(កែប)៖ លោកបណ្ឌិត សោម ពិសិដ្ឋ អភិបាលខេត្តកែប បានអំពាវនាវដល់ប្រជាពលរដ្ឋ និយោជក មាតាបិតា និងអ្នកពាក់ព័ន្ធទាំងអស់ បន្តចូលរួមការពារសិទ្ធិកុមារ និងរួមគ្នាបង្កើតបរិយាកាសដែលកុមារអាចរស់នៅ សិក្សា និងអភិវឌ្ឍសមត្ថភាពបានពេញលេញ ដើម្បីឈានទៅលុបបំបាត់ទម្រង់ធ្ងន់ធ្ងរ នៃពលកម្មកុមារនៅគ្រប់ខ្សែច្រវាក់ផលិតកម្ម ស្របតាមចក្ខុវិស័យរបស់រាជរដ្ឋាភិបាល។

ការអំពាវនាវដូច្នេះ ខណៈលោកអភិបាលខេត្តកែប អញ្ជើញចូលរួមជាអធិបតី ក្នុងពិធីប្រារព្ធខួបលើកទី២៥ នៃទិវាពិភពលោកប្រឆាំងពលកម្មកុមារ ក្រោមប្រធានបទ «ប្តេជ្ញាលុបបំបាត់ទម្រង់ធ្ងន់ធ្ងរ នៃពលកម្មកុមារនៅគ្រប់ខ្សែច្រវាក់ផលិតកម្ម ដើម្បីកសាងភាពធន់ និងការងារសមរម្យ» នាថ្ងៃទី១៩ ខែមិថុនា ឆ្នាំ២០២៦ នៅបរិវេណសាលាអនុវិទ្យាល័យហ៊ុនសែនអង្កោល ស្ថិតក្នុងភូមិអំពែង ឃុំអង្កោល ស្រុកដំណាក់ចង្អើរ ខេត្តកែប។

លោក សោម ពិសិដ្ឋ ក៏បានអានសារលិខិតរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា និងជាប្រធានកិត្តិយសក្រុមប្រឹក្សាជាតិកម្ពុជាដើម្បីកុមារ ក្នុងឱកាសខួបលើកទី៧៧ ទិវាកុមារអន្តរជាតិ ១មិថុនានិង ខួបលើកទី២៥ ទិវាពិភលោក ប្រឆាំងពលកម្មកុមារ ១២មិថុនា និងទិវាកុមារកម្ពុជាឆ្នាំ២០២៦ ដោយគូសបញ្ជាក់ថា ពលកម្មកុមារ ជាពិសេសទម្រង់ធ្ងន់ធ្ងរ ប៉ះពាល់ដល់សុខភាព ការអប់រំ និងអនាគតរបស់កុមារ ហើយការលុបបំបាត់បញ្ហានេះ ទាមទារការចូលរួមពីគ្រប់ភាគី។ ក្នុងខ្លឹមសារ សារលិតសម្តេចធិបតីបានអំពាវនាវដល់៖

*១៖ ក្រុមប្រឹក្សាជាតិកម្ពុជាដើម្បីកុមារ ត្រូវបន្តការសម្របសម្រួល និងពង្រឹងការអនុវត្តអនុសញ្ញាស្តីពី សិទ្ធិកុមារ ព្រមទាំងផ្សព្វផ្សាយ និងពង្រឹងការអនុវត្តលិខិតបទដ្ឋានគតិយុត្តពាក់ព័ន្ធកិច្ចការពារកុមារ ជាមួយក្រសួង ស្ថាប័ន ដៃគូអភិវឌ្ឍ សង្គមស៊ីវិល ឱ្យបានទូលំទូលាយនិងប្រកបដោយប្រសិទ្ធភាព។

*២៖ ក្រុមប្រឹក្សាជាតិកម្ពុជាដើម្បីកុមារ និងក្រសួងសង្គមកិច្ច អតីតយុទ្ធជន និងយុវនីតិសម្បទា ត្រូវជំរុញការរៀបចំសេចក្តីព្រាងច្បាប់ស្តីពីកិច្ចការពារកុមារ នៃព្រះរាជាណាចក្រកម្ពុជា និងជំរុញការអនុវត្តផែនការ សកម្មភាពជាតិស្តីពីការបង្ការទប់ស្កាត់ និងឆ្លើយតប ចំពោះអំពើហិង្សាលើកុមារ ឆ្នាំ២០២៥-២០៣០។

*៣៖ ក្រសួង ស្ថាប័ន អាជ្ញាធរមានសមត្ថកិច្ច មាតាបិតា អាណាព្យាបាល សហគមន៍ និងកុមារ ត្រូវសហការស្វែងរកដំណោះស្រាយ បង្កើតយុទ្ធសាស្ត្រផ្លាស់ប្តូរឥរិយាបថសង្គម ចំពោះអំពើហិង្សាលើកុមារ។

*៤៖ ក្រសួង ស្ថាប័នពាក់ព័ន្ធ អាជ្ញាធរដែនដីគ្រប់លំដាប់ថ្នាក់ ដៃគូអភិវឌ្ឍ អង្គការមិនមែនរដ្ឋាភិបាល ក្នុងស្រុក និងបរទេស ត្រូវយកចិត្តទុកដាក់លើកកម្ពស់សិទ្ធិកុមារ និងមានការចូលរួមមតិយោបល់ពីកុមារ រាល់ពេលកសាងច្បាប់ គោលនយោបាយ ឯកសារបទដ្ឋានគតិយុត្តនានា ដែលពាក់ព័ន្ធដល់ការរស់នៅ តម្រូវការ បញ្ហាប្រឈម និងការព្រួយបារម្ភរបស់កុមារ។

*៥៖ ក្រសួង ស្ថាប័នពាក់ព័ន្ធ ត្រូវបន្តតាមដាន និងបង្កើនកិច្ចសហប្រតិបត្តិការជាមួយគ្រប់ភាគីពាក់ព័ន្ធ អនុវត្តអនុសញ្ញាស្នូល នៃអង្គការអន្តរជាតិខាងការងារ ដើម្បីលុបបំបាត់គ្រប់ទម្រង់នៃពលកម្មកុមារ។

*៦៖ បន្តពង្រឹងប្រសិទ្ធភាព នៃការអនុវត្តកម្មវិធីជាតិជំនួយសង្គមក្នុងកញ្ចប់គ្រួសារ លើមុខសញ្ញាស្ត្រីមានផ្ទៃពោះ និងកុមារអាយុក្រោម២ឆ្នាំ សិស្សក្រីក្រនៅថ្នាក់បឋមសិក្សា មធ្យមសិក្សា ជនជាប់ឃុំជាស្ត្រី មានផ្ទៃពោះ និងកូនតាមម្តាយនៅក្នុងពន្ធនាគារ ព្រមទាំងរៀបចំអនុវត្តកម្មវិធីគាំពារសង្គម និងកម្មវិធីពិសេស ជូនគ្រួសារជនភៀសសឹកដែលត្រូវបានជម្លៀសចេញពីភូមិសាស្ត្រថៃឈ្លានពានមកលើកម្ពុជា។

*៧៖ គ្រប់ស្ថានីយវិទ្យុ ទូរទស្សន៍របស់រដ្ឋ និងឯកជន ព្រមទាំងប្រព័ន្ធផ្សព្វផ្សាយសង្គមនានា បន្តជួយផ្សព្វផ្សាយឱ្យបានទូលំទូលាយ អំពីសិទ្ធិកុមារ ការចូលរួមរបស់កុមារ ការទប់ស្កាត់អំពើហិង្សាលើកុមារ ការកេងប្រវ័ញ្ច និងរំលោភបំពានផ្លូវភេទកុមារ តាមប្រព័ន្ធអនឡាញ និងពលកម្មកុមារគ្រប់រូបភាព ជាពិសេស ពង្រឹងគុណភាពនៃការផលិតកម្មវិធី សម្រាប់កុមារ ប្រកបដោយខ្លឹមសារអប់រំ ដើម្បីបង្ការទប់ស្កាត់កុំឱ្យកុមារ ក្លាយជាជនរងគ្រោះ។

លោក​ ស្រី ហឿន ប្រធានមន្ទីរស្តីទី​ ការងារ និងបណ្តុះបណ្តាលវិជ្ជាជីវៈខេត្តកែប បានឱ្យដឹងថា កន្លងមក មន្ទីរបានអនុវត្តគម្រោងលុបបំបាត់ទម្រង់ធ្ងន់ធ្ងរបំផុតនៃពលកម្មកុមារ ដោយមានការគាំទ្រពីអង្គការពលកម្មអន្តរជាតិ (ILO) និងដៃគូពាក់ព័ន្ធ ដែលបានជួយទប់ស្កាត់ និងស្តារនីតិសម្បទាកុមារចំនួន ៣,៦៦១នាក់ ពីការងារគ្រោះថ្នាក់ក្នុងវិស័យផ្សេងៗ។

ក្នុងឱកាសនោះ លោកអភិបាលខេត្ត ក៏បានផ្លល់ជូន នូវសំភារសិក្សា មានសៀវភៅ ប៉ិច និងថវិកា ដល់សិស្សានុសិស្ស សាលាអនុវិទ្យាល័យអង្កោល និងវត្ថុអនុស្សាវរីយ៍ មានក្រមា និងថវិកា ដល់លោកគ្រូ អ្នកគ្រូ មេឃុំ ចៅសង្កាត់ មេភូមិ និងអណាព្យាបាលសិស្សផងដែរ៕