មន្រ្តីជាន់ខ្ពស់ក្រសួងអប់រំ ចុះពិនិត្យស្ថានភាពតាម មណ្ឌលប្រឡងត្រៀម សម្រាប់ដំណើរការសំណេរ ការប្រឡងសញ្ញាបត្រមធ្យមសិក្សាទុតិយភូមិ
20-06-2026 14:59
(រតនគិរី)៖ លោកបណ្ឌិត ចាន់ សុភា អនុរដ្ឋលេខាធិការក្រសួងអប់រំ យុវជន និងកីឡា អមដំណើរដោយលោក ឌុច ចាន់តូ អភិបាលរងខេត្តរតនគិរី និងលោក ខាត់ សាម៉ាល់ ប្រធានមន្ទីរអប់រំ យុវជន និងកីឡា ខេត្តរតនគិរី នៅព្រឹកថ្ងៃទី២០ ខែមិថុនា ឆ្នាំ២០២៦ បានអញ្ជើញចុះពិនិត្យស្ថានភាពតាមមណ្ឌលប្រឡងត្រៀម នៅខេត្តរតនគិរី រួមមាន៖ មណ្ឌលវិទ្យាល័យសម្តេចឪ សម្តេចម៉ែ, វិទ្យាល័យហ៊ុនសែនភូមិថ្មី និងមណ្ឌលប្រឡង អនុវិទ្យាល័យ ប៊ូថង ទេសអន្លុង សម្រាប់ដំណើរការសំណេរការប្រឡងសញ្ញាបត្រមធ្យមសិក្សាទុតិយភូមិ ដែលនឹងប្រព្រឹត្តទៅក្នុងពេលឆាប់ខាងមុខ ដើម្បីឱ្យការប្រឡងប្រព្រឹត្តទៅដោយរលូន គោរពតាមគោលការណ៍ច្បាប់ យុត្តិធម៌ តម្លាភាព និងលទ្ធផលទទួលយកបាន។
ការចុះពិនិត្យមណ្ឌលប្រឡងនេះ ក៏ដើម្បីធានាបានថា មណ្ឌលប្រឡងមានបរិស្ថានល្អអំណោយផល មិនមានការបង្កសំឡេងរំខាន មានហេដ្ឋារចនាសម្ព័ន្ធរឹងមាំល្អ ផ្តល់នូវសុខសុវត្ថិភាពក្នុងដំណើរការសំណេរ។ មណ្ឌលប្រឡងនីមួយៗត្រូវបំពេញបាននូវស្តង់ដាដែលបានកំណត់ដោយក្រសួងអប់រំ យុវជន និងកីឡា។ មណ្ឌលប្រឡងនីមួយៗចាំបាច់ត្រូវមានហេដ្ឋារចនាសម្ព័ន្ធរឹងមាំគ្រប់គ្រាន់ដូចជា តុ កៅអី ក្ការខៀន ទ្វា បង្អួច មានបំពាក់ឧបករណ៍បំពងសំឡេង អគ្គីសនី បន្ទប់ទឹក បន្ទប់សង្គ្រោះបឋម និងបន្ទប់ប្រឡងសម្រាប់បេក្ខជនមានបញ្ហាសុខភាព។បន្ទប់ប្រឡងត្រូវមានពន្លឺចេញចូល មានដំបូលរឹងមាំជិតល្អ មិនមានផលប៉ះពាល់ករណីមានភ្លៀងធ្លាក់ជាដើម។
សូមបញ្ជាក់ថា បើតាមរបាយការណ៍ របស់មន្ទីរអប់រំ យុវជន និងកីឡាខេត្តរតនគិរី មុនដំណើរការប្រឡងសញ្ញាបត្រមធ្យមសិក្សាទុតិយភូមិសម័យប្រឡង ១០ សីហា ២០២៦ មានបេក្ខជនសរុបចំនួន ២,០៣២នាក់ (ស្រី១,១០៩នាក់) ក្នុងនោះមាន បេក្ខជនចំណេះទូរទៅ១,៧៧៧នាក់ (ស្រី១,០០៨នាក់), បេក្ខជនថ្នាក់បំពេញវិជ្ជា១៥៦នាក់ (ស្រី ៦៦នាក់), បេក្ខជនស្វែរីនចំណេះទូរទៅ៦៣ នាក់ (ស្រី២៧នាក់), បេក្ខជន ស្វៃរិនបំពេញវិជ្ជា៣៦នាក់ (ស្រី១២នាក់)។ (ស្ថិតិនេះគឺមិនទាន់បានដកបេក្ខភាពបេក្ខជន (រង់ចាំលទ្ធផលប្រឡងឆមាស២ និងមធ្យមភាគពិន្ទុប្រចាំឆ្នាំ)។
មណ្ឌលប្រឡង ត្រូវបានកំណត់ជា៣មណ្ឌល សរុប៨២ បន្ទប់ក្នុងនោះមណ្ឌលវិទ្យាសម្តេចឪ-សម្តេចម៉ែ ៤០បន្ទប់,មណ្ឌលវិទ្យាល័យហ៊ុន សែន ភូមិថ្មី មាន៣០បន្ទប់ និង មណ្ឌលអនុវិទ្យាល័យ ប៊ូ ថង ទេសអន្លុង ១២បន្ទប់៕
