(វៀតណាម)៖ ក្នុងឱកាសបំពេញទស្សនកិច្ចការងារនៅរដ្ឋធានីហាណូយ សាធារណរដ្ឋសង្គមនិយមវៀតណាម នាយឧត្តមសេនីយ៍ គន់ គីម អគ្គលេខាធិការសមាគមអតីតយុទ្ធជន និងនិវត្តជនកម្ពុជា បានអញ្ជើញជួបពិភាក្សាការងារជាមួយថ្នាក់ដឹកនាំ សមាគមធុរកិច្ចអតីតយុទ្ធជនវៀតណាម។

ក្នុងជំនួបនេះ ភាគីទាំងពីរបានផ្លាស់ប្តូរយោបល់អំពីការពង្រឹងកិច្ចសហប្រតិបត្តិការរវាងអង្គការអតីតយុទ្ធជននៃប្រទេសទាំងពីរ ជាពិសេសការលើកកម្ពស់ទំនាក់ទំនងក្នុងវិស័យសេដ្ឋកិច្ច ពាណិជ្ជកម្ម វិនិយោគ និងការចែករំលែកបទពិសោធន៍ក្នុងការអភិវឌ្ឍអតីតយុទ្ធជន។

នាយឧត្តមសេនីយ៍ គន់ គីម បានវាយតម្លៃខ្ពស់ចំពោះសមិទ្ធផល និងការរួមចំណែករបស់សមាគមធុរកិច្ចអតីតយុទ្ធជនវៀតណាម ក្នុងការអភិវឌ្ឍសេដ្ឋកិច្ច សង្គម និងការលើកកម្ពស់ជីវភាពរស់នៅរបស់អតីតយុទ្ធជន និងគ្រួសាររបស់ពួកគេ។

នាយឧត្តមសេនីយ៍ ក៏បានស្វាគមន៍ និងលើកទឹកចិត្តឱ្យមានការពង្រីកកិច្ចសហប្រតិបត្តិការរវាងសហគ្រិនអតីតយុទ្ធជនកម្ពុជា និងវៀតណាម ដើម្បីបង្កើតឱកាសថ្មីៗសម្រាប់ការវិនិយោគ និងការអភិវឌ្ឍរួមគ្នា។

ថ្នាក់ដឹកនាំសមាគមធុរកិច្ចអតីតយុទ្ធជនវៀតណាម បានបង្ហាញពីការប្តេជ្ញាចិត្តក្នុងការបន្តពង្រឹងទំនាក់ទំនង និងជំរុញសកម្មភាពសហប្រតិបត្តិការជាក់ស្តែងជាមួយសមាគមអតីតយុទ្ធជន និងនិវត្តជនកម្ពុជា ដើម្បីរួមចំណែកដល់ការពង្រឹងចំណងមិត្តភាព និងកិច្ចសហប្រតិបត្តិការរវាងប្រទេសទាំងពីរ។

ជំនួបនេះបានប្រព្រឹត្តទៅក្នុងបរិយាកាសស្និទ្ធស្នាល កក់ក្តៅ និងពោរពេញដោយស្មារតីមិត្តភាព សាមគ្គីភាព និងការយោគយល់គ្នាទៅវិញទៅមក៕