថ្ងៃទី២០ ខែមិថុនា ឆ្នាំ២០២៦ បានបញ្ជូនមន្រ្តីអាវុធហត្ថរាជធានីភ្នំពេញ ដែលបានស្ម័គ្រចិត្តទៅចូលរួមបរិច្ចាគឈាម ដោយក្តីស្រឡាញ់ និងសាមគ្គីភាព ដើម្បីជួយសង្គ្រោះជីវិតជនរងគ្រោះ និងបំពេញតម្រូវការឈាមក្នុងសង្គម ក្រោមប្រធានបទ «បរិច្ចាគឈាម ចងចាំវីរភាព» រំលឹកដល់ ខួប៤៩ឆ្នាំ ក្នុងស្មារតីដឹងគុណ និងចងចាំជានិច្ចនូវវីរភាព នៃការស្វែងរកសុខសន្តិភាពជូនជាតិមាតុភូមិរបស់ សម្ដេចតេជោ ហ៊ុន សែន និងកងទ័ពពលីរបស់កម្ពុជា។

ពិធីនេះ បានរៀបចំធ្វើឡើងក្រោមអធិបតីភាពលោក ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាប្រធានសហភាពសហព័ន្ធ យុវជនកម្ពុជា ដែលរៀបចំឡើងនៅមណ្ឌលសន្និបាត និងពិព័រណ៍កោះពេជ្រ៕