(កំពង់ចាម)៖ លោក អ៊ុន ចាន់ដា ប្រធានគណៈកម្មាធិការបក្សប្រជាជនកម្ពុជាខេត្តកំពង់ចាម បានស្នើដល់ថ្នាក់ដឹកនាំក្រុមការងារចុះជួយក្រុងកំពង់ចាមទាំងអស់ ឲ្យបន្តក្នុងការរួមសាមគ្គីគ្នា ដើម្បីឈានឆ្ពោះទៅកាន់ការបោះឆ្នោតជ្រើសរើសក្រុមប្រឹក្សាឃុំ សង្កាត់ នៅក្នុងឆ្នាំ២០២៧។

លោកប្រធានគណៈកម្មាធិការបាក់ខេត្ត បានលើកឡើងដូច្នេះនៅព្រឹកថ្ងៃទី២០ ខែមិថុនា ឆ្នាំ២០២៦ ក្នុងឱកាសដឹកនាំកិច្ចប្រជុំផ្សព្វផ្សាយ សេចក្តីសម្រេចស្ដីពីផែនការរួម ឆ្ពោះទៅកាន់ការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៦ ឆ្នាំ២០២៧ នៅស្នាក់ការបក្សក្រុងកំពង់ចាម។

លោក អ៊ុន ចាន់ដា បានថ្លែងទៀតថា នៅរយៈពេលមិនដល់មួយឆ្នាំទេ ការបោះឆ្នោតជ្រើសរើសក្រុមប្រឹក្សាឃុំ សង្កាត់ និងឈានមកដល់។ ដូច្នេះមុននឹងឈានដល់សកម្មភាពជាក់ស្ដែង គឺចាំបាច់ត្រូវរៀបចំឯកសារ ដែលបម្រើដល់ការងារបោះឆ្នោត ពោលគឺឯកសារទម្រង់ទិស ដល់សមាជិកស មាជិកា ក៏ដូចជាថ្នាក់ដឹកនាំ ទាំងក្រុមការងារ ទាំងគណបក្ស ដើម្បីចង្អុលចាត់តាំងចេញធ្វើសកម្មភាព។

លោក អ៊ុន ចាន់ដា បានបញ្ជាក់ថា ការបោះឆ្នោតជ្រើសរើសក្រុមប្រឹក្សាឃុំ សង្កាត់ គឺមានសារៈសំខាន់ណាស់ សម្រាប់ការដឹកនាំនៅក្នុងមូលដ្ឋាន ដែលហៅថា ការបោះឆ្នោតថ្នាក់ក្រោមជាតិ ជ្រើសរើសតំណាងឲ្យប្រជាពលរដ្ឋនៅថ្នាក់ឃុំ សង្កាត់។ ប៉ុន្តែមិនត្រឹមប៉ុណ្ណោះទេ ពីព្រោះឥទ្ធិពលទាក់ទងទៅដល់ការបោះឆ្នោតឆ្នាំ២០២៨ ដែលជាការបោះឆ្នោតជ្រើសតាំងសមាជិកសភាផងដែរ។ ដូច្នេះប្រសិនទទួលបានលទ្ធផលល្អពីដើមទី ទៅដល់ពាក់កណ្ដាលទី ឬចុងទី នៅតែល្អដដែល ដូច្នេះយើងត្រូវតែខិតខំពង្រឹងពីចម្ងាយ ធ្វើយ៉ាងណាដើម្បីរក្សាឲ្យបាននូវភាពឈ្នះ សម្រាប់ឆ្នាំ២០២៧ នាពេលខាងមុខនេះ៕