(កំពង់ធំ)៖ លោក ទុយ សុធារិទិ្ធ អនុប្រធានក្រុមការងារចុះមូលដ្ឋានស្រុកប្រាសាទបល្ល័ង្ក និងជាអនុប្រធានក្រុមការងារចុះមូលដ្ឋានឃុំទួលគ្រឹល បានរំលឹកដល់សមាជិក សមាជិកាទាំងអស់ ត្រូវមានឆន្ទៈ និងគោរពទៅតាមគោលការណ៍របស់បក្ស។ លោក ទុយ សុធារិទិ្ធ ថ្លែងក្នុងពិធីប្រកាសក្រុមការងារចុះមូលដ្ឋានភូមិជន្លូស ឃុំទួលគ្រឹល ស្រុកប្រាសាទបល្ល័ង្ក ខេត្តកំពង់ធំ នៅថ្ងៃទី២០ ខែមិថុនា ឆ្នាំ២០២៦ ដោយមានអ្នកចូលរួមជាង១០០នាក់។

លោកបន្តថា ថ្នាក់ដឹកនាំគណបក្សប្រជាជនកម្ពុជាពិសេសសម្ដេចតេជោ ហ៊ុន សែន ប្រធានគណបក្សប្រជាជនកម្ពុជា សម្ដេចតែងតែរស់នៅរួមសុខរួមទុក្ខជាមួយប្រជាជនកម្ពុជាគ្រប់ពេលវេលា និងគ្រប់កាលៈទេសៈ មិនតែប៉ុណ្ណោះពេលណាប្រជាជន មានការលំបាកគណបក្សប្រជាជនកម្ពុជា មិនដែលបោះបង់ ឬរត់ចោលប្រជាជនយើងម្ដងណានោះឡើយ ពិសេសក្រុមការងារគ្រប់ជាន់ថ្នាក់ បន្តចុះមូលដ្ឋានដើម្បីជួយដល់ប្រជាពលរដ្ឋ និងសមាជិកបក្សដែលជួបទុក្ខលំបាកអាចបានដឹងអំពីសុខទុក្ខ ថែរក្សាចំណងសាមគ្គីភាពរឹងមាំ ជាមហាគ្រួសារបក្សនៃគណបក្សប្រជាជនកម្ពុជា។

លោក ទុយ សុធារិទិ្ធ បានការណែនាំដល់ក្រុមការងារ និងមន្រ្តីគណបក្សគ្រប់លំដាប់ថ្នាក់បន្តរួមកម្លាំងគ្នាជាកម្លាំងសរុប ដើម្បីការកសាង និងពង្រឹងគណបក្ស តាមរយៈការពង្រឹង ការដឹកនាំនៅគ្រប់ថ្នាក់, ការធ្វើជាគំរូល្អ និងការរៀបចំប្រព័ន្ធការងារ និងរបៀបរបបការងារ ទន្ទឹមនឹងការជំរុញកសាងសមាជិកគណបក្សបន្ថែម ទាំងបរិមាណនិងគុណភាព ដោយផ្តោតជាពិសេសលើយុវជន និងការទប់ស្កាត់រាល់ឧបាយកលទុច្ចរិត ដើម្បីរក្សាសន្តិភាព និងភាពសុខសាន្ត ជូនប្រជាជន ទន្ទឹមនឹងការធ្វើការងារសាធារណៈមតិ និងប្រតិកម្មរហ័សចំពោះការញុះញង់ និងការមួលបង្កាច់នានា។

លោកបានជំរុញឲ្យក្រុមការងារទាំងអស់ ត្រូវពិនិត្យទៅលើសមាជិក ថាតើអត្តសញ្ញាណប័ណ្ណហើយឬនៅ ឬក៏ហួសសុពលភាព និងជំរុញឲ្យមានការត្រួតពិនិត្យបញ្ជីឈ្មោះ និងចុះឈ្មោះបោះឆ្នោតនៅពេលខាងមុខ៕